我們一起做水吧！
2013/08/28 08:43:50
網誌分類:
經濟
講廣東話唔止要識吹水，而家娛樂市場開始縮水，大家嘅心水歌同心水戲都唔再以廣東話為先，以往廣東話文化已不再威水，從事廣東話文化嘅想好似以前咁疊水真係好難。
有啲歌手仲分分鐘要四圍撲水，問親友度水，好彩未至於要使橫手昆人水，因為分分鐘搵唔到水之餘仲俾娛樂雜誌同報章抽水。
好多浸過鹹水嘅藝人都唔明白，點解食住娛樂圈尾水，要自己嘅迷哥迷姐磅水咁困難，點樣喺自己嘅作品整色整水都難以豬籠入水，搞到一頭霧水，於是就只可以信命水。
不過相比起以前，其實唔係因為佢哋嘅表演半桶水，只不過係廣東文化已經係凍過水，想食水有以前咁深係冇可能，醒水嘅就努力裝備自己，如果唔係只會水鬥水，做每件事都唔湯唔水，到最後大家都唔知你係乜水，咁就當然搵唔到油水，只可以吊住鹽水捱落去。
到底以後廣東話文化會否一直潛水永不翻身？我就非常樂觀，單看以上短短幾百字，就知道搞得懂廣東話的人都不是水魚，廣東話真的一點都不水！正如李小龍的名句都是說：「BeWater」，我們一起做水吧！
公子日記
森美
回應
(0)
我要發表
好提議