紅蘿蔔生菜煎餅DIY
日本好似叫呢D做燒餅 (我最鍾意就係燒餅!)~
但為左明確指出呢樣野係煎出黎既, 就叫佢煎餅啦, 而且網上有相類食譜都叫佢做煎餅。
整呢樣食物既原因: 附近街市紅蘿蔔大減價, 薯仔賣晒, 蕃茄同粟米好貴 (情報來源: 燒餅)...
材料:
紅蘿蔔、西生菜、蛋、麵粉、水、鹽、鼓油、油
其他:
好多個碗 + 碟(大小通吃)、平底鑊 (我屋企加個電磁爐, 可能你屋企用媒氣 =口=")、木筷子 (可以一對木, 一對膠, 或者兩對木, 因為我用筷子攪粉漿, 另一對就煎野同食野用)、一個好大既木鑊剷、刀、「針板」
預製過程:
1. 紅蘿蔔刨走D皮洗淨, 西生菜整走出面D好多泥既部份洗淨
2. 西生菜按佢既紋理90度角切絲 (咁先唔使咬咁耐, 適合胃氣脹人士) 再洗淨; 由於紅蘿蔔好硬切唔到, 我烚左佢一個鐘再切絲
3. 西生菜絲加鹽攪勻, 再加少少鼓油, 包好放入雪櫃
4. 麵粉加水攪勻, 之後可以稍為放入雪櫃, 繼續等D紅蘿蔔冇咁硬
5. 切紅蘿蔔... 其實烚熱左D紅蘿蔔仲可以令佢入口冇咁硬 (如果唔想佢好似好生咁)
6. 我揀左放D紅蘿蔔落去麵粉漿度先, 因為好似多D水份, 可以攪得勻D咁, 之後落蛋再攪
7. 落生菜攪攪攪
8. 燒熱個平底鑊, 加油, D油滾左之後將D材料倒落去, 等到D油有更滾既味, 或者D材料開始散發佢既香味時, 用木筷子同木鑊剷小心檢查材料個底開始變成一大塊未, 如果變成一大塊可以反轉 (呢個步驟我做得唔多好, 所以佢最後係幾塊, 唔係一塊)
9. 煎埋另一邊, 可以上碟食得; 如果你信得過屋企D廚房紙, 可以用佢索乾D油
呢個食譜送俾我老公燒餅, 相信佢睇完會笑到肚痛...
中秋節快樂!