超錯
2014/06/14 08:44:57 網誌分類: 經濟
| 前兩天看到伊拉克反政府武裝份子攻陷伊拉克第二大城市摩蘇爾、五十萬伊難民大逃亡的消息，心諗「唔係呀嘛？咁失敗？」美國二○○三年三月發動對伊拉克戰爭，推翻侯賽因政權，建立親美政府，十一年後，呢個政府危在旦夕，反政府軍攻到首都巴格達五十公里之外，真係睇戲都無咁戲劇性。 記得二○○三年美軍攻入巴格達後，剛好前參謀長聯席會議主席鮑威爾訪港，在一個私人早餐會中，我問他怎樣看小布殊政府對伊拉克的軍事行動？他說在老布殊政府任內，他當參謀長打海灣戰爭，當時伊拉克入侵科威特，聯軍決定攻打伊拉克，四十二日空襲掃平伊拉克部隊，本可攻入首都巴格達，捉拿伊拉克總統侯賽因，但老布殊決定唔攻，因為認為打咗入去，都「無法管治」。鮑威爾咁答，都表明佢對小布殊打入巴格達的睇法。 當然，小布殊發動第二次伊拉克戰爭，都有特殊背景。二○○一年九月美國發生「九一一」慘劇，小布殊政府無法追尋到發動「九一一」襲擊的主腦拉登，就改為和國家安全顧問賴斯設計出「邪惡軸心」（AxisofEvil）呢個咁有創意的說法，將伊拉克、伊朗和北韓定為「邪惡軸心國」，呢個講法雖然有啲「細路」，好似美國漫畫的情節，但勝在容易入腦，成功將美國人民在「九一一」後的憤怒情緒，由無影無蹤的拉登，轉移向這三個有形有跡的國家。 小布殊的智商據說只有九十一（低於常人的一百），但勝在行動大膽，就在二○○三年三月動手，基於一些叛離伊拉克人士不太可靠的證詞，話伊拉克總統侯賽因發展「大殺傷力武器」（WeaponofMassDestruction），聯同多國部隊，就此發動對伊拉克的戰爭。結果在一輪轟炸後，開戰三星期後攻入伊拉克首都巴格達，開戰兩個月後到二○○三年五月，小布殊就在航空母艦林肯號上，在「任務完成」的大橫額前，宣佈勝利。這亦成為經典的一幕，因為要到七年後，到二○一○年八月，戰爭才真正結束。 美國對伊拉克戰爭唔止「宣佈勝利」兒戲，開戰的藉口更兒戲，美軍最後拘捕及處死侯賽因，但反轉成個伊拉克，都找不到任何「大殺傷力武器」，之前傳到好勁的甚麼「超級大炮」之類的東西，根本不存在，直接引發伊拉克戰爭的伊拉克變節者阿爾．賈納尼，在二○一一年承認有關大殺傷力武器的說法「一切其實均為謊言」，侯賽因真係死得冤枉。 好多人話小布殊做咗佢老竇唔敢做的事情，都係為咗石油。問題係扶起一個傀儡政權，但最後都守唔住，即使從美國角度，又得到乜嘢好處呢？二○○八年美國爆發金融海嘯，奧巴馬上台後為節省軍費，決定全面從伊拉克撤軍。二○一一年十二月美軍全面撤退，奧巴馬當日仲話伊拉克政府係美國「強大和永久的夥伴」。可惜呢個美國扶起的政府看來既不強大亦不永久。當日老布殊的估計是對的，咁樣換人哋個政府根本無法管治，可惜佢無犯錯，個仔忍唔到就犯錯。 美國媒體保守估計，有四千一百個美軍在伊戰中死亡，另外據「維基解密」在二○一○年十月二十二日所公佈的美軍檔案顯示，在伊拉克戰爭期間直接死於戰火的平民達六萬六千零八十一人。若最後伊拉克又落入反美力量之手，呢七萬人都係白死。 同樣地美國當日在阿富汗軍事介入打倒塔利班政權，亦唔叻得好多。佢今日為求抽身移師亞洲和歐洲，針對中國同俄國，就同塔利班和解並交換人質，搞到塔利班首腦馬上宣佈勝利，並在巴基斯坦發動襲擊南部卡拉奇機場，導致二十八人死亡。你話美國又搞邊科？ 記住，政客推年輕人上戰場，叫他們為一理想而奮戰，好多時不是錯，而是超錯。中國當年的文革如是，伊拉克戰爭亦如是。 「巴士的報」是一份網上報紙，讓網民隨時隨地拿着手機或平板電腦可以看到。www.bastillepost.com wh.lo@bastillepost.com 盧永雄 |
 | |
回應 (0)
我要發表