關鍵問題要唔要住屋先
2014/06/18 08:50:31 網誌分類: 經濟
上周五示威者用鐵馬撞碎立法會外牆，寫下激烈示威新一章。政府事後在上周六第一波反撲，除了譴責暴力之外，更直指不少帶頭示威團體不是當地居民。示威團體在星期日開記者會還招，除了抬出一個原居民話係示威團體中人之外，更聲言因為政府不聽民意，一意孤行，才激發大規模示威。
示威團體還招後，政府昨日展開第二波反撲，話新界東北發展諮詢咗幾年，並唔係無聽市民的意見。但如今反對團體的立場是不遷不拆，寸步不讓，妥協極難。
暴力示威加上無休止的爭拗，其實相當趕客，一般政治不敏感的市民，會覺得非常厭煩，唔想聽，兩家都不幫。而政治活躍的市民，就會按自己支持泛民或支持建制的角度嚟表態。
我反而覺得講講吓就迷失咗主題，?家講緊新界東北發展的前期撥款，最後要發展呢個地方，目標係提供六成公營房屋（公屋加居屋）、四成私營房屋。如今後生仔生活好難艱，若是中產一點，結婚想買樓，郁啲五百、六百萬一個細單位，點買？若是基層後生仔，申請公屋或者想買居屋，等十年都未等到，若然外母見唔到樓唔畀個女嫁，咁就有排未使結婚啦。
你可以話政府無能，但都唔好阻住佢做正經嘢，若成功反對新界東北撥款，唔理目標幾崇高，志向幾遠大，幾咁反對呢個不民主的政府，幾咁反對官商勾結，客觀上的結果只係幾年後更少公私營房屋供應，買私樓更貴，等公家樓更耐啫。
好多時見到年輕人打一世工都係為間樓捱，真係唔知人生應唔應該係咁。所以當政府朝向增加土地房屋供應時，唔好阻住佢啦，否則受害的只是五、七年等上樓的年輕人咋。新界東北發展爭拗，關鍵問題要唔要住屋先？
「巴士的報」是一份網上報紙，讓網民隨時隨地拿着手機或平板電腦可以看到。www.bastillepost.com
wh.lo@bastillepost.com
盧永雄
回應 (0)
我要發表