旅遊奇譚(四)
旅行有時發生的事, 真係足以講成世嫁!
好似我同老妻第一次去拉斯維加斯(九五九六年啩?), 坐朋友車到內華達州, 一入城, 有間賭場叫NAVADA LANDING , 我地入去借厠所用, 黃太走去玩咗三鋪角子機, 中正紅白藍7 7 7 (獎金一万元美金!)真係好運到離奇也!而家每次講起, 都快活過神仙也, 講到差D牙血都出埋啦!
有次去菲律賓玩(N年前, 馬可斯時代), 去洗手間, 企埋去小緊便, 忽然發覺在身後便, 有條賓佬有所動作, 原來佢地興同人按摩膊頭揾貼士, 立即反身俾十披索, 大叫一声 NO TOUCH! 嚇到條賓佬死, 以為我想打佢!
又試過買咗個木刻公仔俾D女同事, 個公仔有個木桶圍住, 一攞起, 有支巨型陽物彈出, 嚇到D女同事花容失色, -差D要同黃SIR絕交咁滯o(其實D師奶, 成鬼日懶純情, 又有乜可能未見過吖, 咁都會嚇倒?)吓?
有次同個同事去桂林玩, 返泥見佢件行李重到搬都搬唔起, 奇怪八吓, 原來此君買咗好鬼多石頭番泥,(其實執都成山係啦!駛鬼買咩?死蠢!) 佢話想返香港砌個假山渦, 嘩!如果佢想整個鐘乳洞, 咪好大劑?
有陣時見D團友買嘢, 都冇乜腦, 晨早第一日就買埋D重到死嘅手信, 例如石刻的守墓獸呀, 巨型大花磚呀, 甚至有人買個大沙煲都有!全程要照顧幾件重嘢, 真死蠢也!
有次去到比利時鑽石厰, 本來話参觀琢磨鑽石的工序, 屬於技術考察之馬o去到完全大災難!老妻同女兒簡直, 發晒狂!發晒狂!佢地都為鑽石發晒狂!
DIAMOND IS FOREVER!
我一早鼠咗出去, 急CALL張AE card 要減CREDIT LIMIT, 但已來很太遲了, 入番去, 個SALES笑笑口話, 黄生搞掂啦!你張咭, 冇問題!乜得你張咭NO LIMIT ?
吓?有問題噃!就係我個人嘅問題嘞!唉!