跳舞的感悟

黄SIR係一個思想型的人, 玩乜鬼嘢都鍾意諗餐飽, 點解人會咁覺得跳舞好玩呢？ 咁跳舞有乜意義呢？跳得唔好又會點呢？

跳舞, 其實除了讀大學時, 攪吓舞會, 跳下D四步舞,  根本都無乜大興趣（太多嘢玩, 玩唔切！）ｏ 但退了休, 窮極無聊, 教協二百文學二十堂（可能見黄SIR學得過癮, 而家加到二百八十文）十皮嘢一堂, 即管玩吓啦！誰知玩玩吓, 又覺得幾頂癮噃！

首先在學習跳舞的過程, 可以有學而時習之喜悅, 由完全唔識, 到識小小的過程, 是非常有成功感的事, 如果有D識做D嘅老師呀, 同學呀, 讚吓你跳得好呀, 有天份呀, 咁就更加天下無敵啦ｏ尤其是你見D同學, 左手左腳, 拍子又唔準, 左右不分, 有時前後都會錯, 真係自我澎漲到極！起碼我全部舞步記倒晒ｏ做到七八成, 都夠殺啦！

而且學識佐, 又可以去外面D舞塲玩, 茶舞一個人幾十皮, 晚舞一人百零皮, 玩成四粒鐘, 同D同學交流吓舞藝, 真係身心愉快也ｏ何况一班同學, 實有一D玩得埋嘅, 於是嘻嘻哈哈咪又一日囉ｏ睇吓D友, 要俾錢先有PARTNER, 我都算幸福啦！

退一万步諗諗,  再老D冇人肯同你玩（激走晒D靚師妹！）, 只要有錢, 仲想玩, 可以請師傅嘛ｏ（而家在舞塲見D亞姆, 咪咁做緊囉,  D亞姆攬實個男師傅, 仲駛鬼跳咩？其實既然攬實就得, 即係請我都得啦, 都唔駛識跳啦！）

跳舞既有美妙的音樂, 又有形體的運動, 又可以保持青春的心態, 所以是很值得參與, 如果仲有錢收, 就至正矣！