我武維揚（三）

講起我在詠春武館的日子, 都好有趣ｏ通常徐尚田老師, 約在晚上六七點就返屋企食飯, 約八時才回來再教, 徐師走後, 就由我做掌門人ｏ每次門鈴響, 有人嚟, 就由我開門招呼, 是為掌門人也！（衰衰地, 我都做過掌門人！）

當年學拳收費, 五十大元, 徐師例不追數, 黏黏吓手時就遞俾佢, 佢都冇手數, 我諗過交四十皮, 佢都唔知啦！𣎴過始終唔敢做, 万一佢一嘢甩手直衝, 我咪要換過棚牙？都係咪鬼古惑佢！

不過就試過拖數, 拖吓十號至交, 又拖吓十五號, 二十五號, 拖拖吓就交少一個月, 佢都好似唔係幾覺, 佢都冇乜記數！

試過有位師兄, 想試試徐師父D功夫得唔得？ 徐師父叫佢放本電話簿在胸前, 然後一嘢打過去, 眼見師兄慘叫一声, 彈開成丈！胸口黑晒！好瘀！

徐師父話剛才我只用了三成力, 如用多DD, 你命仔都冇也ｏ（不過黃SIR見佢, 似乎用咗唔止三成力噃ｏ應該係十一分力就真, 事關飯碗, 名譽猶關, 豈能出錯？）

又試過有個鬼仔武痴, 在美國做緊大貨櫃車司機, 走來香港跟徐師學詠春ｏ（可能受李小龍影響ｏ）佢同師父黏手, 玩極都唔攰, 師父又唔好意思叫停（平日次次都係我地叫停, 話頂唔順, 佢先停手, 但鬼仔卻不知ｏ）

隔了幾日（我冇上去幾日）, 再見到鬼仔, 隻手紥住, 原來黏到甩佐臼, 你話同師父鬥, 會唔會出事？ 我就唔敢嘞！