我武維揚（四）

當年我已是在廠做工程師, 放了工就去武館, 約由五時許玩到八時,才回冢吃飯ｏ你咪以為我會練足三個鐘咁鬼勤力, 通常玩十五分鐘小念頭, 就同師傅黏十分鐘手（通常玩得十分鐘, 已攰到揪根ｏ）因為玩玩吓, 師父唔想玩, 就用小小力壓住你, 你綁得（綁手）两綁, 已經好鬼攰！（所以佢可以同所有學生親自教授！）

不過跟住D時間就非常快樂, 因為有成班師兄弟（約十數人）, 可以吹水（黄SIR至鍾意同人吹水ｏ） D人來自五湖四海, 有小學教師（大師兄）, 雜差（CID）, 工程師（小弟同葉家謨）, 工人, 貨櫃車司機, 鬼仔等等, 都有正當職業ｏ因為徐師傅根本唔收D來歷不明之人（我就是葉家謨介紹ｏ）有D古惑仔走上拳館想學,  我眼見師傅唔收！所以好放心係果處玩！第二D武館就唔敢包了！（我都算好彩了, 玩親都有班正正經經嘅人同我玩ｏ而家唱歌, 跳舞都係！真好命也！）

在武館, D師兄好多時都鼓勵人去踢人盤（打別派）ｏ我就睬佢都傻！有次有個揸貨櫃車嘅, 打斷咗隻手番泥俾師傅医！我訪問佢, 同边派打咁失威呀？誰知佢話, 條友都未學過嘢, 得鋪死力, 一嘢鋤落泥, 隻手就斷咗嘞！（嘩！又話詠春D綁手好叻嘅？乜一嘢就斷？咁綁都冇得綁啦！）

從此黃SIR就記住, 練習同應用, 根本兩回事也！所以黄SIR雖然身懷絕學, 也不輕易同人較量, 因為怕一嘢就斷……..