我武維揚（八）

在武館, 最歡樂的時刻是師傅去咗食飯, 成班馬騮作反ｏ有D學黃飛鴻（關德興）, 你班….馬騮, 我地…大家….今晚….一齊去叫鷄……….飯食ｏ（成班人笑到人仰馬翻！）

一有人上泥報名學拳, 由掌門人接見ｏ（即開門人, 黄SIR經常爭住做）如果見D紋晒身, 成個古惑仔咁, 就話師傅最近唔收靚, 叫佢留低電話, 趕佢地走！一唔係揾大師兄試吓佢, 睇吓係唔係想踢盤ｏ一個唔該, 詐帝失手, 打到佢地面腫口腫！仲敢再嚟！

不過有時有D武俠雜誌記者上泥收佗地, 咁就要師傅返泥至得！好多時都見師傅都有應酬吓佢地, 所以徐師傅口碑在武林都幾好嫁！（不過徐師傅人真係好好, 正正經經教拳, 從冇叫D徒弟去惹事生非！）

有時, 間唔中有個女仔上泥問學拳, 成班師兄弟就鬼咁熱情招呼ｏ可能太過熱情, 人地見成班色迷迷男人, 多數冇回頭！所以我一個詠春靚師妹都冇, 唔止冇靚師妹, 連普通師妹都冇！

不過奉勸各位女仕, 雖然詠春拳是女人拳, 但千祈咪揾男師傅學, 因為黏手要大家两手互縛, 有時甩手直衝（中正心口！練習梗係唔會用力, 摸吓就算！）, 就好易構成非禮罪ｏ近年有個詠春教頭被女學員告上法庭, 就是這個原因！