我武維揚（十二）

十八般武藝, 真係學一世都學唔晒, 如果奧運會除了西洋劍術比賽外, 另加十八樣武器比拼, 相信中國一定多攞十八面金牌ｏ

刀鎗劍戟, 實在每樣都有好大學問, 刀又分各門各派的刀術, 劍又分玉女劍, 君子劍, 太極劍, 娥眉劍等等, 加上武俠小說形形式式的描寫, 什么什么黯然銷魂劍, 华山論劍, 真係講十日十夜都講唔完也ｏ

舞劍作為一種舞蹈都很有睇頭, 而家在舞台上經常見到的劍舞, 依然很好看, 如果舞到出到雙劍就更顯功夫啦！

武器有所謂一寸長, 一寸強, 一寸短, 一寸險, 所以馬戰, 以関公的大關刀至叻, 張飛的丈八蛇矛也不俗, 成本三國, 至好打的人物, 呂布先生用的是方天畫戟都是以長取勝ｏ（三英也打不嬴呂布！）黃SIR最利害的武器, 亦都係戟（激！）, 周不時激到D靚師妹們喊晒果隻！

而埋身偷襲, 則以魚腸劍至利害（專諸刺吳王用之劍）而荊軻刺秦王用的匕首（所謂圖窮匕現）, 也是這一類ｏ

詠春八斬刀, 亦係短短的, 而六點半棍則屬長兵器, 至於五枚師太, 何以傳此两樣兵器俾嚴詠春, 成了詠春派至宝, 就請恕黃SIR才疏學淺, 無從稽考矣！