我武維揚（十一）

當年可能娛樂少, 很多人放了工就走上拳館學番三两度散手, 一來可以强身健體, 二來可以消磨時間ｏ

其中有位師兄, 每晚足足練上三四個鐘, 又不嬉戲, 一個人對住個木人𢰦打足成晚, 直情當咗個木人係佢女朋友, 十分痴纏！

佢學佐十幾年詠春, 真係乜都學鬼晒, 一耍起枝六點半棍, 真係生人勿近, 插你一嘢, 想唔死都唔得矣！两把八斬刀, 舞到出神入化ｏ不過果两把嘢, 都唔知可唔可以帶出街, 古古怪怪, 真係等拉咩？

呢D兵器我都費鬼事學, 有需要, 帶把鎗仲方便啦，！又輕巧！又易用ｏ你話打架, 周圍揾枝六點半棍夠難啦！八斬刀, 更加連買都唔知係边度有得賣？買枝鎗易過啦！

十八般武藝, 真係學一世都學唔完, 剩係個流星鎚, 我就練來練去都成日扑濕自已ｏ而李小龍的三截棍, 打就幾好睇！練就咪鬼搞我矣！

不過見D武俠片, 刀刀劍劍打起上泥都幾好睇, 我師父笑話哥（李少华師傅！我周不時開佢玩笑！收我做徒弟真是一個笑話）, 呢家嘢就最掂, 佢D徒弟好多都係電影界做武術指導, 上次佢返泥開演講會, 我同佢四圍去, 人人叫我師兄！都好有快感也！（笑話哥曾教龍劍笙, 梅雪詩, 林家声, 北派舞台表演藝術ｏ堅嫁！）