相人之術（眉尾散）

所謂眉尾散, 就財難聚！一個人聚唔聚財, 同眉尾散係咪真有關係,我就唔知, 但能夠有能力處理自已的財富的人, 一定要眉精眼企, 黃SIR就可以肯定矣！

相信一個烏吓鳥吓的人, （連自已眉毛都唔可以理順！）相信都好易被人呃晒D錢了, 一唔係就唔識得儲蓄, 有幾多, 散幾多！

財富如浮雲, 例如當年大陸乜錢都冇, 要發展就要求人借錢, 人民窮到燶！但一個唔該, D地又值錢, D國企又值錢, D民企又值錢, 連得個慨念（如阿里爸爸）都值錢, 真係想窮都難ｏD錢多到要排洪, 調到香港買貴晒D嘢, 而家香港人, 人人眉飛色舞, 聚財聚到死死吓ｏD師奶, 學生哥都話賺到笑！變晒做股神ｏ睇吓幾時, 股市一散, 就風吹鷄蛋殼, 財散人安樂ｏ

呢班人日日眉開眼笑, 眉飛色舞, 仲有鬼人理佢地條眉尾散唔散咩！

咁樣眉尾散, 財難聚, 將佢改為 股市散, 財難聚, 就FIT到漏油矣！所以如果閣下眉尾散, 只要股市唔散, 都未駛怕住！如果股市一散, 就算閣下條眉唔散, 我怕你地都會冚包散也ｏ

小心睇住個市呀！老友！就嚟散啦！