快樂的黑仔堅

十多年前我住在北角, 附近有檔報紙檔, 是一對中年男女開設的地檔,在一家酒樓外面ｏ

首先令我覺得特別的是, 男的見到我一定稱呼我老細, 有乜關照呀？（大佬, 買份報紙, 算乜関照呀？）女的仲跨張, 話靚（仄声）仔, 有乜關照呀？等我番屋企猛照鏡, 睇吓边一忽. 引倒佢咁稱呼我ｏ

後來大家熟了, 原來佢两人以前都係在旺角架步工作, 習慣了咁稱呼D客！

男的叫做黑仔堅（未必是黑社會, 𣎴過都紋晒身果隻ｏ）女的叫做亞容啩？黑仔堅成鬼日有嘢益我, 例如有一次我買了鄭文雅小姐的裸體集（一百皮）, 過了幾日黑仔堅話同我收番, 仲俾三百皮我, 原來已經炒到三百五十元, 佢執五十, 我執二百, 都好和味！

有次黑仔堅偷睇人地寄賣的賽馬貼士, 居然又關照我（佢認定我係斯文人, 好鬼專重我, 又例不爆响口, 所以有嘢就益我！） 我買重佢俾果D貼士, 結果一隻都唔中ｏ

但果D信封貼士, 次次都有威水版放在黑仔堅檔口, 據黑仔堅話原來多數係一封都冇賣過嘅, 就會出威水版！（冇人買, 所以冇人知佢揾笨！事後點作都得啦！中硬啦！）

後來據講黑仔堅都自製秘密信封貼士賣了ｏ（因為有時佢有D字唔識寫, 要問我！）

這位市井小人物, 多年來都可以快快樂樂生活, 我遷居後就冇見過佢矣！