新片爆肚嚇窒BabyJohn 譚詠麟：講明唔使跟對白！
2016/08/22 08:41:21 網誌分類: 娛樂
| 做人應該要向校長譚詠麟學習，永遠歡樂人生，我們相識相交三十年，每次碰頭總是無所不談，說到即將上映的新片《江湖悲劇》，校長笑言五年冇拍戲兼記性差，若不是導演監製講明任他隨時爆肚，也不會學人處男下海做「大佬」，「真係好嘢，明知我連開演唱會都唔記歌詞，竟然搵我拍戲，仲講明對白可以唔跟劇本，只要出嚟效果順就得，導演接受能力高，但就嚇親其他人，個個對手埋位都心驚膽跳，因為唔知我講乜吖嘛，哈哈！」 相隔五年重出「江湖」再拍電影，譚校長選擇了林超榮的黑色喜劇《江湖悲劇》，整部片盡是瘋狂抵死橋段，校長再三強調自己今次處男下海做大佬，還要邊演邊唱，Rap住埋位闖江湖，呢張入場戲飛仲唔抵買？校長笑言主題曲只有入戲院先聽到，第時未必有機會再唱，他說：「因為太多詞，我真係記唔到！監製同導演都真係好嘢，又係江湖片、又係喜劇、仲要係瘋狂幽默漫畫化嘅拍法，我從來沒演過，我諗係因為導演新，接受能力夠高，明知道我連開演唱會都唔記歌詞，竟然搵我拍戲！」唔講唔知，原來監製伍建雄、導演林超榮為求博君一笑，一開始便落足嘴頭????校長埋位，還要講明唔使跟劇本對白，任校長爆肚演繹。 用歌詞化解江湖恩怨 難得請到校長出山主演，主題曲當然要校長開金口，但意想不到的是，校長的金曲竟有化解江湖恩怨的功效，他說：「呢套戲除咗我同小春唱嗰隻主題曲，仲有好多音樂元素，我跟超人（林超榮）研究過，亦放咗好多首我啲歌落去，譬如有場卡拉OK戲，JoeJunior同修哥倆叔父講數，就用到『每次我撞親你』，最後都係靠我一句『雖比拼，合作踢走冷冰』打動佢兩個，就算喺江湖都係以和為貴嘅！」導演林超榮是文化、編劇界的鬼才，第一次做導演自然鬼主意多多，經常臨場改劇本，還要任校長玩爆肚，難怪校長笑言這種瘋狂互動嚇窒一班新演員，他說：「我喺戲入面做個唔想上位但又失驚無神上咗位嘅江湖大佬，因燈光、場景、對白處理都係用漫畫手法，拍呢套戲我同導演事前又通咗好多電話，佢話我就算唔跟劇本，講出嚟順就得，幾好玩，不過就嚇親套戲其他人，個個對親我都心驚膽跳，因為唔知我講乜吖嘛，哈哈！」 蔡潔交條命畀BabyJohn 戲中飾演校長契仔的BabyJohn坦言現場要識執生，校長爆肚要識接外，還要應對導演忽發奇想的鬼主意，他說：「導演急才好犀利，每個場口都會有好多新主意，然後就會同我哋玩，最記得第一日就要打，呢下最新鮮，場戲本來話企喺度對住班黑社會chok個pose就得，點知擺完pose轉頭話開打，吓？乜要打㗎？蔡潔仲要着短裙高踭鞋，我哋兩個即刻搵武指問點打？」講到呢場戲，蔡潔果然比BabyJohn更激動，她說：「我角色係個好熱血亦都好火爆嘅社工，為咗導BabyJohn呢位邊緣青年向善，自己亦變得好邊緣，場戲我仲激過BabyJohn，拍完嗰場戲我先知點解試造型時，導演不停問我對鞋跑唔跑得，因為着住對鞋根本停唔到，完全交咗條命喺BabyJohn手上，不過係開心嘅，導演好認真，任何細節都唔放過，所有地方都見到佢身影，會捉我哋一啲好細嘅位，仲可以遇到伍姑娘呢啲咁犀利嘅對手，佢好豪邁好真性情，幾細膽都俾佢lead到你放得開。」 談善言埋位學嘢 不說不知道，原來圈中有不少藝人跟我和校長一樣來自新會，校長隨口噏都有劉華、汪阿姐，還在片中新人談善言，同鄉自然要特別照顧，阿談坦言最精采係場場戲都對正老戲骨，真係企埋去都有嘢落袋，她說：「我演校長同三嫂個女，自細喺單親家庭長大，之後至認返校長，都好搞笑，我唔知爸爸係黑社會，但我係警察喎。導演超人好鍾意改嘢，同校長一齊更加Jam到好多火花，成日開工同我前一日睇嘅劇本都好唔同，但啲戲又Jam得好好睇，我最鍾意嗰場戲係校長瞓到昏迷咗，伍姑娘同三嫂鬥搶人，校長即場加咗好多嘢落去，真係好生鬼好好笑！」 |
 | |
| |
 | |
| |
 | |
| |
 | |
 | |
| |
 | |
| |
 | |
| |
 | |
| |
 | |
| |
 | |
| |
| |
 | |
| |
 | |
|
回應 (0)
我要發表
