《巨輪II》奸上位 趙永洪：成日被人鬧衰仔！

        若然你有煲開大台劇，相信你對趙永洪不會感陌生，由處境劇《同事三分親》至近期的話題作《巨輪II》都見他蹤影，沒錯，他就是那個衰到貼地的姚浩天，「最近出街真係畀人指住鬧，鬧我正衰仔！」趙永洪笑言觀眾能如此仇恨，足證他成功了，「其實現實生活中，我又唔係咁衰仔，朋友眼中我屬於搞笑份子，有一定喜感，玩會玩得好癲，有時間就會去做義工，可能監製都睇到我的喜感，所以早排《翻生武林》搵我演武林盟主，仲要係由我發揮，自由爆肚，相信觀眾會鍾意。」

        剛播完的無綫劇《巨輪II》掀起無數話題，當中除了久休復出的吳岱融被鬧爆禽獸外，最惹人憤恨的，一定是反轉豬肚的姚浩天，「第一集姚浩天係極度壞人，但第二集佢已改邪歸正，只可惜生活壓力迫人，為養妻活兒先會做盡壞事，我都覺得今次角色發揮幾大，劇本設定由奸變忠，踏實生活，改變過去，後來再因生活而迫不得已再做衰人，感覺上好矛盾。」趙永洪努力為姚浩天所作所為平反，不知大家有否因此減退對姚浩天的仇恨感。

        周街被指罵

        肥皂劇的忠角永遠討好，但原來在趙永洪眼中，《巨輪II》中最吸引他的竟是吳岱融飾演的大奸角高天鷲，「岱融哥啲戲真係好勁，直頭渾身是戲，一企出嚟已經好正，我都估唔到佢可以咁奸，係奸到出汁，好突出。」一個高天鷲，一個姚浩天，壞事做到盡，睇到班觀眾咬牙切齒，「最近出街真係畀人鬧賤人、衰仔，鬧我又老又醜！哈哈，某程度上畀人咁鬧係開心嘅，因你鬧我憎我，證明角色好成功，但其實我份人又唔係真係咁衰仔，自問心哋幾好，有時間就去做義工，為人都幾有正義感。」其實只要懂得把握機會發揮，哪怕是奸到出汁的角色，也是一個機會，看張家輝便知，當年憑《天地豪情》的大奸角Kelvin成功上位。

        演奸角深入民心

        藝訓班出身的趙永洪當年由路人甲做起，直至08年憑處境劇《同事三分親》中的Marco一角為人認識，「99年入藝訓班，都17年了，有時都想試下演好人，但電視好得意，若然你演奸角成功就keep住搵你演奸角，我其實唔介意做反派，因只要你做得好，觀眾自然鍾意你，睇吳鎮宇就知，到今日大家都仲好記得『?坤』這角色。」事實上，趙永洪努力爭取每個演出機會，電影上亦見其蹤影，繼杜琪峯的《三人行》後，早前更有機會跟偶像劉青雲演出《神行太保》，「真係要多謝導演監製畀機會，每次拍戲都有得着，《神》戲中我係幫古天樂辦事，好多時都會留守現場近距離向青雲哥偷師，真係好興奮。」

        新劇任玩夠瘋狂

        在熒幕前，趙永洪大部份時間演奸角，但熟悉的都知道他為人喜感十足，難怪獲監製欽點接拍新劇《翻生武林》，「有睇過《畢打自己人》和《同事三分親》的都知我可以搞笑，那時跟欣宜、祖藍合作，大家日日鬥爆肚，拍得好開心，可能因為咁，所以今次監製畀機會我發揮，其實《翻生武林》有點似當年《蓋世豪俠》feel，瘋狂得來有點胡鬧，戲中我飾演東廠富千戶，角色起伏幾大，被捧做武林盟主後，因跟人學青蛙功導致走火入魔，劇本本身寫得好好，骨幹實淨又有笑位，加上監製好大膽，講明角色對白任發揮，所以拍攝時經常爆肚。」

        主持：黃柏高
        統籌：林永匡
        協力：彭子僖
        攝影：袁東亮、謝民光
        場地提供：HMV