PACO名人會
PACO名人會
PACO名人會

主持節目提升品味 陳嘉容:做人要努力爭取!

2016/11/07 08:41:15 網誌分類: 生活
07 Nov

        名模陳嘉容Eunis一向是大家公認的智慧型美女,過去不時開辦專業培訓課程,傳授扮靚心得,今年初更為ViuTV主持時尚品味節目《VIEW》,走遍各界層面,介紹潮人玩物、高質素生活享受,閒時則會學法文打泰拳,這種勤奮又好學的精神特別值得新人學習!「多謝Paco!扮靚同保養係女人一世嘅事業,除此以外我也不會鬆懈自己,不斷自我增值。我覺得機會是留給有準備的人,做人一定要做好本份、裝備好自己,然後主動爭取。其實着幾多食幾多係整定,但係一定要努力爭取過先唔會後悔!」講得好,機會只留給有準備的人!

        主持:黃柏高
        統籌:林永匡
        協力:彭子僖
        攝影:李維隆、謝民光
        場地:Palcoristorante
        Hair:[email protected]'sPrivateiSalon
        Makeup:KamenLeung

        早已跳出模特兒框框的Eunis,今年初開始為ViuTV擔任時尚節目主持,轉眼半年,Eunis已完成26集《VIEW》節目的拍攝工作,因節目出街後反應不俗,電視台決定極速添食,據說新一輯還要衝出香港在海外拍攝,這一切,當然主持人Eunis有很大功勞。《VIEW》內容講飲食、講品味,我最關心的是甚麼時候拍一集有關酒的主題?「Paco每晚飲威士忌,我就鍾意飲紅酒,其實我都好想搵一集主題係品酒,可惜我哋個節目係合家歡時段播放,如果唔係一定要搵Paco嚟做嘉賓,因為說到酒,Paco才是真正的專家!」

        主持節目乘機偷師

        哈哈哈,專家不敢當,我喝酒很簡單,喝的是氣氛,每天晚上喝威士忌就是要放鬆自己,讓自己開心、舒服,第二天不會難受,要是頭疼又辛苦就太難為自己了。說到專家,我知道陳嘉容做了主持以後才是真的獲益良多,「係真嘅,呢個節目講生活品味,有靚車、名錶、服飾、音響,又有好嘢食,我都學咗好多嘢。男士嘢我平時接觸少,依家學識原來音響攞返屋企要煲要run,又原來聽歌有個皇帝位」就好像我們製作演唱會要有控制台一樣,要判斷將擴音器放在哪裏才能確保整個場館每個座位的觀眾都聽得清楚。

        身兼教職培育新血

        除了音響,還有哪方面得着呢?「當然是女士首飾啦!哈哈哈以前做Model,只知道漂不漂亮、有多少卡,只會戴。現在學習到珠寶品牌的起緣、歷史同故事,仲有每一件珠寶背後的設計、切割、顏色,學會很多知識。因每集節目要拍三個品牌,所以每星期都要花至少一日半拍攝,時間頗長,但每次拍完都好滿足,因可長知識,班crew又好錫我,成個過程我都拍得好開心,所以聽到第二輯要去oversea,去其他亞洲地方食好嘢、搵扮靚嘢,我就好期待!」

        我拍電影、做唱片,特別喜歡培育新人,給新人機會,Eunis跟我想法一樣,去年開始為知專教育學院擔任模特兒課程講師,致力為業界培養接班人,「知專係唯一一個政府認可嘅模特兒課程,剛完成第一屆課程,每屆畢業生都會有個比賽,上屆冠軍係一個5呎11吋嘅女仔,香港土生土長、擁有標致亞洲面孔,已經有模特兒公司簽咗佢做專業模特兒,睇住教出嚟嘅學生成為模特兒界嘅新血真係好有滿足感!其實呢一代嘅年輕人真係好幸福,我哋以前得嗰十堂課,八堂行catwalk、兩堂教化妝,仲要永遠都係夜校。依家學生除咗呢啲仲可以學儀態、有專業人士教體態訓練、有導師教演技,課程仲包括學溝通,教點應對記者!」其實以我的經驗,應對記者很簡單,就是一個字:真!甚麼都好,講真話就可以,不會回答就跟他們說不會答,說完他們就不會煩你了。千萬不要假裝、自作聰明加甚麼進去是錯的。

        保養絕不能偷懶

        最後一定要問問Eunis,為甚麼每次見面,她的身材都一樣好、外型一樣漂亮,氣質不用說更甚從前,可以跟各位女士分享一下保養之道嗎?「其實都係老生常談,均衡飲食、保持運動。我唔係嗰啲淨係食菜飲水嘅人,健康需要均衡飲食,脂肪、澱粉質、蔬菜都需要攝取平衡,不過一般冇約朋友唔出外應酬,我八點後都唔會再進食,避免脂肪積聚。另外做運動,我保持每個星期至少三日,每次半小時至一小時運動,前提係一定要出汗。其實運動量不用大,重點係年紀愈大新陳代謝愈慢,做運動目的係保持新陳代謝。其次係保持愉快正面嘅心境,這都好緊要,除咗要keep住一個工作量、成日搵嘢嚟學自我增值,工作後我成日都會飲紅酒、浸住bath、聽住Jazz放鬆自己。以前做人會好多計劃畀自己,年紀漸長、聽人講得多,其實好多嘢真係隨緣,最緊要係努力過爭取過,如果努力咗都得唔到,咁咪算囉!」說得沒錯!很多人說我總是開心、保持正面,道理一樣很簡單。我也會遇到困難和問題,有問題的時候就要盡快解決,心態一定要正面。其實說得容易做起來難,但是世事自有他的鋪排,就好像一套電影都有命一樣,它有生命帶領我們找到最適合的人,努力過就好,這次合作不了就下次囉!
        
 
■Eunis 笑言若不是主持節目,也不知為何男人對音響玩得如此着迷。
■Eunis 笑言若不是主持節目,也不知為何男人對音響玩得如此着迷。
■《VIEW》節目層面廣泛,衣食住行乜都有,Eunis感激製作團隊的愛護。
■《VIEW》節目層面廣泛,衣食住行乜都有,Eunis感激製作團隊的愛護。
■Eunis一有時間就參與義工活動,早前便跟隨明哥等人去送飯。
■Eunis一有時間就參與義工活動,早前便跟隨明哥等人去送飯。
 
■Eunis去年開始為知專教育學院擔任模特兒課程講師。
■Eunis去年開始為知專教育學院擔任模特兒課程講師。
■Eunis坦言人生可以好簡單,任何事盡力做便好,無需太強求結果。
■Eunis坦言人生可以好簡單,任何事盡力做便好,無需太強求結果。
■Rosemary告別單身的party上,Eunis索爆現身。
■Rosemary告別單身的party上,Eunis索爆現身。
 
■工作再忙,Eunis也堅持運動,早前更學人操拳耍劍。
■工作再忙,Eunis也堅持運動,早前更學人操拳耍劍。
■Eunis在節目中探索不同層面玩意,當然唔少得超級跑車。
■Eunis在節目中探索不同層面玩意,當然唔少得超級跑車。
回應 (0)
我要發表
user