PACO名人會
PACO名人會
PACO名人會

《嬉春》聖誕重演 詹瑞文領軍派笑彈

2016/12/19 08:41:13 網誌分類: 生活
19 Dec

        舞台劇《嬉春酒店》去年慈善公映贏盡口碑,今年於12月22日至1月1日在理工大學賽馬會綜藝館載譽重演,找來戲劇大師詹瑞文助陣,令整個劇昇華,詹sir笑言接演這劇有兩大原因,「首先係大部份人都以為我唔識同人做戲,為畀觀眾睇下我點同唔同經驗質素嘅演員合作,於是提議搵兩位美人合作;其次係原著劇本出自法國好有名的GeorgeFeydeau,中文係『費多』,即係廢話特別多,心諗既然這劇本有咁得意元素,就等我好好去做『費多』這個經典法國浪漫偷情動作喜劇。」詹sir這天率領一眾演員接受訪問,笑談合作過程,大家你一言我一語,笑聲不絕,想知道伍姑娘伍詠薇如何被詹sir調教成高質偷情人妻,就要買飛入場睇!

        一個劇能載譽重演,必有其吸引力,《嬉春酒店》round2找來戲劇大師詹瑞文助陣,實在令人期待,舞台劇再添食,角色上自然要大執位,冧莊再上的伍姑娘說:「去年三月我們做了十場,監製見反應口碑咁好就話不如開part2,但男主角就試吓搵舞台劇專業人士,一搵就搵到這個咕嚕(詹瑞文),直頭係神級大師,加埋向海嵐小姐。」詹sir聞言即說:「講嬉春,伍姑娘最有經驗的,成日都嬉春,對手我都係要搵頂級的,起碼都要有香港小姐、亞洲小姐,仲有少年警訊代表,我真係睇嘉華哥做體育世界大,今次呢個戲真係睇肉㗎,哈哈。」林嘉華緊接回應:「最主要都係咁,去年我做嘅角色係今年伍姑娘這角色嘅老公,我驚頂唔順要避,因佢今次嘅突破性比平時演嘅角色堅,加埋個劇神詹Sir,真係無得傾。」

        林嘉華開竅

        為增添喜劇元素,詹sir刻意黐兩撇鹹濕鬚及增加調情動作,務求貫徹其惡搞形象發放笑彈。演戲經驗豐富的林嘉華大讚詹sir這總監十分稱職,「今次一路排戲一路畀詹sir提點,加埋陳淑儀導演一夾,無得傾,令我這幾十年所有功夫來一個突破,因好多人都會覺得,演了一段咁長時間的戲,塑造或想拿揑一個角色,必須鑽入去,今次再被詹sir尖一尖篤正竅門,那個光門一篤,自此開竅,跟我過去演過的都變得光亮。」

        至於新加入、飾演潑辣老婆的向海嵐笑言演這劇全因詹sir之名,「我本身都有留意這劇,因我自己平時好文靜,今次演這角色就覺得挑戰好大,希望給人一種不同感覺,能跟詹sir合作好開心,真係學到好多嘢,埋位排戲前,詹sir捉住我和伍姑娘做了好多唔同練習,今次夾雜好多專業舞台劇演員,希望跟原著劇本去做,唔會有太多爆肚,詹sir教我好多技巧,如讀對白嘅聲線速度。舞台劇無得NG,特別係第三場開始就無機會返後台睇劇本,一路殺到尾。排戲前我和伍姑娘都擔心話要回家背劇本,但詹sir話唔使背的,其實你知成部戲前後,對白自然會入晒腦。」

        伍姑娘享受被捽

        伍姑娘亦說:「今次挑戰第二個角色,上次演惡妻就手到拿來,今次偷情就難,因你不能太外露件事,偷情係咪要做到大家expect嗰樣嘢呢?原來係唔需要,偷情要好笑得來又要騷在骨子裏,究竟點去偷情好歡愉又可以令觀眾好想睇你去偷情,大家可能會覺得偷情的衣着會好性感,但實情又唔係,這女人衣着好密實,但男人見係會幻想佢着透視裝,那種性感點去拿揑呢?詹Sir今次日日捽,埋位排戲前會幫我和向海嵐執,因我哋都係電視電影演員,跟舞台劇不同,佢會無私地教我哋,好濃縮地用一個月教我們演戲,真係好享受,我雖演了廿年戲,但我從沒受正統訓練,這雞精班絕對係可攞9A。」

主持:黃柏高
統籌:林永匡
協力:彭子僖
攝影:張詠森、謝民光
Makeup:miss5(伍詠薇)
Hair:[email protected](伍詠薇)、[email protected](向海嵐)
場地:潮薈
Accessory:ARTE(伍詠薇)

 
■《嬉春酒店2016》有詹瑞文這位戲劇大師助陣,令整個劇昇華,爆發喜感,觀眾真係要買飛入場支持。
■《嬉春酒店2016》有詹瑞文這位戲劇大師助陣,令整個劇昇華,爆發喜感,觀眾真係要買飛入場支持。
■林嘉華大講有味笑話,笑指這次獲詹sir篤開竅門,讓他「光門」大開,令伍姑娘笑不攏嘴。
■林嘉華大講有味笑話,笑指這次獲詹sir篤開竅門,讓他「光門」大開,令伍姑娘笑不攏嘴。
■詹瑞文坦言這次要瞓身演繹這部浪漫偷情喜劇。
■詹瑞文坦言這次要瞓身演繹這部浪漫偷情喜劇。
 
■伍詠薇笑言這次把自己的身體完全交託給詹Sir,兩人早前在記招上借位親熱,笑爆全場。
■伍詠薇笑言這次把自己的身體完全交託給詹Sir,兩人早前在記招上借位親熱,笑爆全場。
■向海嵐這次十分投入演活惡妻一角,令人眼前一亮。
■向海嵐這次十分投入演活惡妻一角,令人眼前一亮。
■伍詠薇大讚詹sir的雞精速成班十分精采,讓她演得更放。
回應 (0)
我要發表
user