鄭丹瑞自編自導自演的《小男人週記》屬港人回憶，從電台廣播劇到後來搬上大銀幕，「小男人」梁寬的故事一直深入民心，故事延伸至30年後的今天，梁寬終於挾着女神周秀娜回歸，今個賀歲檔上演《小男人週記3之吾家有喜》，旦哥說：「眨眼三十年，今次再拍《小男人》，大家都問我搵邊個女神演？我個人沒掩飾對周秀娜嘅喜歡，作為演員，佢嘅可塑性好高，而角色亦好多層次唔容易演，既係上司下屬關係，又係秘密情人，戲中少不免有親熱戲，泡泡浴唔夠又整場牀上戲，仲要去裸泳、咀嘴，唔係話我有周秀娜就場場寫呢啲，好多謝佢對我嘅信任，亦做足100分，當然如無周秀娜將男人幻想提升，係會失色好多。」
主持：黃柏高
統籌：林永匡
協力：彭子僖
攝影：張詠森、謝民光
Hair：MilkCheng（鄭丹瑞）、AmberTse@QueensPrivateI（周秀娜）
makeup：MilkCheng（鄭丹瑞）、CircleCheung@ndnco.co（周秀娜）
Wardrobe：Threefloor@Runway_workshop（周秀娜）
場地：hmvkafe
鐵定賀歲檔上映的《小男人週記3之吾家有喜》確實讓人期待，繼27年前的續集《錯在新宿》後，梁寬終於回歸，「其實梁寬經過這廿幾年去咗邊呢？故事講梁寬老婆當年帶埋個女去台灣，梁寬為????老婆女兒回家，決定努力工作，但原來努力工作需要放低尊嚴，直至老友大蠱惑送打海鹽畀佢，教佢要將『樽鹽』放低屋企，一言驚醒，於是梁寬放低尊嚴發憤搵錢，結果發咗達住大屋，亦有個好靚嘅女朋友，但大屋一面鏡都無，因佢唔能夠面對自己、唔敢照鏡，佢已經唔認得自己，直至有日個女返嚟搵佢，梁寬要點同個女相處呢？呢個女又會點幫Daddy搵返尊嚴呢？今次就係想寫呢個戲。」
多謝娜姐信任
故事聽落有趣，睇埋Trailer就更吸引，皆因有你我至愛的女神周秀娜瞓身獻媚，「我一話開拍第三集即刻有人問今次會搵邊個女神？因第一集開始已經有鍾楚紅、李美鳳，第二集有關之琳，更別提我有個鄭裕玲做老婆，今集我有周秀娜；作為演員，我沒掩飾對周秀娜的喜歡，老實講佢電影經歷唔多，但唔知點解day1已覺得佢好做得戲，之前佢拍《分手100次》拿揑得唔錯，所以今次角色會有好多個層次，佢唔係嚟呃梁寬感情嘅女人，好strong但又好小鳥依人，好多謝周秀娜對我嘅信任，因呢個女主角少不免同男主角有親熱戲、性感戲，如果大家全程着住衫行嚟行去，出嚟件事唔真實，而周秀娜從無問我半句係咪想博懵，睇完劇本就知道每場戲都係需要嘅，仲做足100分。」真係要多謝旦哥為我們爭取福利，這絕對係一部代表香港男人嘅幻想兼心聲，「哈！又真，如無周秀娜將男人個幻想提升，會失色好多。」
旦哥呻浸浴唔好玩
實在不能不問，究竟旦哥出甚麼絕招能打動周秀娜，讓她在戲中如此投入演出？娜姐聞言不禁笑說：「其實聽到《小男人週記3》已經?飯應，因為第一二集都好經典，而BoBo這角色好可愛，跟我自己和過去演的角色性格好唔相似，所以好想試；第三次跟旦哥合作，感情進步咗好多，戲裏亦有好多親熱場面，我最擔心唔係香艷場面，而係無嘢食，因好多戲都無乜衫着，要keepfit。今次學到好多嘢，尤其係一啲細緻位，有時未必要用對白講出嚟，可能係一個情緒或眼神、動作，對住佢就會學到更加多。」說到浸浴缸一幕，旦哥即大呻浸到皺皮，他說：「我哋好錫娜姐，天氣凍落水一定要熱水，結果工作人員不斷加熱水入缸，我哋兩個喺入面就好似真係焗桑拿咁，焗咗三個鐘，成身泡，我哋兩個情意綿綿對望時就望住對方標汗，所以你話有冇情趣？我以為可以挑戰鄭伊健《分手100次》嗰幕，但其實原來唔好玩㗎。」
Larine身世相似
至於前世情人，旦哥選了年僅19歲的鄧月平Larine，參選ViutTV《美選D.N.A》節目入行的Larine坦言因自身經歷贏得這次演出機會，她說：「casting時，Daddy（旦哥）問『我點解要畀呢個角色你？』我就諗得五分鐘時間要點先可說服佢呢？於是我分享了自己的故事，因外界對我的認知只係身材，我亦因為身材受到輿論，這點我係介意的，我就話佢聽，其實除了身材，我仲有經歷，正正因我的經歷跟戲中的喜喜有點相似而被選中；Daddy係快狠準導演，一直帶領住我去做戲，畀我知道乜嘢係拍戲。」旦哥表示過去的經歷能讓Larine表達出那種真實質感，更把她拍攝中段胃病入院一幕放進電影。 | 
