仔仔返幼稚園

政府規定2歲8個月先可以讀3歲班, 所以上年9月得2歲6個月冇得讀住。由於仔仔有我呢個咁強勁既媽媽, 係小學英文註冊教師兼英文全部基準達標, 仔仔冇上PLAYGROUP。事實上我教過PLAYGROUP不過見到D小朋友都係扭計呀等放學呀, 佢地鐘意老師就會聽, 唔鐘意自然唔聽, 話咩拼音班呀果D... 26個字母都識唔晒, 認唔掂, 讀唔識, 拼咩音丫, PHONICS已夠唔掂, IPA符號佢地咁細點記丫? 上網聽下ABC歌好過。

推介卡通: TWIRLYWOOS, KIWI, 不過電視已冇播。仔仔近來睇BOB THE BUILDER, 我陪佢睇, 解釋D比較常用既英文……近來電話個上網PLAN轉左, 手機駁電腦快過返粉嶺上網添呀! 尋日我就DOWNLOAD左好多YOUTUBE既卡通英文歌, 最好係3D公仔, 最好有跳舞既~ 仔仔睇得好鐘意、好開心。

仔仔8月28號開始返學, 返到去拎名牌、坐低、玩玩具, 然後點名、去廁所、食茶點、放學。頭幾日我陪佢, 課室咁多家長緊係逼, 我發現仔仔係咁拖住我都唔似其他小朋友咁唔使人拖既... 不過我明。我成日話, 出到街拖實我, 我拎野或者揾野時, 佢就要COOL住我腳, 等D人唔可以「偷BB」。當然之後有講, 嚮學校, 尤其嚮課室, 有老師睇住, 冇人偷BB既(應該)。佢慢慢習慣, 第4日玩玩具時老師話我可以出走廊睇, 又OK喎, 最緊要訓夠, 同返學途中唔好太倦（唔好行咁多跑咁多）。茶點呢, 佢唔多食喎, 因為平時已夠揀飲擇食架啦。蛋糕、曲奇餅就有食既。多數一放學就俾魚仔餅同維他奶, 趕得切既話做左早餐先(始終作息時間有待調整)。

講起作息時間, 仔仔好勁! 暑假完結前佢都仲係11PM, 12PM咁訓, 有時零晨訓(你估我想架? 有人等爸爸放工等到咁夜)。不過為左「返學同媽媽一齊整手工」, 返學前佢都乖左早D刷牙訓覺, 然後又好好彩D老師都幾啱傾, 我個純種HONG KONG BABY一口流利廣東話仲識D英文, 老師應該幾鐘意。真係估唔到, 全班得佢係純種HONG KONG BABY?

最後冇一齊整手工, 不過佢好鐘意返學, 好鐘意老師, 只係唔想放學, 唔想返屋企 XD

我出左個邪惡絕招架! 嚮屋企扭計, 收玩具: 「要玩玩具就返學先有得玩架啦!」

千祈唔好話返學學野, 千祈唔好話返去讀書, 千祈唔好話要識多D字賺多D錢。太遙遠~ 我識咁多字讀咁多書到頭來咪又係住嚮D爛屋 (香港樓市係咁架啦, 唔係有人錯, 係社會錯)。所以, 最緊要係有學習既熱情, 相信學習係輕鬆愉快, 而且唔限於嚮學校 (我嚮屋企既教學時間其實都幾多架, 仲多過佢返學, 佢一早就習慣睇英文卡通- 唔係谷佢, 係佢真係鐘意D公仔, 慢慢佢讀講野, 講埋英文詞語, 我話SIT DOWN, THIS WAY, THAT WAY, HERE, THERE, UPSIDE DOWN, SLIPPERS, REVERSE... 佢都識聽識解。字母係好多未認到, 唯有慢慢黎啦。至少佢聽到ABC歌會跟住唱下咁。

我個仔學野算快, 人講完, 佢就跟住講。不過漫不經心係咪男仔既天性? 佢需要大量肢體活動, 呢D由佢爸爸陪佢做啦。我係教學既, 管理既, 計劃既, 而佢爸爸係執行任務既。終於取得平衡。

仔仔返學之後, 7點幾就自己識起身, 好勁! 唔知下星期加埋食飯時間會點, 然後後星期仲要嚮學校午睡, 希望佢掂。我相信, 因為佢既作息時間極速自我調整左, 仔仔非池中物也!!! 只係之前我欠缺挑選幼稚園既技巧, 有次幼稚園面試咁啱仔仔嘔左, 唔係就可能可以有純種HONG KONG BABIES做同學啦。依家雞同鴨講咁, 佢D同學仔係普通話人... =.= 而我真係唔想同D家長傾計囉, 年紀、背景、語言太唔同。我俾唔到仔仔最好既機會, 我唯有繼續俾仔仔最好既軟件- 一個識揾教材、識教好佢既媽媽。

最重要係我有個活潑開朗又聰明既仔! 不過超級扭計。