山聰鮑姐攬住等死 胡定欣:展鵬人性大逆轉

熱播的無綫重頭劇《同盟》，本周三(13日)就會大結局，最終Bigboss─Rainman身份日前亦已揭盅！今次好高興能與劇中三位主角胡定欣、姚子羚和陳山聰傾「拍劇經」。愈打愈勇的定欣、首度拍打戲的子羚，以及暖男山聰，三人破格演出人氣急升！倒數結局篇，梗要捉實主角率先爆料，山聰謂臨尾有一幕攬住母親(鮑起靜飾)等死，場面催淚。定欣就爆對手陳展鵬最終人性大逆轉，她說：「展鵬都有變㗎！會幫Rainman對付至親。」ending高潮迭起，真係要晚晚追。

一講《同盟》，大家除了會激讚首度拍大台劇的鮑姐(鮑起靜)演出精采，亦會即時諗起胡定欣加展鵬，以及子羚配山聰兩pair人。四位花旦小生人氣急升，定欣飾演的女保鏢阮清欣，行為瘋狂但又好可愛，網民好like。定欣說：「我好鍾意呢個角色，劇中我同展鵬由搗蛋二人組，到經歷許多生死關劫，互生情愫。嚟緊兩人能否happyending呢？大家記住睇。我拍呢套比去年拍《城寨英雄》打得仲多。今次多咗MMA、巴西柔術等，好似同展鵬就有以MMA過招，動作難好多，好彩武指郭師傅(郭追)教得好好，又會按我哋能力去度啲動作，拍得辛苦但好有滿足感。」

完成打戲好滿足

由頭打到尾的山聰亦非常同意，仲試過打到全身濕晒，西裝縮水，他說：「記得有一場喺停車場嘅打戲，我一個打六個，有幾部機一齊拍，連打十幾招一鏡直落。嗰度好熱，打完後成套西裝都濕晒，縮埋水?！不過喺郭師傅身上學到好多嘢，完成晒套動作，真係好滿足好開心。」講到動作戲，近期熱話莫過於日前一場子羚困車廂「一打四」的車戰戲，外表弱不禁風的子羚都話係人生一大挑戰，她笑說：「場戲出咗街後畀人惡搞，我都開心嘅，代表多人留意嘛！嗰場戲真係我入行以嚟首場打戲，我着短裙和高跟鞋，全程半踎狀態，架車又冇冷氣，都幾辛苦。好怕一踢出去個踭篤親人！仲因為唔識就力，拍完雙手和腳瘀晒，要補粉再拍。」

        發掘演員「小宇宙」

        成功製作一套收視好又受歡迎劇集，幕後功臣功不可沒，《同盟》是監製文偉鴻(Jazz)繼去年炮製「最佳劇集」《城騫英雄》後又一力作。定欣和山聰都激讚監製勤力又夠眼光，兼夠膽發掘演員的「小宇宙」。定欣大讚：「Jazz嘅諗法和拍攝手法獨特創新。我好欣賞佢夠膽要求演員為套劇，演一啲同演員性格完成唔同嘅角色出嚟，準確發掘演員連自己都唔知道嘅潛質，勾個「小宇宙」出嚟。」

        暖男山聰上位

        打戲係賣點，而子羚和山聰在劇中飾演的Kent&Kate，生於兩個家庭對立的大家族，最終無懼兩家矛盾，譜出「羅密歐與茱麗葉式」的淒美戀曲，山聰由此至終對子羚一條心，暖男形象上晒位。山聰亦話有些場口好感動：「其中向Kate求婚嗰幕，印象最深。」同子羚的感情戲好sweet，山聰對養母的真摰情感亦表露無遺。本周結局篇中，山聰大爆其中一場必睇位，「有一場我對付緊bigboss要救鮑姐，我哋兩母子攬住想一齊死，啲對白好催淚，一攬鮑姐就互望想喊，但監製話『唔喊得，要用另一個方法演』，好考功力㗎！」定欣亦忍唔住劇透話，「展鵬都有變㗎！會幫Rainman對付佢阿媽(鮑姐)。」連乖仔子杰(展鵬飾)都臨尾變節，劇情峰迴路轉，萬勿錯過。

        黃柏高