儲局兩難

2017/11/23 09:36:41 網誌分類: 經濟

23 Nov

週三亞洲股市繼續造好，但歐洲股市就顯著回落，其中德國DAX指數跌1.2%，法國CAC跌0.3%，美股跟外圍走，杜指回落0.3%，收23526點；標普500指數微跌0.1%，納指受到亞馬遜支撐，逆市微升0.1%。

聯儲局昨日公開最近一次的議息會議紀要，顯示與會官員對於美國經濟增長表示樂觀，他們一致認為美國在勞動市場、消費者開支和製造業都有穩健的進展，但也開始擔心股市價格正步向失控，並將危及美國經濟。

會議紀要提及「面對資產價格的升值以及金融市場波動率低企，部份與會官員表明了他們對金融不平衡狀況正逐步形成的關注。」至於，對於美國通脹的步伐上，官員們卻有不同意見。不過，他們均認為如果國會通過了稅改，降低企業稅，情況會改善。

Charles Schwab的首席固定收入策略師Kathy Jones則認為，聯儲局正陷入一個兩難題。他們想要加息，因為憂慮資產價格持續上升，出現泡沫並爆破。但同一時間，他們又未能推升通脹。

不過昨日出爐的美國經濟數據並不理想，美國10月耐用品訂單下跌1.2%，遠差過市場預期的增長0.3%，而最近一周的首次申請失業救濟金人數為23.9萬人，略少於預期1000人。

事實上，市場分析正在擔心的仍是那個正在惡化的息差趨平的問題，美國短期息率，包括3個月期、6個月期、1年期及2年期都升上9年新高；3年期為8年新高，5年期為8個月新高，而長債10年國債息率有回落現象，由10月26日的高位2.477厘，跌至昨日的2.321厘，至於30年期更跌至逾兩個月新低，而10年期及2年期的利差縮減至不足60基點的10年以來新低。

美國已進入加息期，理論上，由於加上時間因素和對於加息的預期，長債息口升幅的速度應該比短債的高，但現實卻剛剛相反，長債息口升得少而短債升得多，結果令到長短期息差收窄。

我為什麼在這裡多次提及息差趨平的問題，只要睇睇近幾十年美國經濟（GDP）增長與息差的關係，會發現差息（即美國10年期國債和2年期的息差）其實可以看到GDP走勢的領先指標。1985年底，息差由高位一路下滑至1989年初底位，而美GDP增長則由1988年初開始下滑至1992年初的底部，之後回升；另一波是由1993年，息差一路下滑至2001年1月，而GDP增長亦於差不多時間開始下跌，至2002年中觸底反彈；第三波的2004年至2007年，而GDP增長率亦由2004年開始回落，跌至2010年的谷底。

最近一浪的息差下滑由2015年展開，到今天已跌至10年以來最低。雖然現時的息差仍未收窄至前幾浪的水平，但分析員擔心的是美國經濟看似強勁，但生產力循環、債務商循環、商品循環已經接近尾聲，經濟以至大市的轉折點即將來臨。

事實上，用諾貝爾經濟學得獎者席勒（Robert Shiller）指出的「席勒 CAPE 本益比」 (Cyclically Adjusted Price-Earnings Ratio) 這個指標睇美股後市，亦不容樂觀。所謂「席勒 CAPE 本益比」由簡言之，係用來判斷美股是否過於昂貴的指標。目前，美股的「席勒 CAPE 本益比」高漲到超過31，已經僅次於1929 年大蕭條和 1990 年代後期網路泡沫崩盤前的高峰。（不過，席勒最近接受 CNBC 採訪時也表示，儘管美股看起來很貴，但不會鼓勵投資人大舉拋售。）

就算如果用比較保守的估值方法計算，美股依舊不便宜。據 FactSet 統計，把標普 500 的股價與未來 12 個月盈利預期相比，目前的預估市盈率為 17.9 倍，分別高於過去五年和十年均值的 15.6 倍和 14.1 倍。

但短期而言，美股仍然順勢炒上，大家可以話又驚又要炒，若經濟唔掂，可能要一年半載才反映出來。

陸羽仁

回應 (13)

我要發表

animal666 2017/11/24 06:40:54 回覆

A股領跌暗藏換馬
2017年11月24日

　　恒指升破三萬點，有中環茶友諗起97金融風暴時股樓齊升嘅繁榮，茶友居安思危，市場都有類似睇法，恒指破關而上，回吐壓力即時增加。港股噚日早上仲勉強想再撐上，但下午就頂唔住，指數急插，重回三萬點樓下，跌因主要係內地股市回挫，滬指出現年內最大單日跌幅，港股跟跌之餘，手機設備股插得特別多。

　　北水圍炒大股風吹港

　　恒指呢次破關而上，特別係側埋一邊而上，主力係推高騰訊(700) ，最多係炒多隻平保(2318) ，連騰訊親生仔閱文(772) 、契仔易鑫(2858) 都唔係咁炒。呢種圍炒大股手法甚有北水味道，可以睇到港股受內地資金影響不斷增加，例子之一係內地熱炒晶片股，唔少內地資金落嚟加倉買中芯(981) ，如果講技術水平同產品競爭力，中芯暫時只係算一流尾、二流頭公司，但內地資金炒作國產芯片未來會取代外國貨，講緊涉及產值以千億美元計，所以中芯粗粗地都炒上左。

　　內地大炒芯片股，除左憧憬未來芯片會國產化，同時炒作美國科網股資金轉移。現時美國科網股五強(FAANG)，包括蘋果、谷歌等公司估值已經太高，相比下技術含量高、有半壟斷性嘅優質晶片股估值相對吸引，所以資金開始轉移。內地資金有樣學樣，於是大炒晶片股。

　　蘋果概念股成沽貨對象

　　睇到呢個趨勢，就明白噚日午市急回，而且手機設備股跌得又急又快嘅原因。內地股市慢牛向上，滬綜指升破3400點後，基金經理開始有唔同睇法，部份繼續持倉，部份就開始減持同重新配置資產，所以指數升破咗呢條心理線後就出現拉鋸，出現技術性調整。

　　睇番中港兩地股市表現相似，但A股就先行一步，滬指午後曾經由半導體板塊帶動走強，但未能突破高點後索性插番轉頭，深成指、創業板指數跌幅雙雙擴大。滬指收市仲創左年內最大單日跌幅，上證指數收報3351點，跌左78點，幅度等同2.3%。

　　恒指跟跌，收報29707，跌左295點；國企指數收報11737，急跌221點，成交1359億元。平保升得急，跌得快，急挫3.8%，報收80.9元。騰訊下滑1.7%，收報419.6元，親生仔閱文本來想趁好市反撲，彈過上95.2元，可惜頂唔住回吐大浪，收市升左0.6元，報89.15元。

　　九倉置業(1997) 以介紹形式新上市，可惜時間慢左啲，變左冇乜鑊氣，早盤見過54.5元，收報50元，磚頭股唔當炒，所以暫時唔建議撈底。

　　以A股目前估值，似回調唔係大跌，但大市上上落落，大戶足以上下其手，移燈搬櫈，準備執過位、起過風。噚日蘋果概念股係跌幅靠前嘅板塊，唔排除呢個係基金開始為來年投資調整資產配置所引發。本地嘅手機設備股，雖然嚴格嚟講唔完全係蘋果設備股，但都好依賴蘋果去推動市場，所以噚日跌得特別厲害，好似舜宇光學(2382) 回調近3.7%，收報141.3元；瑞聲科技(2018) 跌幅更超過4%，收報169.5元。呢啲手機設備股估值唔平，如果之前冇賺過錢，依家都無謂去博嘞。

　　陸羽仁

2017/11/23 16:40:06 回覆

momopig：得閒一齊研究下~ 有時間多啲來我屋企睇睇，睇下有冇邊隻啱心水買下~ ${#iconb_62}$