樂易玲選角有諗頭 吳卓羲勇救梁烈唯好感動
2018/05/07 08:41:10 網誌分類: 娛樂
現於myTVSUPER熱播的邵氏網劇《飛虎之潛行極戰》,由TVB高層樂易玲監製,以及一眾型男吳卓羲、黃宗澤(Bosco)、梁烈唯和「三哥」苗僑偉等主演,內地點擊率直逼17億,樂易玲大讚劇本好、與導演合作有默契,最重要是搵到一班好演員演出。她不諱言吳卓羲和黃宗澤的演技有進步,吳卓羲表示15年冇同Bosco合作,大家做對手戲真係拿捏得好到位。與吳卓羲有感情戲的陳凱琳(Grace),則表示有幸參與此劇,因怕演得唔好,事前做足功課。而梁烈維首次演反派就花了很多時間揣摩角色,幸好出來的效果令人滿意;不過維維覺得最感動是拍攝期間撞車倒地一刻,吳卓羲的窩心表現令他非常感動。 《飛虎》講述年輕時加入警隊的吳岱融,混入黑幫做臥底,為了破案,他假意搭上黑幫頭目女兒伍詠薇,但他早已訂情於龔慈恩。在一次黑幫廝殺中,吳岱融除去伍詠薇的黑幫世家。身為他好兄弟的「三哥」苗僑偉知道兩人私情,並有私生子黃宗澤;而龔慈恩亦為吳岱融誕下吳卓羲。 夏天拍好辛苦 兩個同父異母的兄弟,在成長中積累不少矛盾。一天,官至高級警司的吳岱融現身升職典禮,原來已步入計劃了30年的復仇大計中。現時該網劇在內地的點擊率直逼17億,亦將於下周一在翡翠台播出。 跳橋親自上陣 身為監製的樂易玲表示:「呢套劇一定係sell肌肉、汗水、英雄、有型,同埋我哋係以電影製作方式去拍,其實劇本未度好我已經搵咗卓羲、Bosco、三哥、唯誰同王敏德等演員,一切都好順利。」她回想三哥曾表明夏天唔拍劇要歎世界,到應承拍時又話唔可以着重裝備的衫,但最後見到full-gear的造型咁有型,又話熱都要着,結果大家在30幾度的氣溫下拍攝,樂易玲續說:「其實真係好辛苦,因為都有好多人中暑,所以好感激大家。」 吳卓羲表示夏天拍劇雖然辛苦,但當知道拍出來是一套有電影感的電視劇時,絕對是好開心和好興奮去拍。提到已有多年沒有與黃宗澤合作,他坦言:「以前理解劇本或角色時係好初步,𠵱家長大咗,演技都成熟咗。」劇中他最難忘是在電車打鬥場面,「我比較手長,郁吓已經撞到啲扶手,所以唔係畀啲武師打腫,而係打落啲欄杆度腫晒,之後又要跳天橋,其實全部都係我自己跳,係我自己爭取,起碼拍嗰陣時個樣都大啲吖!」 償演反派心願 梁烈唯飾演的反派Kenny似有精神問題,並覺得殺人是藝術,唯唯參考了外國演員如JohnnyDepp和小丑角色去揣摩,他稱笑出嚟要令人有心寒的感覺。而今次是他首度演反派,「以前好多時啲監製或導演覺得我個樣咁細個邊似反派,多謝樂小姐畀機會我,亦多謝造型師幫我諗咗個咁正嘅造型。」提到最深刻一幕,是意外被車撞到倒地,當時有位男演員令他非常感動,他笑言:「如果我係女仔就嫁畀佢,嗰個就係吳卓羲,因為佢真係好正,我同佢同場,當我瞓咗喺地下,佢老遠喺花槽跳落嚟衝埋嚟問我有冇事吖?唔使驚嘅,冇事嚟!跟住佢去指揮交通,驚啲車睇唔到我,係咁話讓開讓開,好真情,唔怪得咁多女仔鍾意佢,我指fans啫。」 溫習三季美劇 而Grace在劇中飾演法醫,為此她特登煲了三個season的美劇溫習一下。今次她與吳卓羲有感情戲,她稱:「我哋係第一次合作,之前都見過,因為我哋媽咪都認識,呢個就係我哋嘅緣份。」她稱最深刻是吳卓羲向她表白和用廁紙整花求婚那場,真的很感動。另外女演員還有龔慈恩、王敏奕和伍詠薇的表現都好出色,樂易玲說:「龔慈恩對住兩兄弟講嘢,用咗好多內心演繹,超乎想像;王敏奕係唯一一個女飛虎,做個男人婆,但好可愛,同Bosco嘅關係做得好好;伍姑娘靚得嚟令人心寒,氣場好勁。」聽到咁精彩嘅演出,一定要捧場。 主持:黃柏高 統籌:林永匡 協力:李佩儀 攝影:袁東亮、謝民光 樂易玲化妝:HenryLi 髮型:DY@HairCorner 服裝:Marella 吳卓羲化妝:MarshaMa |
| |
| |
| |
| |
| |
| |
| |
| |
| |
回應 (0)
我要發表