油國增產

2018/06/13 08:18:48 網誌分類: 經濟

13 Jun

歷史性的美朝峰會順利舉行，對股市無大刺激，週二美股輕微高開之後回順，全日在窄幅中波動，三大股指再次以接近平手離場。杜指微跌不足2點；標普500指數微升5點；納指表現比較好，升43點，升幅0.5%。

拖累大市的主要是能源股，標普500指數中能源板塊跌0.8%，在11個板塊中表現最差，主要係受油價下跌拖累，紐約期油昨日微跌0.25美元至66.11美元。油價雖然在最近幾日由63美元樓下回升，但比較5月21日的高位72.59美元，仍然下跌近9%。油價之所以受壓，有報告指係美國要求石油出口國組織（OPEC）中的老大沙地增加石油生產以填補因美國重新對伊朗制裁造成的缺口。本月22日，OPEC洲成員國將於維也納召開石油峰會，決定是否放寬石油的減產。不過，昨日有消息指沙地的石油生產最近在5月已每日增加了16.1萬桶，令到月產量超出每日1000萬桶，接近在2107年11月減產協議的上限。

OPEC昨日表示，最近的發展，令到「今年下半年的情況出現顯著的不確定性。」據OPEC的講法，「環球性的貿易壁壘重新出現，加上在全球貨幣緊縮政策的環境下，持續增長的債務水平以及資產市場的波動越來越大，已造成對今年下半年的負面的挑戰。」OPEC調升今年非OPEC產油國的石油供應量13萬桶，將高於2017年水平186萬桶，這意味著全球對OPEC的需求每日要減少33萬桶。與此同時，OPEC維持全球石油需求量每日9885萬桶的預期不變，較去年每日增加165萬桶。又表示，不會對石油需求的增長超出預期抱有期望。

聯儲局昨日開始了一連兩日的議息會議。看聯邦利率期貨交易數據顯示，交易員預期聯儲局今日宣佈加息0.25厘至1.75厘至2厘區間的機會為96%以上，市場已做好加息的心理準備，所以焦點已轉向聯儲局今年會加多少次息，12月加息，即今年共加四次息的機會為40.6%。消費物價指數（CPI）5月份按年升了2.8%，係2012年2月以來最快，而扣除食品及能源的核心CPI則按年上升0.2%，年增率為2.2%，與聯儲局加息的2%目標差不多。

不過，市場對於聯儲局會否加息4次，仍有分歧，主要係局內有人認為經濟將會增加動力，但也有人認為經濟仍未足夠強勁去支撐更高的利率。再加上近日美國和西方國家的貿易戰風波，似有越演越烈之勢，這也解釋了市場認為12月加息的機會只有五五波。

陸羽仁

回應 (12)

我要發表

animal666 2018/06/14 06:36:46 回覆

中興內傷無謂博
2018年06月14日

　　美國總統特朗普同北韓領導人金正恩會談，雙方會後發表聲明，無乜驚喜亦無乜料到，本來呢個係預期之內，所以美股無乜反應。不過美國佬定一定神，就開始柴台，質疑特朗普俾人「過左一戙」，初步睇嚟兩大政治騷高手過招，特朗普為求有成果先鬆一章。

　　特金會有得威無錢搵

　　特朗普同金正恩埋枱傾，最後無宣佈韓戰結束，美國主流輿論受精英控制，唔太畀面，認為特朗普攞唔到嘢，開始出現噓聲，之後聽到總統話停止美韓軍演，反彈之聲仲大。

　　有中環茶友話，美國從來都係好戰份子，O依家乜都未有就話唔軍演，咁美國啲過期武器點搞先。共和黨係軍火商戰略夥伴，從來無話要和平不要戰爭，若然話連軍演都唔使搞，咁日本南韓仲使乜買武器？特朗普可能太想喺歷史留名，所以俾肥仔金攞左好處。

　　雖然O依家北韓好似佔左少少便宜，但茶友話大家唔使擔心，因為對特朗普嚟講，反口唔係問題。今日佢先攞左威，做左歷史大騷，明日可以推翻晒所有承諾，所以大家唔需要咁認真，所以話半島和平，真係長路漫漫，有排未到終點啦。

　　特金會呢啲政治騷，對美國佬嚟講係出風頭但搵唔到錢，唔似搞吓俄羅斯、搞吓中國可以攞到着數。好似美國制裁中興通訊(763) ，搞完一輪至少罰左佢10億美元。中興休克後醒番，復牌股價唔見左42%，收報14.96元，基本上佢由開市就插低，無乜點反彈過。有中環茶友問佢插得咁殘，係咪已經反映左佢俾人罰10億美元的壞消息呢？言下之意係咪可以趁佢大插兜底呢？

　　通常如果好似中興呢啲公司急插，一般都會有反彈，但今次佢俾美國佬玩得好傷，而且仲有好多後遺症。表面計數，佢俾美國罰款數字，等如係一年利潤。未俾人罰之前佢做緊15倍市盈率，被人罰完如果股價無變，咁咪做16倍市盈率啫，但O依家跌到11倍市盈率，感覺真係好抵買，但如果諗深一層，就唔係咁簡單。

　　首先，中興俾人罰左一年利潤，以佢原先估值大約跌6至7%已經足夠反映，但佢今次俾人罰，係因為同伊朗呢啲受制裁國家做生意，佢俾人打完屁股，相信都唔敢再嚟，而呢啲國家生意可能本來利錢最深，所以佢利潤好有可能會減少，令佢估值再跌。

　　不過，美國最辣係要求撤換管理層同派人監管公司。經此一役，相信新管理層都唔敢咁進取做生意，最重要係俾美國睇住，你話佢會唔會俾你做大做強，以至於賺大錢呢？所以從牌面睇，中興今次達成和解協議，只係能夠保持生存條件，但唔死一身孱，可見將來都好難賺到大錢，皆因美國已經盯上呢間公司，覺得佢係一間戰略上不能讓佢壯大的科技企業。從阿爺嚟講，保住中興叫做保住5G優勢，賺錢與否已經唔計較得咁多。

　　從技術層面睇，中興擁有一定競爭力，客戶唔易搵到替代供應商，一般人唔係咁易搞得死佢，但O依家係國家之間的角力，情況又有啲唔同。對中興小股東嚟講，未來最好係國家將中興私有化，但呢樣嘢應該短期唔會發生，O依家個價亦唔算好低殘，所以如果從投資角度講，有咁多股好買，睇唔到點解一定要博佢。

　　小米好事近　拉唔郁騰訊

　　十個牛皮九個淡，中興爭取到復牌，但就撞正個市回落，港股尾市跌幅加大，恒指收報30725點，下挫377點，國企指數收報12035點，跌170點，成交只有844億元。雖然市傳小米上市好事近，CDR反應唔錯，但科網股騰訊(700) 仍然受壓，跌0.5%，收報415.2元，反而晶片股繼續熱炒，中芯(981) 急升4.6%，收報11.28元。

　　陸羽仁

2018/06/14 06:08:42 回覆

2018-06-13

Dow Jones Industrial Average (^DJI)

25,201.20 -119.53 (-0.47%)