古星輝 - 5G體壇盛事連連 | 乜都5G

5G高速低時延，用於關鍵任務、救急扶危，當然無懈可擊，而應用喺講求速度嘅體育盛事，一樣錦上添花。

　　試諗吓，邊個入球先，邊個衝線先，有時真係千鈞一髮，雖然目前已有好多先進設備，可以幫裁判作準確決定，但5G喺體壇嘅應用仍然有好多空間。

　　最近板式網球大滿貫就成功喺香港舉行，吸引咗來自世界各地嘅隊伍同選手參加，人數創新高。公司把握機會，為呢個首次喺香港舉行嘅大賽擔任5G流動網絡合作夥伴。

　　好多人未必聽過板式網球呢種運動，佢可以話係羽毛球、壁球及網球嘅混合體，據講𠵱家喺歐洲除咗足球外，係第二受歡迎嘅球類運動。

　　賽事喺西貢嘅戶外場地舉行，要主辦方為咗一兩日嘅賽事而申請拉線真係唔容易，呢個時候5G流動網絡正正能發揮作用！我哋喺賽事期間，為大會提供專屬5G流動通訊服務，等大會可以即時即場應用俗稱「鷹眼」嘅視像輔助球證（VAR）系統，有助提升裁決嘅精準度及球迷體驗。

助板式網球大滿貫舉行

　　今次將5G應用喺本地體育賽事，可以話做咗一次好好嘅示範。5G應用可以有幾廣泛，視乎大家幾有創意。

　　上周本港政府宣布購入巴黎奧運嘅轉播權，今日已進入少於100日嘅倒數階段。據講今屆奧運係首個採用電子數碼門票嘅奧運會，而且係開幕式及比賽期間有好多地方會採用5G，例如支援為視障人士而設嘅平板電腦，等大家可以一同實時參與奧運。

　　據聞法國當地嘅電訊商，幾年前已經開始喺唔同嘅奧運場館加強5G網絡覆蓋，希望喺呢項國際盛事一展實力。就好似將會喺塞納河畔舉行嘅巴黎奧運開幕式，預期有30多萬名現場觀眾參與，對於突如其來嘅海量數據需求，電訊商的確要早作準備。

　　另外，塞納河畔本身係聯合國教科文組織嘅世界文化遺產，要喺兩旁加放電訊設備提升容量唔容易，電訊商為咗將各種臨時電訊設備巧妙融入四周環境，大家都要各出奇謀。

　　對於未來喺本地或國際體育盛事加入更多5G元素，大家拭目以待！

和記電訊香港執行董事及行政總裁
古星輝