古星輝 - 世界流動通訊大會4大看點 | 乜都5G

上周筆者到西班牙出席國際科技界盛事世界流動通訊大會（MWC），處理公務之外，當然把握機會遊走不同場館，一覽未來5G科技最新發展。上次與各位提及5.5G綠色合作計劃，今次就分享一下MWC內發現嘅4大看點。

無人咖啡車隨傳隨到

　　無人車係5G其中一項話題應用，一間內地無人車生產商於場內展示一部與意大利咖啡機生產商合作嘅無人咖啡車。客戶只需在手機App落單，咖啡就由無人車送到手上，佢更可以設定喺特定時段到指定地方開檔，流動性極高，成功示範無人車應用於零售業嘅方案。

捲曲螢幕概念機登場

　　可捲曲螢幕技術日漸成熟，兩個品牌展示捲曲螢幕概念機，喺MWC成功吸睛。由韓國品牌展示嘅一款更可進行基本操作，唔止係模型咁簡單。既可以拉直當普通手機，又可以捲起來穿上手腕，實在係屈機示範作！

穿戴式裝置大行其道

　　MWC內有兩個穿戴式產品，令筆者留下深刻印象。首先是有號稱顛覆iPhone嘅「AI Pin」，憑着一個扣針外形，上網、通話等功能外，更植入GPT-4人工智能，內置投影機可以將資料投射在手掌，配合不同手勢操控。亦有韓國品牌展出一款集合不同測量功能嘅智能戒指，為用家貼身留意身體健康指數。

摺疊螢幕手機普及在望

　　去年有廠商指將於今年推出中檔摺疊螢幕手機，一個內地品牌於場內展示一部中價路線5G摺機，外形規格絕不失禮，其日本版售價約3000元，估計國際版售價相若。預期年內有更多中檔5G摺機面世，屆時換機將有更多選擇。

和記電訊香港執行董事及行政總裁
古星輝