古星輝 - 5G機械人拓藍海 | 乜都5G

5G速度快、時延低，幫助實現機械人等智慧應用。日前外電報道蘋果研究進軍家用機械人市場嘅消息，甚至已成立秘密部門，專注開發家用機械人產品。雖然報道表示即使落實開發，該款家用機械人至少十年後才能面世，但消息一出已令全球果迷興奮及期待。

應用範圍日漸廣泛

　　內地亦十分看重機械人產業，於2022年已發布《「十四五」機器人產業發展規劃》，目標在2025年成為全球機械人技術創新策源地。未來機械人於工業自動化中將扮演重要角色，有市場研究報告表示，現時全球約有350萬個機械人，另一報告估計2024年工業用機械人市場規模為425.9億美元，預期2029年將達到798.7億美元，期內複合年增長率13.4%。

　　喺3月底到4月呢段時間，內地舉行連場機械人大會，甚至有人話呢個係內地嘅機械人月。當中打頭陣嘅首屆「中國具身智能大會」，請來全球專家為機械人應用開始不同研討，大會名稱中嘅「具身智能」係指將人工智能整合至機械人當中，加入感官及溝通能力。現時幾間內地公司分別發布人形機械人，以「應用牽引、場景驅動」為發展方向，希望於3年內推出1000項應用示範。

　　機械人應用已經唔係平日喺餐廳傳菜、運送餐具此等「雕蟲小技」。月前日本外賣平台於東京推出AI送餐機械人，透過自動駕駛、遠程控制及自動感知等功能，將美食送到客戶手上。內地電動車生產商更表示引入超過700個機械人，幫助加速生產流程應付市場需求。至於香港方面，智慧機械人陸續出現於不同行業，上回同大家介紹過嘅電力公司「智慧管家」就係其中例子，喺5G網絡配合下，可以喺密閉隧道全天候巡邏同監察。

　　另一方面，Tesla創辦人馬斯克嘅人形機械人Optimus已亮相多時，網絡上亦有大量資料及影片，最近透露希望可於明年發售，到時勢必掀起熱話。

和記電訊香港執行董事及行政總裁
古星輝