9~14/9 止跌回升+超賣反彈

2020/09/09 21:25:13 網誌分類: 經濟
09 Sep

港股急挫秒殺肥牛即彈, 醞釀反彈, 部署屠熊

9/9 周三恒指收報24469, 跌155點, 國指跑輸恒指

由8月尾開始, 老外就急急腳密密沽A股走鬼, 內地股市本周暴跌, 走勢差劣, 上証本周收跌已無懸念, 按照中港股市同步的慣性走勢, 港股本周會跟跌, 周五會收24695/9884之下, 不過今日港股出現利好訊號, 未來兩天不會全跌, 多數會係1升1跌,反彈阻力24650~24800, 如受阻而回, 就要再尋底

過去兩個月恒指通常連升1~2日就會重拾跌勢, 市弱反彈上去吃1~2口熊就會再落山尋底, 如果未來幾日上攻吃3口熊大市仍能高企不下, 又或者升穿本周高位24908, 就打破了頂部下移的劣勢, 代表大市已見短底, 如受制於24908及25000, 就會破底

踏入9月, 港股就反覆急跌, 由31/8高位25847碌到落今日低位24213, 累計下跌1634點, 以往見頂回落, 最多回吐1000~1300點就會止跌回升, 但今次卻反常地下跌逾1600點仍未見反彈, 可能係因為中美股市急挫, 港股沽壓大, 本周由淡友主導大市(早前估本周港股收跌), 亦有可能係大鱷詐死, 想等多些淡友熊熊入局才反手挾淡, 好友留力下周初才推升, 大鱷要在下周三晚聯儲局議息前推升, 因為議息後匯債多數變天,

今日港股出現多個利好訊號, 1) 港股續挫, 但vhsi 恒指恐慌指數收跌, 唔驚 2) 恒指收陽燭, 近全日高位收 3) 內地股市暴瀉, 但港股跌幅不大 4) 夜期大幅高收, 為今個月首度出現 5) QQ低見$501.5, 守得住$500關鍵大位 6) 個別指標股出現見底訊號  7)沽空急增, 有挾淡誘因

測市指標釋出利好訊號, 港股正在醞釀反彈, 何時彈高就要看上証, 當上証觸底回升, 港股就會轉勢向上, 回顧今個月港股兩天收升, 當天上証都係升市, 中港股市係同步飛天遁地, 港股不會獨自破底落地獄

港股已失守所有平均線, 走勢雖然弱, 但中港股市有阿爺及大媽睇場, 亦有大鱷操控大市上落, 大鱷唔鍾意炒單邊市, 喜歡玩急跌急淡, 好淡通殺, 不要忘記24500~24900係過去兩年恒指的底部, 不會一去冇回頭,港股月線雖弱, 大方向要向24000.23800進發, 但短線超賣正醞釀反彈,唔少指標股正在築底,呈利好訊號

~~~~~~~~~~~~~~~~~~~~~~~~~~~~~~

24500神奇大位穿梭

早前已解釋過24500係神奇大位(詳細分析可重溫舊網誌), 跌穿理應會有似樣的大反彈, 9月上旬恒指連跌兩周,回吐幅度已經夠水位俾淡友大鱷轉身, 插到落24200水平估值吸引, 長線投資者或會趁低吸納, 就算短炒博死貓彈亦有水位, 淡友或會回補空倉

過去7日港股5跌2升, 而且係跌幅大.升幅細, 股民一買即艇, 博反彈頻頻止蝕, 令唔少好友都死心, 甚至變了淡友, 當全城看淡造淡, 就係港股反彈之時, 因為大市陰陰跌, 彈散及急挫震走了好友,股民止蝕,利淡氣氛亦誘使淡友入局, 當出現利好消息, 好友大鱷就會借勢挾升

港股雖然連日下跌, 但亦不應太悲觀, 有上証及大媽做後盾, 港股死不了, 回顧過去8個月恒指每月的升跌日數, 無論該月收升或跌, 收升日數最少都有9天, 如今只係升了2天, 代表9月下旬升市日數會增加, 如跟今年的慣性走勢, 餘下的15個交易日, 最少都會升7天, 即係下星期每周要升2~3天, 就算9月係由淡友主導, 打個折扣, 未來兩周都會升5天吧!

大鱷用拖字訣在24500神奇大位穿梭, 高位派貨, 震落去低位就收貨, 消耗好友的購買力, 貼價牛熊命危, 好淡通殺, 今日上証大跌61點低見3238, 回顧上証7月企3200, 恒指就守到24000, 而且每次插穿24500神奇大位都能彈番上去

~~~~~~~~~~~~~~~~~~~~~~~~~~~~~~

險守24167

港股連日下跌, 當人人向下望24000~24300的肥牛, 今日低見24213, 大鱷未食光肥牛就急彈, 其實以往大鱷試過唔食晒肥牛, 打擦邊球食少少牛, 然後彈上去屠熊, 放生老牛, 當食飽肥熊, 新牛入局及上移, 又會再插落去屠牛, 因為如果大鱷隊穿8月低位24167屠牛就要付出沉重代價, 破位觸發斬倉止蝕盤會令跌勢加劇, 回顧7月見頂26782後, 8月見底24167就急彈, 今次港股的跌浪只要只要扮守得住24167, 技術上仍未破位, 就可吸引(騙?)買盤進場, 幫手推番大市上去, 大鱷就可在高位派貨

睇下國指表現就知道破位斬倉殺跌的威力, 國指於4/9低見9774, 連環插穿8月低位9909及7月低位9789,破位的斬倉止蝕盤令跌勢加劇, 向6月低位9612進發, 國指1/6上升裂口在9579~9768不容有失, 如全數回補就會拖累恒指插穿24000, 向23800.23500進發

今日現貨低見24213, 冇插穿8月低位24167(日市期指低見24142已破底,但夜期冇再穿底,利好), 國指現貨亦已跌穿7月低位, 好明顯係上証拖低國指, 國指禍及恒指, 換句話說, 港股要等上証觸底回升, 才會作出反彈,

9月開局以來港股就一路碌落山, 接連失守所有平均線, 走勢差劣, 中美股市正是拖低港股的元兇, 不過中美股市一向有無形之手托市, 每次大插後都識彈, 港股往往死唔去, 本來看淡9月, 但跌勢這麼急卻是意料之外, 不過9月上旬見短底, 反而有利反彈,彈完再落去做第二隻腳都得

目前恒指高低位24213~25254, 按照慣性走勢,如該月收跌,就會在該月下旬創新低,屠牛及擴大月波幅,不過淡友要有利淡催化劑做助力才能殺跌

港股好少月頭跌到落月尾,恒指及上証已連跌兩周,國指連跌四周,近年國指連跌四周例彈,預示下周初或會止跌回升,先行作出反彈, 不過下周二三聯儲局議息, 股匯債必定會大幅波動, 要有兩手準備, 博反彈不要太進取, 要趁死貓彈減磅

侵侵頻頻出陰招為競選造勢, 民調急起直追,老拜登後勁不繼, 如果天要滅美, 侵侵就會連任, 不過有財演做過統計, 美國總統選舉前3個月美股跌到趴街的話, 代表華爾街大鱷不滿現任總統, 所以散水, 係美國將會換帥的先兆, 無論侵侵能否連任, 未來3個月金融市場必定會風起雲湧, 散戶要及早作出部署, 且戰且退, 趁反彈減磅,否則成手蟹走唔到就大鑊, 不過以侵侵的性格, 是不會容許美股落地獄, 所以趁美股急瀉短炒博反彈係有得諗, 美股係升過龍, 反艇是合理, 不過港股24500/9700價殘具吸引力, 短炒博反彈有值博率

~~~~~~~~~~~~~~~~~~~~~~~~~~~~~~~~~~~~

恒指月線的啟示

過去幾個月港股反覆上升, 其實恒指早於7/7已見頂26782, 7/8碌到落去24167結束第一浸跌幅, 隨即展開反彈浪, 31/8見頂25847後展開第二浸跌幅, 既然8月係底頂下移, 9月就不可能守得住8月低位24167, 除非大鱷跟8月高低位24167~28547炒上落, 兩邊都唔爆

恒指月線底頂下移尋底

7月 24527~26782
8月 24167~25847
9月 23XXX/24213~25254或受困於8月高低位24167~28547, 兩邊都唔爆

港股過去兩個月跌下彈下, 大鱷營造利好氣氛, 扮跌唔落, 好友以為升浪未完, 會上26500, 甚至更高, 中伏了, 恒指連升3個月, 散戶博反彈往往能獲利, 習慣了候低買上, 結果過去兩周買到成手蟹, 大鱷成功於高位派貨, 偶爾突然急挫逼好友斬倉止蝕, 大鱷就可在低位收集, 再推番上去, 好淡通殺

31/8見頂25847後, 踏入9月恒指連續兩周約在24200~25200的千點內游走, 大鱷貨多未派晒, 暫時唔俾破底

港股8月見頂25847/10495, 展開尋底之旅, 港股何時觸底回升就要看BDI, 當BDI止跌回升, 重拾升軌, 港股亦會跟住上, 到目前為止9月高位在25254/10068, 總係覺得如果25254是頂就未免太低, 因為以約1600點月波幅來看, 豈不是要低見23650水平? 但港股有大媽護盤, 上証低位有阿爺睇場, 除非美股出事, 否則24167/24000/23800已見支持力, 9月會否做細月波幅, 待10月才插水呢?

{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}

港股沖高回落, 秒殺小熊即回, 倒跌收場

10/9 周四恒指收報24313, 跌155點, 國指跑贏恒指

大鱷用拖字訣在24500神奇大位穿梭, 本來估計今日彈高, 但受內地股市拖累, 港股由升轉跌, 但要來的始終要來, 由於上周恒指違反慣性走勢只升了1天(通常升2~3天), 而以往恒指好少連續兩周都係升1天這麼少, 所以估計本周會升2天, 目前本周只升了1天, 尚欠1日升市,

只要QQ守住$500,代表大鱷仍想守住24000, 繼續在24500穿梭, 只要消化沽壓, 熊熊下移, 港股就會彈高,

昨晚夜期高收, 加上其他測市指標都釋出利好訊號, 昨晚美股急彈, 今日港股理應收升, 但上証午後插水就拖累港股倒跌收場, 今日收升落空, 明日有望補漲

期指未平倉合約縮減, 可能有淡友食胡, 短炒一周期權的大鱷通常會在周三四五食胡, 所以港股的每星期的高/低位多數在這三天出現, 昨日(周三)低位24213有可能係本周低位,

QQ係港股溫度計, 今日QQ低見$506, 冇跌穿昨日低位$501.5, QQ見底, 港股見底, 正路明日港股及QQ都不會創新低, QQ如能上企$520, 利好, 下一個阻力在$540, 只要穩住QQ, 就可托起港股, 淡友要等強烈利淡消息才能殺跌破底,

本周恒指做了695點波幅, 符合細周波幅的要求, 今日老外沽滬A股力度減弱, 並連續兩日掃入深A股, 可能係趁低吸納, 預示內地股市即將反彈, 由於中港股市係同步見底, 只要明日上証冇破底, 有利港股反彈

今日上証創新低3227, 但港股冇跟隨破底, 大鱷繼續玩擦邊球, 不但冇殺24000~24200肥牛, 反而衝上山屠貼價小熊, 今日港股雖然收跌, 但低見24293, 冇跌穿昨日低位24213, 係好現象, 大鱷托住港股等上証見底, 到時就會齊齊反彈, 9月上旬月波幅24213~25254, 只得約千點月波幅, 遠遠未達標, 於9月下旬就會邊爆來擴大月波幅, 

~~~~~~~~~~~~~~~~~~~~~~~~~~~~~~~~

周線底頂下移

美元回落, 人民幣反彈, 利好, 只要好友守得住上月低位24167, 技術上未破位, 就可吸引(騙?)股民入貨買上, 短炒淡友亦會食胡回補空倉, 繼續玩24500穿梭遊戲, 不過以9月開局後每周底頂下移的走勢, 下周就要跌穿昨日低位24213, 市弱反彈上去吃1~2口熊就會再落山尋底, 今日閃上24615已吃了一口熊, 如能上山吃3口熊, 代表市況好轉, 不過整體牛熊分布係牛肥熊瘦, 會拉住港股後腿

由於中港美三地股市通常係同步見底, 下周會否隊穿24213就要由美股.上証及QQ指揮, 目前上証及QQ觸底回升尋頂中, 下星期走勢非常關鍵, 要看能否打破底頂下移的劣勢

按照慣性走勢, 尋底市每周都會有新低, 上証及美股三大指數同步連跌兩周, 由炒爆了的納指領跌, 拖累港版納指連跌, 下周能否轉勢向上就要看中美股市

踏入9月份, 恒指周線呈底頂下移尋底格:

第一周: 24488~25847
第二周: 24213~24908

第三周: 24xxx~248XX (下周會否破底要看中美股市)

{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}

港股高開高收呈陽燭, 結束兩連跌, 部署屠熊

11/9 周五恒指收報24503, 升189點(最多上升259點, 一度下跌20點)

~ 科技指數結束六連跌, 連跌斷纜利好, 有助下周初推高港股

~ 港股今日弱彈, 可能係引淡友入局, 待熊熊下移, 大鱷就會踢上去開大餐

~ 下周四有新科技指數ETF登場, 發行商要入貨,會推高股價及大市

~ 上証綜指先低後高, 單日轉向, 跌勢喘定, 止跌回升, 利好港股

~ 上証創新低3220, 但港股冇跟隨破底,

~ 恒指由8月高位25847碌到落周三低位24213, 累計下跌1634點, 不會彈百幾點就收工, 今次超賣反彈幅度未達標, 仍有上升空間, 多條平均線在24600~25000水平, 阻力非輕

==========================

周三港股出現利好訊號, 今日果然止跌回升, 科技指數結束六連跌, 皆因大媽趁低吸納, 掃QQ.美團等新經濟股來護盤, 下周QQ/上証尋頂, 港股亦會跟隨尋頂, QQ如能突破$520, 進一步突破$540, 代表港股跌勢暫告一段落, 如受制於$540, 就會拉住港股落山

恒指由8月高位25847碌到落周三低位24213, 累計下跌1634點, 通常一個大跌浪見短底, 不會彈百幾點就收工, 今日沖高回落, 可能係詐死引淡友熊熊入局, 今次超賣反彈幅度未達標, 仍有上升空間, 下星期走勢非常關鍵, 如能上破本周高位24908, 就可打破底頂下移, 每周創新低的劣勢, 如受阻而回, 就要繼續尋底

反彈阻力: 恆指24650~24800,國指9800, 港股沽壓未除, 老外繼續沽A股撤退, 內銀弱勢持續, 拖低國指, 股民成手蟹, 港股全靠大媽護盤支撐,

由於中港美三地股市通常係同步見底, 下周會否隊穿24213就要由美股.上証及QQ指揮, 目前上証及QQ觸底回升尋頂中

貝萊德旗下 iShares 安碩恒生科技 ETF 將於9月17日(周四)在港交所掛牌上市, 發行商要掃入相關股份, 有助好友於下周初推高大市

{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}

港股兩連升繼續屠熊之旅

14/9 周一恒指收報24640, 升136點, 國指小幅跑輸恒指

未來幾天能否突破上周高位24908是關鍵, 港匯走強, 人民幣強勢連升3天, 利好中港股市, 一直想唔通為何9月首兩周港股跌得這麼急, 如今見人仔愈走愈強, 我不禁懷疑係淡友想在15~16/9聯儲局議息前做低港股, 因為議息後匯債禍福難料, 所以9月開局就拿拿臨殺跌

恒指由月初的底部下移陰陰跌變為[底部上移暗暗推升], 大市尋頂中, 貼價熊命危:

14/9 24556~24751
11/9 24293~24572 (展開反彈)
10/9 24293~24615

09/9 24213~24521 (創9月新低後拗腰)
08/9 24341~24785
07/9 24475~24908
04/9 24488~24814

中美股市於上周創新低27447/3220後展開反彈, 由於中港美三地股市多數係同步見底頂, 中美股市冇再創新低, 所以港股亦唔使破底, 只要明日恒指續升, 就打破了7/7見頂26782後最多兩連升就斷纜的弱勢, 不過要上企24800才能確認大市回穩

近日港股窒窒步升, 收市升幅不大, 我估係因為牛肥熊瘦, 拉住港股後腿, 所以大鱷扮上升乏力去震走好友牛牛才爆上, 大鱷亦嫌24800~25300熊唔夠肥, 所以陰D陰D升, 目的係震牛養熊, 俾時間熊熊入局, 向上阻力24800/24908/25000, 由於中港美三地股市係同步見底頂, 港股何時見頂就要看中美股市及QQ, 要留意科技指數強弱

~~~~~~~~~~~~~~~~~~~~~~~~~~~~~~~~~~~~~~~~~

<匯港通訊> 螞蟻集團擬於10月中旬進行 A+H 上市,傳計劃集資規模逾300億美元(逾2340億港元),有望超越2019年集資逾290億美元的沙地阿美,成為歷來最大新股集資。螞蟻申請上科創板下周五(18/9)審議

農夫山泉將會於9月21日收市後被納入恒生綜合指數、恒生綜合行業指數-必需性消費、恒生綜合大型股指數、恒生綜合大中型股指數,以及恒生消費品製造及服務業指數。即有望入港股通

美國周日20/9起禁線上平台分發 TikTok 及 WeChat

美國對華為制裁將於15/9生效

TikTok 將由15/9起被禁制與美國公司交易,甲骨文就 TikTok 美業務建議有效期至9月20日

聯儲局將於9月15~16日(周二三)舉行議息會議, 通常股匯債都會有異動

16/9蘋果公司產品發布會

9月份仍有多隻成份股未除息, 會拖累期指呈低水,

周五(18/9)美股四巫日結算, 內地股指期貨結算

最新回應

中國加油
中國加油 2020/09/19

水滴石穿
水滴石穿 2020/09/19

https://www.goldbuginvest.com/uncategorized/uselection-leftright/

動盪的開始?美國大選爭議不斷 / 左右內鬥擴大

美國大選,不足60日就要舉行!從各方分析,包括玄學星象、政經社會等,都顯示今年的大選將會帶來社會動盪,超越近代歷史的任何一屆。關於這次大選,身為美國公民的馬田已分析了大半年,他電腦顯示特朗普會勝出,但無論那一方勝出,都不會接受選舉結果,將導致社會衝突及暴力。

。。。。。。

目前由民主黨、自由派、左翼主導的媒體民調,絕大多數都顯示拜登將勝出選舉,跟馬田預測情況相同,但似乎天道運勢偏向特朗普一方,就在離大選不足兩個月的9月18日,美國最高法院大法官金斯伯格 (Ruth Bader Ginsburg)突然過世,他是克林頓時期委任,美國著名自由派法官,德高望重。美國大法官都是終身制,有出缺就由當屆總統委任。目前九位大法院中有五位屬保守派,四位自由派,金斯伯格的空缺將由特朗普委任,喚言之,萬一有選舉爭議需由法院裁決,特朗普將佔更大勝算優勢。

c6
c6 2020/09/19

中國加油 2020/09/19 15:27:55 回覆

如果不是QQ等科技股撐市,現在港股可能只是22000點。

高高手好

如果科技股大跌

咁港股危 危 

c6
c6 2020/09/19
@水滴石穿...

🙏謝謝🙏

水水哥哥🧍‍♂️

有財經新聞

方便大家記得貼貼