18/1港股牛氣沖天續尋頂

港股低開高收, 單日轉向呈陽燭, 繼續尋頂屠熊之旅

18/1周一恒指收28862, 升289點, 連升3天,

上周五美股反艇, 卻無礙港股今日升勢, 恒指已是今個月第六度低開高收, 一插即彈, 皆因港股大幅跑輸美股, 正在追落後, 多隻重磅藍籌創歷史新高, 全靠大媽掃港交所,騰訊及一眾新經濟股, 多隻大媽股都創新高, 走勢強勁, 道指連跌3天, 按照慣性走勢跌2~3天就會反彈, 港股今日爆上亦有可能係趁美股休市偷步炒上,

今日美股假期休市, 港股自由行, 沽空進一步增加, 熊熊大舉加倉, 有上攻挾淡誘因, 整體牛熊分布係牛多熊少, 唔使擔心會屠牛, 因為牛市多數係呢種佈局, 過去幾日恒指在28500穿梭, 扮受制於29000, 淡友入局, 29000~29500熊愈養愈肥, 以月波幅計, 樓上熊熊要買定官才, 今個月北水瘋狂掃貨, 推動港股級級上, 恒指瞬即站穩28500, 代表買盤強, 500點向上級級上, 29000.29500.30000.30500.31000....

去年(20/1/2020)恒指見頂29175後轉勢向下, 21/1/2020有下跌裂口在28492~28795, 今日高見28864, 已全數回補這大型下跌裂口, 回補裂口後仍能收於其上, 強勢畢現, 港股成交持續超過$2000億, 其中一個原因係美資要沽出美國制裁的股份, 由於要終止相關衍生產品買賣, 券商需沽出用以對沖的正股, 而大媽有國家任務全力接貨護盤, 中美大撼大, 令港股成交急增,

目前港股由好友及北水主導，超買再超買都唔理, 停不了的煙花連環爆發, 過去兩周底部不斷上移，低位: 28390/28294/28280/28136/27781/27794，穩步上揚, 上升趨勢明顯, 本周低位是28390的話, 要擴大周波幅就要繼續上攻, 恒指愈升愈有, 已突破去年二月頂部28055, 向去年一月頂29175進發, 上周美國取消將QQ及阿里列入制裁黑名單, QQ不明朗因素消除, 隨即爆上, 帶領港股破位而上

回顧11/1恒指上破28000整數關口前, 係收於27800附近, 翌日就爆上28000, 今日恒指收28862, 如果歷史重演, 明日就會上破29000, 唔計特大月波幅, 去年大波幅曾做2800~2900點, 如果照跟, 今個月就會挑戰29800~30000水平, 2018年大時代月波幅見過3500點, 即係癲起來會見30500甚至更高, 恒指去年見過5700點月波幅, 即係一月效應, 殺埋上31000都唔奇, 北水湧港大時代, 唔好估頂, 因為侵侵下台, 市場憧憬中美關係會改善, 熱錢流入中港股市

2020年頂 29175
2019年頂 30280
2018年頂 33484
2017年頂 30199

~~~~~~~~~~~~~~~~~~~~~~~~~~

北水領軍

高處未算高, 港股牛氣沖天, 收升周尋頂市是不會在周一見頂, 預示本周仍會有新高, 今日收28800之上, 代表會殺上29000, 向29500進發, 上周升市跌股多, 但今日港股急升, 除了強勢股見資金追入之外, 落後股亦見買盤, 有擴散跡象, 午後有資金湧入地產板塊, 令該板塊倒升, 港股整體升跌股份比例明顯好轉, 升勢全面, 係好現象, 不過資金追落後亦反映強股已升至不合理水平, 資金換馬至落後股, 強股飛出外太空, 代表港股A股化, 大媽炒股唔理市盈率

大牛市好友當道, 淡友節節敗退, 大行密密安排配股要托市, 大媽有國家任務要掃入制裁股護盤, 港股易升難跌, 北水對港股升跌舉足輕重, 人民幣過強, 阿爺想洩洪, 唔俾炒樓只好容許炒股, 聽聞每年一月內地發行公募基金, 有一半配置經港股通買港股, 怪不得北水流入金額頻頻創互聯互通以來新高, ATMXJ受追捧成寵兒, 所以過去幾周港股往往係即市調整, 一插即彈, 反映好友部署殺上29000之心未變, 去年高位在29175, 以月波幅計必破,

挾淡逼空軍回補空倉的威力驚人, 牛市勿估頂, 造淡係高危動作, 一如日前網誌所說, 估計今次升浪會去到1月尾或2月上旬, 當北水收爐就係港股反艇之時, 有大媽條水喉射住, 今個月可放心做大好友炒上

港股A股化, 大媽盯上的股份入貨係唔理技術指標及估值, 唔理利淡消息, 唔理歐美股市表現, 大媽愛股可以升到你唔信, 當大媽食胡可以失驚無神急回, 就好似曾經是大媽至愛的車股, 當大媽食胡就冇運行, 但股份插完大媽就會掃貨推番上去, 總之拋到你失暈, 今期大媽主力掃入受美國制裁的股份, 愈打壓愈頑強, 美資棄.大媽取,

港股H股相對A股低, 加上人民幣強勢, 內地基金認為港股具吸引力, 特別鍾愛沒有在內地上市的新經濟股, 係過去兩周北水大舉掃港股的原因之一, 港股走勢明顯比上証強, 皆因港股有內地未上市的科企新經濟股, 吸引北水湧港買上, 推動科企領漲港股

內地公布去年第四季GDP按年增長6.5%, 勝預期, 增強股民入市信心, 大媽繼續大手掃貨, 推動港股由跌轉升, 今個月恒生科技指數例牌跌一日即彈, 今日果然急升340點(+3.88%)，創收市新高報9116(高見9122),

~~~~~~~~~~~~~~~~~~~~~~~~~~~~~~~~

上証受制於3600熔斷水平

上星期上証於3600(2016年1月熔斷水平)打回頭, 沽壓加劇, 碌落去3533, 受內地經濟數據亮麗所帶動, 今日低見3544, 守得住上日低位3533就彈番上去, 再闖3600大關卻收於其下, 高見3608, 收市報3596, 升29點, 大鱷見內地股市反彈, 今日就借勢殺上去28800,

上証上星期周線收跌, 過去兩個月上証未試過連跌兩周, 如上証本周反彈, 有助推高港股, 不過老外今日掃入滬A股金額進一步減少, 早市更一度出現資金凈流出, 可能因為美元反彈, 利淡人民幣，人仔連跌3天, 如老外繼續走A股就會影響港股表現, 要特別留意美債息，當息囗再上揚，債滙有變，就會拖低股市, 目前美元已反彈至90.8附近, 如續升就要小心對股市構成壓力

港股係慢十拍, 道指.納指.上証早於18/12的一周就展開升浪, 急升了一個月才回氣, 可能係本港基金經理放聖誕假期, 港股升浪係由31/12/2020的一周才開始, 所以港股升勢斷纜理應遲過道指.納指.上証, 如果同樣係急升一個月(四周)的話, 港股就要在1月尾才會見頂回落, 如今恒指連升3周, 即係本周有望收升, 收28573之上, 牛市逢跌買上策略不變