12/3 港股彈散.牛熊通殺

2021/03/12 21:26:37 網誌分類: 經濟
12 Mar

港股飛天遁地呈大陰燭, 29000穿梭, 好淡通殺

12/3 周五恒指收28739, 急跌645點, 結束三連升, 失守10及50天線

9/3恒指創即月新低28326後作出反彈, 連升3天就變臉暴跌, 如果由低位反彈800~1000點可見29100~29300, 結果今日高見29550, 已超標完成任務, 大淡友仍未肯放手, 推番港股落山, 要再試多一次底, 守得住前底, 兩腳站穩, 才能加強股民入市信心, 到時就可升穿本周高位29550

港股先高後低, 單日轉向呈大陰燭, 恒指由升164點變為倒插678點, 好得人驚, 看來要落去做第二隻腳, 向28500.28326.28259(好友底線)進發, 如能守住28259仲未死得, 如失守不妙, 上証於9/3創低位3328, 當天港股低見28326/10861, 只要上証不破底, 港股就不應深潛, 道指強勢日日飛天, 會削弱港股下跌動力

回顧1月中北水大舉湧港掃貨, 就係由28800水平一大棍抽高千點上29800, 所以大鱷大媽亦有誘因咬住29000來派貨, 今個月好友一直守住28400~28600, 往往係一插即彈,

淡友超短炒, 昨日(周四11/3)未平倉凈數突然大幅增加, 但今日(周五12/3)未平倉凈數大減, 可能係淡友今日趁債息急升及恒指季檢成份股減比重乘機推港股落28707食胡, 可能港股下周仍會有震盪, 消化沽壓儲力再上, 淡友可能在下周推低大市食胡鬆人

~~~~~~~~~~~~~~~~~~~~~~~~~~~~~~

美國債息

呢幾日美國拍債, 無形之手推低了債息, 好友借勢推番大市上去, 但拍債後無形之手就縮手, 債息再度急升, 係尾市港股急瀉的主因, 美國十年期債息突破1.6%, 高見1.642%, 不利科企, 如科指弱, 就會拉住港股後腿, 所以淡友成功隊穿28800, 港股好友能否推番大市上山除了要看上証之外, 亦要睇債息

根據過去20年的記錄顯示, 3月恒指收跌機會率有65%, 年初造好, 3月獲利沽壓大, 收跌係正路, 就算收升亦不會大漲, 不過有期權分析師指出3月好倉佔78%, 看來好友淡友勝負仍未分,

道指雖然屢創新高, 但美股乾升,技術指標開始跟唔上,下周美股四權結算,好淡角力,所以港股都會立立亂

~~~~~~~~~~~~~~~~~~~~~~~~~~~~~~

成也QQ.敗也QQ

1月北水湧港時狂掃QQ, 但時移世易, 北水密密沽貨套現, 炒QQ的莊家已撤退, 蟹貨愈來愈多, 會削弱反彈動力, QQ問題在大媽推高出貨, 所以往往彈上去高位都企唔穩, 要等QQ走勢改善,北水再掃貨, 港股動力才會增強, 要看下個星期淡友會否再推QQ落去食胡,以及舊經濟股能否接力推高大市, 因為科企資金出逃就流入舊經濟股, 變相撐起大市

牛熊分佈仍然係牛多熊少, 下殺危機未除, 市傳騰訊面臨更嚴監管, 或被要求成立金融控股公司, 嚇到QQ當堂反艇, QQ見頂, 港股見頂, 今日QQ受制於$700大位掉頭下挫, 代表港股反彈浪結束, 連升斷纜利淡, 慣性走勢試完底(28326)再沖頂(29386), 如打回頭再試底, 今日QQ急挫收$650.5, 走勢差劣, 技術指標全面向淡, 往後如QQ跌穿$630, 就會拉港股落地獄, 前底$613不容有失

早已於月初提醒大家今日(12/3周五)恒指季檢不利QQ等權重股, 因為要減比重迎京東健康等新貴入門, 就會拖低大市, 本來恒指季檢小執位影響不大, 但當QQ等權重股受減比重拖累而衝高回落, 加上科企持貨者早已人心惶惶, 一有風吹草動就會跟沽, 淡友就可借勢隊多一棍, 掀起骨牌效應, 令沽壓加劇, 破位而下

 ~~~~~~~~~~~~~~~~~~~~~~~~~~~~~~

3月風高浪急

3月未開局已經預測會係好淡通殺, 風高浪急, 全民皆艇, 因為

~ 3月交易日數太多,大鱷唔想炒單邊,太易估方向的話,大鱷炒上就會輸畀好友,炒落就會輸畀淡友, 所以玩跌下彈下, 好淡通殺

~ 2月中港股見頂回落, 閒閒地都要調整一個月, 不會跌兩個星期就收工, 所以3月上旬插水創新低係正路, 最理想走勢係震埋下個星期就彈番上去29000

~ 恒指已連升5個月,累積龐大升幅, 3月獲利沽壓大增

~ 1月北水湧港推高大市皆因有公募基金入市, 但風光不再, 2~3月要獲利撤退, 當公募基金出現贖回潮, 港股沽壓就會加劇

~ 自從農曆年長假期後, 人行就密密收水, 大媽沽貨鬆人, 亦係中港股市反艇的原因之一

~ 3月基金季結要鎖定利潤,上月已有基金經理說盈利大縮水,甚至有說已入肉,一二月基金多數重倉科企新經濟股係死因, 所以近來港股一彈上去就見沽壓, 可能係基金經理走貨止賺/止蝕及減倉避險, 換入估值吸引及炒復蘇的舊經濟股, 普遍基金經理都認為中港美股市調整未完

~ 3月業績期見光死, 業績前的禁止買賣期股東不能回購股份來撐股價

~ 3月份多隻成份股除息後會見沽壓

~ 人民幣及港匯愈來愈弱, 熱錢正在流走

~ 美元及全球債息走高, 利淡股市, 要美元及債息回落, 股市才有上升動力

~ 10/3 美國拍債, 17/3 聯儲局議息, 通常股匯債都會大幅波動

~ 19/3 美國四期結算, 內地股指期貨結算

~~~~~~~~~~~~~~~~~~~~~~~~~~~~~~~

熱錢撤退

本來由24/2起道指與恒指差距有1500~2500點, 但本周兩者差距卻大幅擴大至3000~4000點的反常水平, 唔係幾對路, 代表道指走強, 但恒指愈來愈弱, 係熱錢及北水撤退的徵兆, 美債息高企不下, 走勢趨升, 美元於92關前徘徊, 人民幣及港匯走弱, 皆不利中港股市

本周高低位28326~29550, 好友底線28259(1月尾低位), 9/3低見28326即彈, 第一次試底通常守得住, 再插就危, 如失守就會觸發大量走鬼盤, 進一步拖低大市, 所以今個月好友一直守住28400~28600, 今個月係好倉底, 真係愈來愈似

下周港股表現非常關鍵, 本周高低位28326~29550兩邊都有可能爆, 但下周不應升穿上周高位29912, 或者拖到3月下旬才破頂

自從18/2港股見頂回落以來, 一頂低於一頂, 溫水煮蛙式派貨, 如下周力守28326不破, 就打破了每周底部下移的利淡形態, 係利好訊號, 後市就有可能再挑戰29550

過去幾周恒指高低位(底頂下移):

2月中: 30099~31183
2月尾: 28980~31071
3月第一周: 28513~29912
3月第二周: 28326~29550

==============================

3月份港股劇本

目前港股表現符合早前所寫的劇本, 3月上旬碌落山做底, 等百度招股就回穩, 月中仍有震盪, 到3月下旬再踢高, 以18/2見頂回落計, 用一個月時間來消化沽壓, 儲力再攻頂, 即係震埋下周就夠數

不過根據過去20年的記錄顯示, 3月恒指收跌機會率有65%, 所以應炒波幅, 不宜做大好友, 因為債息高企不下, 牌面利淡股市, 要等債息回落, 港股動力才會增強

下周三(17/3)聯儲局議息, 股匯債或會有震盪, 股民搵銀去抽百度, 港股29000穿梭,20/3(春分)之後再殺上去做3月大頂, 推高結算位

由於全民皆艇,如果依家一路殺上去做大頂, 就會放生蟹民, 要等蟹民死心止蝕, 大鱷低位收夠貨才會玩爆升

受早前美國匯債急升拖累, QQ等熱炒股的莊家已撤退, 仲未返來埋位, 所以港股仍要一些時間鞏固, 才能增強上升動力

最新回應

soho*
soho* 2021/04/21

雞煲, 好友周一冇食胡, 今次真係 [柯篤茄] "點算好"

C6, 唔好博反彈呀! 未見頂前要做好友, 見頂後就要做淡友,

A股唔撐得幾耐, 因為過去幾日A股大升係靠老外掃貨, 如今老外走貨, A股就危危乎

soho*
soho* 2021/04/21

黑天鵝

我擔心周一(19/4)高位29319已見頂, 月尾會破底來擴大月波幅,

周一殺上29319我已經覺得好奇怪, 點解19/4咁早就破頂升到這麼高, 因為好難撐到月尾, 如今看來係好友推上去食胡

周一爆上29319時已說買跌空間大過買上, 亦已預告恒指通常升2~3天就轉向, 加上昨日是穀雨變盤日, 昨日國指已率先收跌, 恒指就梗係要跟

今日恒指三連升斷纜, 跟足慣性走勢

28000~28500有肥牛近二千張, 具吸引力

過去三個月每逢月尾例插

今日裂口大插, 遺留下跌裂口28778~28885有待回補

過去20年4月份恒指有85%機會收升, 15%機會收跌, 我擔心係15%中, 因為有好多黑天鵝, 所以4月就算係收升, 幅度也不會多, 上月收28378

黑天鵝事件網誌已詳述

試下學下
試下學下 2021/04/21

門大師放我一馬好吾好😭😭😭🙏🙏🙏

soho*
soho* 2021/04/21

我地搵門師兄出來幫手造淡, 港股下殺危機未除, 牛牛命危