鄧達智
鄧達智
鄧達智

光師傅燒汁牛脷

2021/04/08 04:13:33 網誌分類: 生活
08 Apr
          選燒汁(日式)牛脷作標題,因為大家比較熟悉,美味不在話下,閒閒哋一百分,既厚且綿,咬落彈牙。

          今日標題選擇何止一項?

          日式清酒煮牛鞭,日式牛蛋蛋兩食,天婦羅酥炸港式雲吞,日式清湯大葱牛坑腩、牛尾,元朗墟至滑奶茶、抵飲十蚊雞UCC咖啡2.0,獨一無二日產紅豆咖啡⋯⋯

          點解咁多日式、清酒、天婦羅、燒汁、UCC、日產紅豆嘅?仲有日式煮牛鞭同蛋蛋,日本人食呢啲嘢嘅咩?

          發出以上疑問多的是。

          筆者豈是專家?

          讓專家光師傅以他的專業知識與氣場為你解答。

          光師傅,王榮光;日廚專業,曾任九龍香格里拉酒店灘萬日本餐廳(Nadaman)懷石料理專門師多年⋯⋯這是一項港人對「完美廚藝」的認證。始末純屬偶然,十多年前途經元朗,發現那是一個既傳統古老又有無限新發展蓄勢待發的社區。飲食同業員認為至重要創業事項:

        1. 社區人士鍾意食,食得起;元朗出名土佬多,儲備至多Old Money,兼且為食鬼多的是。

        2. 香港十九區,區區舖租貴,重要係貴到唔好一頸血,元朗總算合理。

        3. 勞動人口集中,元朗加天水圍加屯門,人力資源不差,尤其效力家庭半生婦女,子女成長,丈夫未退休,自己有氣有力卻無所事事族群。

        4. 餘下便是餐單設計;菜式貼地不趕客且不默守成規誠金科玉律,餐桌始終不是新發明試驗場。

          「傳麵世家」有名你叫:麵。

          有麵必有粉,麥與米的本事佔了中國人天工開物:粥、粉、麵、飯其中兩樣;on top of雲吞、水餃、魚蛋、魚片、牛根、牛腩,另加港式奶茶咖啡凍飲;惠及街坊福利。

          遇上識貨朋友,光師傅的懷石真身立即翻生,日式清湯、天婦羅炸漿、大葱加持⋯⋯還有年年必浸有年份梅酒!

          光師傅回答:你估淨係中國人先識食?日本人對牛鞭、牛蛋蛋之熱衷,高過唐人多矣,起碼說來、吃來不會閃閃縮縮;牛陽具之嘛!

        鄧達智
回應 (0)
我要發表
user