古星輝 - 捕捉元宇宙及Web 3.0蝴蝶機遇|乜都5G
2022/08/05 04:13:14 網誌分類: 經濟
最近我參加咗一個新穎的時裝展,就將元宇宙及Web 3.0嘅概念率先應用喺市場推廣嘅層面。
嗰個實體及虛擬混合嘅時裝展喺中環舉行,入場人士都以自己嘅虛擬化身登記入場,仲可以自己揀埋虛擬服飾。整個活動由虛擬模特兒行catwalk,到最後由真人模特兒展示實體時裝設計,與會人士可以同喺會場嘅人或者熒幕上嘅虛擬化身聯繫同互動,呢個沉浸式虛擬時裝表演,展現咗元宇宙及Web 3.0嘅有趣應用場景。
5G數碼營辦商提供有利條件
我相信,隨住大眾對元宇宙有一定認識,巿場慢慢就會產生愈來愈多實用嘅應用場景。當然,由感到虛幻嘅摸索階段到大眾了解和普及係一個發展規律。現時已有好多品牌捷足先登,喺元宇宙建立根據地。我哋作為數碼營辦商,擔當住一個既中立但重要嘅技術及商務綜合解決方案提供者的角色,無論係喺商業對商業(B2B)或商業對客戶(B2C)嘅層面,都可以促進元宇宙嘅發展。
數碼營辦商特別係有咗5G後,為發展Web 3.0及元宇宙提供咗成熟有利嘅條件。5G嘅特性包括萬物互聯、超高速、極低時延,有助區塊鏈及瞬即傳輸AR同VR等穿戴式裝置嘅數據,加強各種感應器嘅互連,以及用家喺虛擬及真實世界嘅互動、互聯,為建立元宇宙嘅虛擬世界打好基礎。
雖然元宇宙目前尚未普及,大眾對虛擬世界仍然處於了解或樂觀其成的取態,喺呢種情況下,享有商譽的數碼營辦商正正係備受信賴嘅一方(trusted party),因為我哋廣為大眾所認識,特別係要喺網上或虛擬世界若涉及有錢銀交易,用家都傾向信任佢哋喺實體世界所認識嘅公司,例如講到喺元宇宙用區塊鏈技術及數碼貨幣買嘢同NFT交易,數碼營辦商就好有優勢喇。
喺推動同發展元宇宙及Web 3.0嘅過程上,數碼營辦商扮演相當重要嘅角色,我哋可以幫唔同企業將實體世界嘅業務擴展到元宇宙,亦有助教育客戶未來發展趨勢。話時話,我哋公司都就嚟喺元宇宙開舖,到時喺元宇宙見!
和記電訊香港行政總裁
古星輝
回應 (0)
我要發表