快樂秀秀 3

大部份免費SHOW都類似私人派對居多, 而有一邊係老倌, 職業唱家, 曲藝老師,巳屬值得捧場嘅佳作矣！两边都係業餘就更加要睇彩數了ｏ

但有D友卻財迷心竅, 得一边嘅SHOW, 居然賣飛去賺錢, 認真無良, 黄SIR領過一两次嘢, 提起要買呢類飛就耍手擰頭ｏ但有時又人情難卻, 迫住要捧場, 十分吹漲ｏD友認真唔化, 得一边聽起碼都半價啦ｏ（近年小弟已可買半價飛, 咁又冇咁谷！但有時又唔好意思出声, 唔想認老, 咁就啞仔食黄蓮！）

有時呢類SHOW, 你根本唔駛買飛, 到時到候就有人賣唔倒, 要送俾人睇, 否則入到去得三四成人, 點似樣？高山文化甚至新光門口, 大把呢D執死雞客, 有時佢地D位仲靚過你買飛果D, 你話吹唔吹漲！

有次我同勇哥得一張飛去睇SHOW, 都唔記得咗點解了ｏ誰知去到門口已經有個靚女問我係咪要飛, 令我快樂了半陣子, 唔通我仲算靚仔？有D吸引力？

講到出SHOW分飛, 都要有D學問, 千祈唔好分晒全行俾同一組唱口, 一個唔該,果組唱完, 成行走晒入後台影相送禮, 前台冇晒人, 真該煨矣！

仲有千祈咪將多餘嘅飛俾門口D執死雞黨, 佢坐佐係你隔離, 你就永無寧日矣！D友根本都唔識欣賞, 入到去瞓覺, 傾計, 有次仲同人爭執, 嗌交, 發癲, 真係呢個世界乜人都有也！

去聽粵曲都要有D智慧至得嫁！