雷曼兄弟

一早起身睇電視, 見梁國雄（長毛）帶領買了雷曼兄弟迷你債券的苦主, 去衝擊中銀ｏ什么民主黨又去什么什么銀行抗議！呢單嘢真係有排煩了！

如果呢班苦主一早請教黃SIR, 就唔駛而家俾人舞泥舞去, 苦不堪言了ｏ

想黃SIR自少得江湖異人傳授一招測字奇術, 可從名字得出趨吉避凶之法！

雷曼兄弟望文生義, 成個江湖人物咁嘅名ｏ有道是, 稱兄道弟, 哥前哥後三分險,咁你都信佢, 注定冇運行啦！

至於迷你債券！迷你迷你, 迷迷糊糊, 仲會有好嘢咩？

所以當銀行個女仔一SELL呢樣產品俾黄SIR, 黄SIR立即耍手擰頭, 咪鬼攪！迷你迷你, 一陣變咗迷我迷我, 咁就正一俾鬼迷矣！

有時對文字敏感, 真係有運行嫁！

國慶日黃SIR去跑馬, 第七塲有隻11號勁爆力！ Seven eleven, 七, 十一 , 又勁, 又爆, 又有力ｏ黃SIR咪整十文嘢（TEN DOLLARS）買WINｏ

哈哈！派成八百幾文！你話測字神唔神奇！

做人有時就係咁玄嫁嘞, 唔到你唔信！

如果你樣樣事物敏銳D, 包你有運行！

正如 蒙牛！蒙牛！隻牛都蒙查查, 你仲飲佢D奶？抵你疴唔出尿啦！

至於三鹿！三鹿！俗語都有話啦, 三鹿﹝六﹞滾一滾, 神仙都企唔穩！你自己又唔係神仙, 飲咗想企穩都難啦！明未？

而家你地知點解咁多人請教黄SIR點趨吉避凶啦！

嘻嘻！