雷曼兄弟
2008/10/04 13:14:31
網誌分類:
時事
一早起身睇電視, 見梁國雄(長毛)帶領買了雷曼兄弟迷你債券的苦主, 去衝擊中銀o什么民主黨又去什么什么銀行抗議!呢單嘢真係有排煩了!
如果呢班苦主一早請教黃SIR, 就唔駛而家俾人舞泥舞去, 苦不堪言了o
想黃SIR自少得江湖異人傳授一招測字奇術, 可從名字得出趨吉避凶之法!
雷曼兄弟望文生義, 成個江湖人物咁嘅名o有道是, 稱兄道弟, 哥前哥後三分險,咁你都信佢, 注定冇運行啦!
至於迷你債券!迷你迷你, 迷迷糊糊, 仲會有好嘢咩?
所以當銀行個女仔一SELL呢樣產品俾黄SIR, 黄SIR立即耍手擰頭, 咪鬼攪!迷你迷你, 一陣變咗迷我迷我, 咁就正一俾鬼迷矣!
有時對文字敏感, 真係有運行嫁!
國慶日黃SIR去跑馬, 第七塲有隻11號勁爆力! Seven eleven, 七, 十一 , 又勁, 又爆, 又有力o黃SIR咪整十文嘢(TEN DOLLARS)買WINo
哈哈!派成八百幾文!你話測字神唔神奇!
做人有時就係咁玄嫁嘞, 唔到你唔信!
如果你樣樣事物敏銳D, 包你有運行!
正如 蒙牛!蒙牛!隻牛都蒙查查, 你仲飲佢D奶?抵你疴唔出尿啦!
至於三鹿!三鹿!俗語都有話啦, 三鹿﹝六﹞滾一滾, 神仙都企唔穩!你自己又唔係神仙, 飲咗想企穩都難啦!明未?
而家你地知點解咁多人請教黄SIR點趨吉避凶啦!
嘻嘻!
回應
(0)
我要發表