詠春葉問

最近睇咗套電影….. 葉問ｏ人物就係講詠春拳葉問宗師, 故事情節就十分簡單, 但編劇都有D橋, 冇乜悶塲！

但最令黄SIR雀躍之處, 就係片中葉問的功夫, 冇花冇假, 正宗詠春拳ｏ連六點半棍都出埋, 只差冇詠春之八斬刀而已！

詠春三套拳, 小念頭, 尋橋, 標指, 加埋木人樁, 片中都有介紹！

故事當然係虛構, 但人物卻真有其人ｏ此片顧問葉準先生就係葉問個仔！

葉問其實係將詠春拳帶來香港的第一代, 其門下三大弟子梁相, 駱耀, 徐尚田ｏ徐師就係黄SIR七十年跟過約两年的師傅了ｏ（當年小弟月入千元, 學費五條嘢！50皮！）

最近聽聞徐師師弟黄淳樑已歸道山, 李小龍D詠春據聞係跟佢學嘅ｏ後來李小龍成了名才補拜葉問為師ｏ唉！從此李小龍做咗黄SIR師叔！

如果唔係, 按輩份, 黄SIR應該係佢師兄也！

詠春近年多得梁挺先生全球發揚光大, 以前佢係浸會大學搞詠春拳班, 仲分黑帶制, 都算好有創意！

詠春拳其實係一D功夫散手！一出手就打人要害！因為嚴詠春係女人, 冇咁多體力同你慢慢打也！

講開武功！黄SIR又大把嘢可以講也！黄SIR識太極拳！氣功！鶴翔樁！靜功十二法！八段錦！柔道就差小小！學咗三個月！剩係識跌！同埋拍蓆！（認輸也！）嘻嘻！