利是逗來

講到過年, 梗係要講吓逗利是啦ｏ我細個時, D大人俾利是你時ｏ就話, 係咁意,紅紙一張咋ｏ我個心就諗, 如果真係紅紙一張, 你就有嘢睇（準備發揮頑童創意本色也ｏ） 摸上手, 硬嘢, 都係時候諗諗點樣創意了ｏ（還記得我恭喜亞姆添丁發財, 連生貴子嘛ｏ哈哈！）要逗利是, 當然要有D學問嫁ｏ

通常新年第一封利市, 多放在枕頭底ｏ 父母（多數係老媽, 老豆少理）半夜等我地瞓晒, 才每人枕頭底放一封, 一早起身, 第一件事就摸摸枕頭底, 收利是ｏ然後梳洗, 穿新衣, 新鞋, 過新年也ｏ有咗第一封, 自然有第二封, 如果有橋, 過年閒閒地都收幾百封利市嫁ｏ

記得有一年桓生居然連小朋友的生意都諗埋ｏ送錢盎, 話聚沙可以成塔渦ｏ後來𠥔豐, 渣打都有得送ｏ但我第一個買的是, 一個很大圓圓的瓦錢盎, 貪佢入錢條鏠夠濶, 方便日後等錢駛, 可以用筷子撩番D錢出泥（有腦啩？）ｏ其他人用D細的錢盎, 要用錢, 只能打爛, 幾鬼冇腦ｏ（我D兄弟曾經試過, 有一文, 用五毫子買個瓦錢盎, 將五毫子儲入去, 過了一天, 想買嘢食, 撩唔出, 結果打爛佢, 攞番五毫子ｏ靚仔D行為, 笑死人也！）

逗利是, 通常年初一就晨早就出發, 跟住D大人, 先先逐家逐戶（D街坊）, 收租咁收ｏ我細細個已好鬼好記性, 边個俾咗, 边個未俾, 記得一清二楚, 包冇搞錯, 永冇失拖ｏ見倒D未結婚嘅, 就慳番啖氣ｏ（心想, 呢D係冇利是嘅）ｏ

跟住兄弟姊妹組織遠征隊（由吾兄或堂姊帶領ｏ）實行港九新界新春大搜索ｏ（揾D親戚, 朋友, 甚至老師ｏ懶有人情味, 明為拜年ｏ實為收片！）同街有D大人唔夠馬, 都可以帶人地D小朋友去逗利是, 然後分賬！不過我家, 人多勢眾ｏ夠晒叠馬, 一於有殺錯, 冇放過ｏ識與唔識, 利是照逗, 真係收到手軟也ｏ有時收到忘形, 見倒D未結婚都照攞ｏ唔俾就送上一句, 哈, 乜你冇利是嫁！一於利是掛帥！

一日辛勞, 到晚上回家拆利是, 數銀紙, 真係諗番都快樂ｏ

而家過年, 有資格俾利是我嘅, 越來越少了ｏ而家只有我俾人, 冇得逗ｏ唉！冇癮之至ｏ

咦！今年駛唔駛諗吓計, 點樣可以逗番D呢？ 吓？ 

我…..（今年）….都未結婚！唔知得唔得呢？吓？