年年歡樂

已往過年好多嘢做, 要由內至外買過晒D新嘢, 又一定要飛髮, 通常年尾飛髮佬可以收雙工, 因為人人要飛髮攞意頭ｏ細路仔最鍾意飛髮, 因為有公仔書睇ｏ又一定要買鞋, 因為正月唔准買, 鞋鞋声, 唔吉利渦ｏ

辨年貨, 糖果瓜子, 髮菜𧐢士, 鮑魚海味ｏ都一早入定貨, 因為過年大都在家团年及開年, 一家人食餐飯ｏ小朋友逗利市, 賭吓錢, 非常好玩ｏ

年三十晚, 半夜有人派財神上門, 又係逗封利是揾錢時間ｏ以前黄SIR細個未識字, 都學人寫ｏ財字寫咗唔知乜字ｏ（可能係 才貝 掉轉咗ｏ）D大嬸收到, 啋到你暈, 黄SIR惡向胆边生, 番去寫個 衰神 派俾佢, 等佢衰足一年！ 又係頑童創意本色！

過年又多嘢食, D角仔十分鬆化, 酥皮, 內有花生沙糖, 真係好食過而家D好多ｏ煎堆通常好大個, 硬到死, 咬到牙都崩, 冇乜人鍾意食ｏ留番泥煲甜粥, 一樣冇人食ｏ最好味反而係团年開年食剩D餸尾, 全部擺在一起, 整個一品煲, 真係好好味ｏ通常夾倒舊鷄, 或者舊蝦碌, 真係開心到飛起ｏ

年糕, 蘿白榚, 不在話下, 仲有隻竽頭糕都正ｏ食物最充足就係過年了, 有得食,有錢駛, 有錢賭, 有得玩, 夫復何求？

吓, 諗諗吓, 同黄SIR而家有乜唔同呢？（哦, 果陣我係細路, 而家我係大人吧了ｏ）