家庭內的「可持續發展」
遲d要讀同馬克思主義有關既野, 我唔知頭唔知路 (以前讀西史時唔入腦呀), 前排先上網搵返d資料, 前幾日又發現大哥個書櫃有本相關既書仔, 就偷左, 嚮火車度刨。
睇到有關「可持續發展」既文字, 而前面部份又講到系統既問題, 本書又涉及「有階級就有鬥爭」呢個概念, 但到底階級如果被視為獨立個體, 忽略系統性同埋佢地之間既聯繫, 不利「可持續發展」。大概係咁 (我怕講錯野)。
我屋企有階級, 爸爸以前係最高決策者, 依家佢雖然未必可能做決策, 因為仔女都惡過佢 (呵呵), 但我呀媽一直都係勞動者, 做家務, 近來又要照顧孫女, 又要照顧我表妹。
作為屋企個齒輪, 冇煲水, 呀爸就話佢; 地板污糟左, 又出於呀媽太好心, 好勤力拖地, 但呀爸見地板咁乾淨又踏多兩腳, 於是齒輪不斷地勞動。
如果爸爸肯體諒佢老婆, 系統唔會咁「自己顧自己」, 而係大家有「出街既鞋唔好踏咁入」呢個共識, 爸爸又可以放低「大男人」、「女人要做家務、女人用黎做家務」呢d咁可惡既觀念, 呀媽執好屋企d野時佢都合作、唔亂放咁多野, 甚至自己都肯執下野, 呢間屋就住得舒服d, 可以話風水都好d。
其實住新界既好處, 係d樓大d。但間屋咁多野, 我呀爸又咁大個, 有咁多「藏書」, 唔係成日睇,又咁多雜物, 有機會可以清返d。而且佢成日嚮屋企, 唔係睡就睇報紙, 我真係成日睇唔過眼架。
前幾日我自己執左好多舊野, 包括書呀筆記呀舊功課呀舊試卷咁, 雖然三大部車仔既野只賣得19蚊, 但起碼討好到我呀媽既。至少我都做左d齒輪應該做既事。
可能因為我呀爸成日咁自我, 我自己都從小就好自我, 所以表妹走過黎我屋企, 我會渾身唔自在。如果係一個健康既「可持續發展系統」, 大家習慣於留意彼此之間既聯繫, 真係會變得更可持續發展, 屋企更值得留戀。
由於有個計劃因為社會經濟大氣候而要延遲, 我都係執靚自己間房先, 因為咁樣係先處理自身既資本, 逐步向多方面更有效咁發展, 而唔係只顧及單一既事情。
以前既時代有以前時代值得珍惜既野, 依家既時代當然保留左一d以前既好野, 因為好野係好既所以先會保留左。老一輩既人反對某d新既觀點, 當然新既觀點又有佢既價值, 所以先會成為社會風氣。但基於家庭係一個系統, 希望家庭可以健康地持續發展既話, 必要維持健康既聯繫。爸爸做唔到, 但我同呀媽都可以玩改革, 反正爸爸驚我既。嘻~~~