久違兩年,AMusic老闆黎明將於12月5至9日於紅館舉行5場《黎明LeonXu紅館演唱會2011》,「X是一個符號,解作Crossover,Xu即與你的意思。」演唱會開宗明義與觀眾齊齊玩,Leon更自比廚師,演唱會上會烹調甚麼餸全跟觀眾喜好,更會請觀眾上台親自試味,有機會上台跟Leon作零距離接觸,粉絲們絕不能錯過。 主持:黃柏高 統籌:林永匡 協力:廖思慧
不知從那時開始,黎明變了金句王,得知演唱會名為「LeonXu」時確實有點摸不着頭腦,究竟這個X代表甚麼?原來這個X包含了重大意思。
黎明:「X是一個符號,解作邊個乘邊個,即Crossover,而Xu即我與你的意思。每次開Show嘅心態都唔同,心態唔同,自然表現嘅嘢都唔同,今次我就好似廚師咁,廚師心態就係會同顧客Crossover,即會讓對方試味,係一種互動方式。」
原汁原味最緊要
在訪問開首,Leon已表明演唱會上會跟歌迷玩互動,對歌迷來說確實是一個天大好消息,更讓歌迷興奮的是,這次演唱會的Rundown,Leon會有特別安排,原汁原味更是他的首要條件。
「除了跟歌迷玩互動外,更會諗盡方法令到觀眾入咗一個世界,一個同我一齊都經歷過的世界,坦白講,8成Rundown都唔係我整嘅,因為我想用觀眾角度去設計餐單,所以由身邊人去擬定,如果用我角度,有啲歌係唔會揀嘅。另外,今次開Show所唱嘅歌都係原汁原味,因為我唔覺得要改變,亦無必要失真,好似我以前嘅快歌,例如:《眼睛想旅行》咁,今時今日聽都唔覺得Out,所以我覺得無必要改變。」
絕不舊瓶舊酒
Leon說得沒錯,歌手在每一階段的表現都會有所不同,今次大玩接近的他希望帶給觀眾一個融入的感覺。
「在我的成長過程中,每一階段都會有一些經典的歌,每次演出都會有唔同的方法,今次亦唔例外,無可能舊瓶舊酒吧,咁會好悶,始終演唱會需要視覺,所以今次舞台上都會有所配合,總之恰到好處,觀眾必定啱睇。」
不靠造型作突破
黎明以往在演唱會上的造型均沒有太多花巧,Classic是他的特點,一站出來的台型是與生俱來,無人能及,今次演唱會亦不例外。
「我亦不喜太花巧,最重要是知道自已係咩形象,之前開會有Stylist叫我着裙,我話呢啲突破留番畀佢自己啦,我唔需要着裙去突破自己,我相信着咗之後,相片只會喺八卦雜誌內的評衣着專欄出現,話我得C-咁上下。老實講,我無可能着得好過曾着裙嘅偉仔同Wyman,呢樣嘢唔啱我,夾硬放喺我身上,唔係我囉,做人最緊要做自己可以做到嘅嘢。」PACO黎明
黃柏高 |