等備四年成果 萬子出山拍《懸紅》 馮志強導演:要笑爆全場!
2012/06/18 08:45:15 網誌分類: 娛樂
| 電影有種魔力，能讓人瘋狂愛上，編劇出身的馮志強全情投入電影世界，從劇本創作至尋找投資者，過去四年努力追夢，說到自家首部爆笑喜劇《懸紅》，馮導演說要感謝演技超班的萬梓良出山相助。今天有請馮導演和萬子哥親述拍攝喜樂，並在此預祝《懸紅》票房大賣。 主持：黃柏高 統籌：林永匡 協力：彭燕燕、袁東亮、龍婉琪 我深信《懸紅》一定得，過去四年，我一直努力為馮志強牽引投資者，過五關斬六將，電影終能面世。 馮：「幾經波折先可以開拍《懸紅》，靈感來自警方網頁的懸紅通緝，好似早前懸紅90萬捉拿旺角鏹水犯，當時我曾有衝動去嘗試捉犯，亦激發我寫這故事，內容講述阿澤是一個靠懸紅為生的人，追查疑犯時遇上飾演兩父女的萬子哥和Fiona（薛凱琪），當中發生好多錯摸和危機。」 萬子讚不絕口 眾所周知，萬梓良演技絕頂口才了得，今回復出香港影壇，接受新晉導演馮志強的改造，以全新面貌示人，說到這次初體驗，萬子哥有讚冇彈。 萬：「拍《懸紅》非常辛苦，因為導演從來唔聽我意見﹗每次跟他討論場口或徵詢他意見時，導演總會話『得㗎啦，你咁多經驗，你演啦，我絕對有信心﹗』當時我心諗，係咪是但應酬我？後來我發現他將所有時間同焦點放在Fiona和杜汶澤身上，努力跟他們溝通，利用無聲勝有聲的招式去誘導我配合兩個反斗星﹗導演係一個好有認知，好識感恩及謙虛的人，記得新年他傳短訊給我：「萬子哥，好衷心多謝你喺2011年，選擇接拍一套由一個不見經傳嘅導演所拍攝嘅電影，我衷心感謝你，祝你新年快樂。』我覺得時下年輕導演能有如此謙遜，實在好難得﹗雖然導演將來嘅成就仍然係未知之數，但我認為佢能夠以《懸紅》作為起步點，係一個GoodBeginning。」 馮：「好多謝萬子哥由開始到拍攝，直到依家拍攝完畢，開始宣傳活動仍然非常支持《懸紅》以及我。我之前成日諗，呢套戲係萬子哥復出頭炮，我應該點樣安排佢出場先夠特別，最後我安排佢戴『大眼仔』出場。初初大家都非常詫異亦好疑惑萬子哥究竟肯唔肯，最後佢第一句竟然係問咩係『大眼仔』而唔係否定我嘅建議，我覺得實在非常難得。」 薛凱琪有驚喜 杜汶澤演喜劇夠格，薛凱琪則是驚喜，估不到她的喜劇細胞豐富，舉手投足都能引人發笑，就連經驗老到的萬梓良也對她刮目相看。 萬：「我覺得杜汶澤與Fiona非常勤力、落力及賣力，雖然只係第一次合作，但我覺得同佢哋好有緣份，特別係飾演我個女嘅Fiona，記得第一次見面時，佢已經叫我做爸爸，唔係萬子哥，證明佢投入套戲，投入角色，我非常欣賞。其間，拍攝一段父女情深的場面時，佢更拿揑得非常好。其實早在杜汶澤拍電視劇時我已經有留意佢，當時佢真係名不見經傳，但我相信佢將來會有一番作為，結果佢拍電影成名。拍攝期間，我有留意佢，發現佢好有即興思維，我認為係好事，但一定要事先同導演溝通，否則出咗鏡，或者收唔到音都無用，但我相信佢嘅演出會愈來愈好。」 馮：「Fiona係一個幅度好大嘅女演員，演藝細胞非常旺盛，可以大喜大悲，而且佢有一個特質，就係當其他人做某啲演出時會有好討厭嘅感覺，但佢做反而好搞笑，而且佢係一個好勤力嘅演員，基於佢唔識睇中文，每晚都會叫佢媽咪讀一次畀佢聽，方便佢寫低拼音，而我同杜汶澤就試過好幾次趁佢放低劇本行開時，偷偷改佢啲拼音，笑爆全場。杜汶澤方面，我哋今次特意加咗動作嘅場面畀佢，佢不但出乎意料之外地表現得非常好，記得某場佢一打七嘅場面仲打得似模似樣，兩Take已經OK﹗」 |
 | |
| |
 | |
 | |
| |
 | |
 | |
 | |
| |
 | |
| |
| |
多謝哂你 !!
多謝哂你 !!