14/8 收市20300關前卻步

最貼價熊在20338, 明日能否死裡逃生呢? 熊仔今晚肯定會失眠 (15/8 後記: 熊仔大難不死必有後福) 

14/8 周二恒指收報20291 升210點  終止兩連跌, 國指收報 9915 升100點  國指連續兩日跑輸恒指

歐美股市昨晚下跌, 但今早恒指竟然大幅裂口高開170點, 極不尋常, 好友擺明唔俾三連跌, 但淡友亦不甘示弱, 一度將升幅全部抹去, 好友力守二萬點, 午後借上証綜指止跌回升挾住港股上沖至高位收, 昨日港股成交突然大幅縮減至361億, 已預示今日有大龍鳳, 美匯向下行, 歐元.港股向上走, 亞太區股市全面上升, 今日港股大幅波動, 好淡大鱷開戰, 殺氣騰騰, 掃貨盤是否跨境 ETF 資金入貨呢?

港股成交大幅增加至$561億, 是因為#1972太古地產配股$100.6億 ($50.38億及$50.2億), 扣除配股因素, 今日港股成交只係一般, 並不配合升勢, 散戶見港股一直未落去補回二萬點樓下的裂口亦不敢追入, 港股沽空比率如扣除配股就高達12.6%, 淡友正部署復仇大計

今日港股大幅上升210點, 只係靠權重股匯控及中移動, 兩隻巨無霸貢獻恒指77點升幅, 好唔健康, 其實港股大漲但股份升跌數目卻相差不遠, 顯示資金流入權重或業績佳的成份股, 夾硬挾高港股, 而業績差的股份早前被掃高後, 在高位已見沽壓, 大鱷撩高就掟貨

~~~~~~~~~~~~~~~~~~~~~~~~~~~~~~

權重股有壓力

內銀將會陸續公布業績, 但收市後有消息指社保基金於8月8日以每股平均價4.56元減持工行 451.6萬股 H 股, 套現約2059萬元, 社保基金在業績公布前走貨, 相信明日內銀會有壓力, 另外早前領漲的內險股近日走勢轉弱, 匯控明日除凈, 通常股份除凈後都會有一浸沽壓 (15/8 補充: 匯控除凈日受壓回落, 惟翌日已回穩) 

恒指 20100 ~ 20400 呢個阻力區真係唔簡單, 足足磨左6日但係到今日仍未能上破20300, 恒指收20291 (高過上周四收20269), 國指水皮d, 收9915 (低過上周四收9962), 中移又創新高, 即係沽空中移全部都係輸緊, 不過要小心中移在周四公布業績, 會否見光死呢? 中移有個走勢模式, 就係每次創新高之後都要落去10天線抖氣 (17/8 補充: 今次仲大鑊, 升得高跌得低, 創新高後要落去100天線回氣, 足足跌左一成)

班歐洲大帝剛放完大假回歸, 未來幾日歐洲方面又會多番d消息, 將會引起市場波動, 另外道指13200~13300阻力亦好大, 不易突破, 由於現階段並無實質救市政策推出, 只係靠憧憬, 所以今日恒指亦未能突破8月高位20300, 能否進一步向上就要睇內地股市, 今日港股走勢就緊貼上証綜指大上大落, 升跌大致同步

8月下旬是港股上市企業公布業績的高峰期, 由於中資企業盈警消息排山倒海而來, 相信正式公布業績時仍會引起震盪, 影響市場氣氛 

恒指挑戰8月初高位

~ 恒指近期一直在 19966 ~ 20300 之間窄幅波動, 就睇好淡雙方邊個能打破困局, 如港股20300受阻而回, 跌穿19966, 顯示好友主導地位不保, 向上方面, 恒指由2月高位21760跌至6月低位18056, 累計下跌3704點, 0.618倍黃金比率就在20345, 阻力非輕, 如果升穿企得穩就可進一步挑戰5月份暴跌的下跌裂口區

~ 美國大選愈來愈近, QE3預期亦同步升溫, 內地經濟數據不濟, 市場已急不及待齊齊炒 QE3.內地減息 / 減 RRR, 到目前為止, 8月恒指高低位是19454~20300, 波幅僅846點, 仍未達標, 7月波幅就有1159點, 而每月波幅通常有1500點

~ 踏入7月份開始連續5周, 恒指每周都是梅花間竹的升跌走勢, 但上星期已打破悶局變成連升兩周, 港股已走出方向, 但由於距離月尾結算還有好一段日子, 加上並無實質救市措施出台, 估計港股仍有好大機會落番去補裂口或測試250天線的支持力 (16/8 補充: 恒指跌穿二萬點, 19900獲支持回升) 

~ 狼特首不但冇打壓樓市措施, 仲間接推高了樓價, 地產股強勢帶領港股破關, 但地產股累積龐大升幅已見疲態, 高位壓力漸現, 回顧新特首上場前地產股跌勢好急, 拉住港股落山, 但當投資者發覺佢係無料到之後, 地產股就開始轉勢, 有地產股支撐, 亦是恒指7月回調見18710後已拒絕下跌的主因 (16/8 補充: 近日樓市升溫, 特首大話英又轉口風, 警告將出招壓樓市, 地產股今日腳仔軟, 恒指插穿二萬點就係多得大話英)

~~~~~~~~~~~~~~~~~~~~~~~~~~~~~~

小心公布業績股份

無論歐美也好.中國也好, 經濟數據愈差, 憧憬各國推出寬鬆政策來刺激經濟的預期就更強烈, 資金從避險的債市流出, 股市及風險資產獲追捧, 恐慌情緒紓緩, 市場風險胃納上升, 全球股市高踞不下, 期待救市措施出台

國指已是連續兩日比恒指弱, 估計是受了中資企業的業績拖累, 另外打壓內房政策頻傳, 國務院樓市督查組定調從嚴, 又傳內地逾30省市準備對存量房開徵房產稅, 內房股逆市下跌拉住國指後腿, 8月份是港股上市企業公布業績的高峰期, 由於全球經濟放緩, 內地企業近日盈警消息不斷, 到目前為止已有超過350間企業發盈警, 情況較金融海嘯時更為嚴峻, 散戶好易踩中地雷, 估計資金會繼續轉投業績佳的港企

自從六月起, 油價成日都企唔穩90美元, 但係過去7日期油收市都企係91美元樓上, 顯示市場風險胃納上升, 資金四出搵野炒, 回顧近日港股表現, 見不少股份大上大落, 出現掃高後就派貨的跡象, 散戶要提防接火棒

港股企穩50/250天線反覆尋頂

~ 過去幾個星期大鱷掃貨掃得好急, 優質成份股大受追捧, 好明顯係有資金炒阿爺放水.歐央行救市措施及QE3即將出台, 歐債危機紓緩, 大鱷又回流港股搵食, 恒指反彈至19500附近散戶走貨, 但大鱷就積極掃貨, 19600~19900區間成交突然增加, 大鱷係呢個位咁進取, 要食幾多點才夠轉身呢? 

~ 港股連續幾日急升上半年只係試過兩次, 一月基金掃貨六連升, 三月四連升爆上21638見頂, 而7月尾就出現五連升才回落, 但只係回調了154點就拒絕下跌, 急彈抽上二萬點, 真係唔簡單, 呢種勢頭必有後著

~ 恒指重上50天線繼而收復250天線, 國指自從三月份跌穿50天線後, 一直無法重上該線, 今次借憧憬新一輪救市措施急彈重上50天線, 有轉勢的味道, 已確認9121點已是短期底部

~ 7/8 [ 立秋 ] 預示有大變, 升跌卻不一定, 也不是轉節氣當天才發揮威力, 有時會前後相差一天, 一般累計會有約600點的變動, 今次立秋就上破二萬大關, 到目前為止累計上升625點, 已達標

~~~~~~~~~~~~~~~~~~~~~~~~~~~~~~

中資企業/內地股市

~ 內地技術分析專家推算上證綜指底部在1800點, 正負180點, 換句話說, 樂觀看法是 1800 + 180 = 1980, 而上證綜指31/7低見2100就掉頭回升, 另外分析亦指出7月底及8月初是內地股市的拐點, 換句話說, 如圖表分析正確的話, 上證綜指已接近底部或已見底, 但內地股市係神經刀, 極其飄忽, 升跌無跡可尋, 就算見底亦並不表示展開升浪

~ 中證監表示正積極協調研究降低印花稅, 如成事的話, 9月起證券交易費將再大減, 希望可刺激股市交投, 另一方面, 市傳基金或會下調券商佣金20%, 券商分倉收入或大減, 消息不利券商股 

~ 中國7月 PPI 按年跌2.9%, 高於預期, 連跌5個月, 另外7月 CPI 按年升1.8%, 略高於預期, 更創30個月新低, 數據差市場進一步憧憬短期內減 RRR / 減息, 過去兩周不少妄下判語的分析師/經濟師就跌晒眼鏡, 其實社科院早已表示前幾次減息和減準刺激了房地產, 房價不降則減息和減準均難, 受不利消息拖累, 內房近排走勢已轉弱

~ 內地掛牌的港股 ETF 在8月初已完成招股, 市傳本周起就可以建倉, 不過唔需要一日內買齊, 建倉期約有3個月, 聽講有 $50億 ~ $200億, 但首批跨境港股 ETF只有55億人民幣, 今次恒指向上突破, 重上二萬點唔多唔少都同呢個 ETF 有關

~~~~~~~~~~~~~~~~~~~~~~~~~~~~~~

財經日誌

~ 8月期指低水部份原因是受成份股除凈影響

~ 8月份為港股上市企業公布業績的高峰期

~ 明天 (8月15日) 渣打管理人員將出席聆訊, 向當局講解為何不應被「釘牌」(15/8 補充: 渣打認低威, 與紐約金融局達成和解僅罰逾26億港元, 原定15/8舉行的聽證會將休會, 預料最快9月才能達成全面協議, 分析指總罰款或會是10億美元)

~ 本周五美國四期結算/內地股指期貨結算

~ 市場估計歐洲央行在9月6日的會議上將會有具體的買債措施

~ 市場預期9月中的聯儲局會議中會宣布實施QE3, 伯南克甚至會在8月31日於懷俄明州傑克森豪爾央行年會發表講話, 講及新一輪的量化寬鬆刺激經濟措施

~ 由於立法會換屆, 梁特首的首份施政報告將由傳統的10月延至明年1月16日發表 , 哈))) 地產股又可以玩多幾個月

公布業績股份: (部份)
13/8   港鐵.冠君產業信託
14/8   中電.安徽海螺水泥
15/8   青啤.騰訊.中國雨潤.中國製藥
16/8   中信泰富.SOHO中國.中國移動.聯想
17/8   鷹君.中信大錳.合景泰富.中國太保.招行.重慶農村商業銀行
20/8   康師傅.中國財險
21/8   中國光大控股.Glencore.煤氣.中海發展.特步.中煤能源.中海油田服務.中海油
22/8   吉利.李寧.中石油.恒地
23/8   昆侖能源.民生銀行.平保.中銀香港.中國銀行.中國建材.
24/8   第一拖拉機.中石化.建行.兗州煤
29/8   中國旺旺.中國糧油

~~~~~~~~~~~~~~~~~~~~~~~~~~~

1月人民幣新增貸款7381億元
2月人民幣新增貸款7107億元
3月人民幣新增貸款10114億元
4月人民幣新增貸款6818億元
5月人民幣新增貸款7932億元
6月人民幣新增貸款9198億元
7月人民幣新增貸款5401億元 (創10個月新低)

阿爺在2012上半年既減息又減 RRR, 但內銀仍不願放貸, 新增貸款非常疲弱, 歸根究底係銀行存款流失, 企業盈警多多.盈利不保, 內銀怕不良貸款失控, 加上中國管理層十月換屆, 當然係少做少錯, 就算阿爺再逼內銀放水, 也是徒然, 睇下3月及6月, 新增貸款急增, 好明顯係季結篤數交差, 港股今次由18710反彈以來, 內銀一直跑輸大市不無道理

內地股市成交低迷, 7月份中國外匯佔款減少, 已是今年第二次下跌, 出口放緩.內需疲弱.新增貸款減少.資金持續外流, 撤出中國, 這就是房價.股市.人民幣全面反艇的主要原因, 流入金融市場的資金減少, 內地股市日日半生不死, 連阿爺出招救市都冇反應, 上証綜指 [鐵底] [鑽石底] 原來都係 [豆腐渣] 工程, 一震就散晒