各路笑匠齊出招 君如毛姐埋牙鬥戲 谷德昭：觀眾一定睇得開心！
2013/01/21 10:12:28 網誌分類: 生活
| 農曆新年最緊要開心，今年賀歲檔猛片如雲，我獨愛黃百鳴出品、谷德昭主理的《百星酒店》，能沒頭沒腦的笑餐飽，確實開心，看一下陣容，齊集各大門派笑匠，吳君如、毛舜筠、鄭中基、葛民輝等，保證笑爆，今天請來谷德昭導演作客，告訴我拍喜劇的要點，分享拍攝點滴。在此預祝電影旗開得勝！ 主持：黃柏高 統籌：林永匡 協力：彭燕燕、袁東亮 一部喜劇要成功，劇本題材不容有失，笑彈充足還要孭飛演員檔期配合，谷德昭導演這次能夠把喜劇界班頂尖演員會聚一起，無非想入場觀眾的情緒每隔數分數爆發一次。 「跟黃百鳴老闆談過很多題目，首先要知的是，賀歲片的卡士很重要，我們想找一班喜劇演員去演，以往大堆頭的喜劇，很多演員都未必真係識演喜劇，但有卡士就難度檔期，究竟點可以讓他們集中去演？出埠搵個地方困住成班人就最好，要多謝千島湖洲際酒店全力支持，借間超豪酒店作拍攝主景，我們把故事集中在酒店內發生，以往拍酒店都係出入大堂住房泳池，今次就直奔酒店內部，從員工出發，你會見到酒店職員的飯堂和四通八達的通道，找來鄭中基演大堂經理，吳君如做執房阿姐，毛舜筠演魔鬼上司，他們每日面對不同身份的賓客，詹瑞文、熊黛林、葛民輝、吳千語等，每個都是獨當一面的，能把他們聚在一起，肯定笑料百出。」 君如vs毛姐 能集最強喜劇演員班底，谷德昭坦言有點壓力，編排角色戲份更要小心慬慎，慶幸埋班兩日，演員各自調節，豐盛角色之餘，又能跟對手互擦火花，就好似二十年沒合作的吳君如和毛舜筠。 「觀眾好似成日見到君如和毛姐做戲，但她們對上一次有合作係二十年前第一集《家有囍事》，《大丈夫》都只係過鏡。今次花盡心思在劇本上，我形容《百星酒店》係集各大門派獎門人一起，你知嘛，喜劇有分上下把，究竟邊個上把邊個下把？邊個有嘢可以攞走？邊個出第一拳而又邊個出去擋，演員會問的，毛姐係要一早拎劇本，要好清楚肯定角色造型，一去到化妝間就好似虎度門咁，上妝後變成戲中的魔鬼上司，黑起塊臉，令到化妝室氣氛僵硬；君如就完全唔同，唔係唔勤力，佢好清楚知道自己做乜，鍾意臨場執，睇對手出咩招再去交戲；初時埋班我就好擔心，死喇，兩位阿姐排唔排戲呢？新人就話捉佢埋邊對稿啫，結果毛姐話今次選擇演得實啲嘅，埋位兩日，大家知道大家點做，你會見到佢哋真係好正。」 阿基vs阿葛 喜劇演員要懂得收放，如何能爆發笑彈？看鄭中基，這幾年演技大躍進，一句眼神、一句對白也能激發出戲味，讓你會心微笑，連導演也讚不絕口。 「阿基今次做大堂經理包定，又名包搞定，在戲中穿插帶出不同人物事件，埋位前跟很多大堂經理取經，分享經驗，他們接待很多國際級巨星，知道的事會很多很仔細。我想講，阿基生咗個女後，成個人唔同晒，以前你睇佢係『砰！』一聲，能力大爆發的，那時觀眾會覺得好過癮，但現在你睇佢連收都好睇，演文戲都好笑的，會懂得豐富個角色，演技成熟了，作為朋友都好開心，毛姐睇完片都讚佢；有場佢扮鬼嚇葛民輝又係好好笑的，睇現場工作人員的反應，我肯定觀眾實鍾意。葛民輝真係好朋友，剛做完軟硬便趕來幫手，那時個頭仲係紅色的，夾硬染黑就埋位，六嚿腹肌幾鬼fit，朝朝七點就嘈喧巴閉，好鬼好精力，現場坐唔定，阿葛本身都係導演，好多時我要乜佢都知，真係好好玩。詹sir就客串幫手，佢係有能耐活化角色的，今次演鄉下賣魚佬，一換好衫就上身咁，好正！」 |
 | |
| |
 | |
 | |
| |
 | |
 | |
多謝分享 !