喜劇演員不易為，易學難精，薛凱琪偏偏選了這條路，「做演員唔係引到人喊就叫贏，做到影后先可以娛樂人，有些人真的想入戲院笑吓，所以我想拍多些喜劇。」要娛樂大家必先要懂得釋放，薛凱琪在賀歲片《百星酒店》中，演活神化富家女，跟鄭中基上演連場爆笑鬧劇，整部片出動各路門派笑匠宗師，吳君如、毛舜筠、杜汶澤、詹瑞文等，保證觀眾能由頭笑到尾，農曆新年點都要入場笑吓。
主持：黃柏高
統籌：林永匡
協力：彭燕燕
谷德昭主理的賀歲喜劇《百星酒店》雲集各路「笑匠」齊出招，有誰想到連宅男女神薛凱琪也在其中？還要演得如此放？說到這次合作，導演也忍不住讚歎。
谷德昭：「薛凱琪是我全力向老闆爭取的，睇完《爛賭夫與爛賭妻》的演出，Ronald都覺得阿Fi好有喜劇演員特質，佢唔介意醜樣，唔會吓吓話要顧形象唔肯做，只要合理又好笑的都好肯去做，在現場又愛講冷笑話????人開心，跟君如直頭一見如故，都是那種臨場表現的演繹法，能夠跟這班一流的喜劇演員合作，讓她可以邊做邊學，掌握節奏。」
薛凱琪：「首次合作總會擔心對方唔知會點，我覺得谷導演真的很體貼，正式開工前發了一個全英文短訊給我，好透徹講解角色特徵，甚至要我參考一部卡通片來演繹，真的很Cute很窩心。我承諾自己要拍多些喜劇，我覺得做演員不一定要拍藝術片、引人眼淚的才叫贏，不是做影后才可以娛樂人，導演拍喜劇很有經驗，但開場那個『吊脷』實在太火，要條脷伸到好出之餘，隻眼又要反上去，從演以來未試過咁肉酸，說是『獅子打呵欠』可保健，太過份，太好笑。」
完全投入角色
常說演員要懂得卸下包袱才能演活角色，薛凱琪做到了，沒有太在意形象，放膽去演，誓要觀眾在大銀幕前看到另一個她，這種完全豁出去的演繹讓人讚歎。
薛凱琪：「我的角色是慕容寶寶，基本上我很了解這角色，跟我有點相似，身邊九成朋友都係Member（同志），真正的男性朋友一隻手數得晒，而這些都是稱兄道弟唔可能有得發展的，但其實寶寶好想有人關心，對她溫柔，覺得她很性感，敢愛敢恨，用最唔溫柔的方法去迫人覺得佢好溫柔，我自己呢？就要先做朋友才可以拍拖，但由兄弟轉做朋友其實好難。至於Ronald，我覺得佢係癲的，懂演戲，會視乎對手來交戲，跟着拍子去走，是互動的，不是只會自己演。可能係獅子座的關係，我、Ronald、導演都係，為人火爆唔衰得，死要面，所以一定好勤力，愛玩，有責任感，試過好幾次見到導演拍了十幾個鐘戲仍拉着編劇傾劇本，完全是獅子座的特質。」
君如成密友
薛凱琪說吳君如是偶像，這次合作獲益良多，彼此成為交心友，谷德昭導演更認定，薛凱琪有潛質當新一代喜劇演員，接棒上位。
薛凱琪：「其實我同君如只係做過一次電台訪問，完全不熟，記得開工前，導演安排大家在酒店FuntionRoom唱K，大家坐低傾偈，佢突然問我做咩瞓唔着，因為佢有睇我微博，唔知點解我好信得佢過咁，一五一十將自己的事講佢知，君如就以自己的人生經驗和智慧來解決我的問題，佢話我現在得到的只有很少，孭唔到就要放開，唔可以全部事孭上身，唔好覺得幫唔到人就係自己責任，咁大負擔會影響演戲，唔好以為演戲和私生活可以劃分，就是一個眼神都已睇得出。從來無人咁同我講過，我覺得佢又唔識我，我又係後輩，真係無需要花時間去講呢啲嘢，覺得好感動。」
| 
多謝分享大家快樂好運!