elBulli珍藏港拍賣主廚晚餐底價逾四萬

2013/03/06 10:11:31 網誌分類: 生活

06 Mar

        中產唔單止愛咖啡和看電影，仲鍾意美食。西班牙米芝蓮三星級餐廳elBulli前年停業，全球老饕失望，未能一嚐佢哋分子料理嘅美味，認真遺憾，但四月三日就有罕有機會啦，elBulli傳奇主廚阿德里亞（FerranAdria，圓圖）會喺香港同紐約拍賣佢嘅珍藏，仲可以競投與阿德里亞共享晚餐，聽聞這個考「食力」嘅底價係四萬幾港元，相信唔少人有興趣。

        負責今次拍賣嘅蘇富比話，成功投得同主廚阿德里亞同晉晚餐嘅兩位買家，可各自帶四人一齊用膳，但要飛去巴塞隆拿嘅Tickets餐廳食，除咗食飯，其他拍賣品仲包括elBulli嘅窖藏、四件由阿德里亞親筆簽名嘅廚師制服，拍賣收入會撥畀elBulli基金，作為明年喺西班牙開設廚藝研究中心嘅研究經費。

        elBulli曾五度獲英國《餐廳》雜誌評為全球最佳食肆，每年只營業半年，想訂座嘅人數以百萬計，每季只招待幾千人。kelly聽曾去elBulli品嚐過兩次分子料理嘅食家劉健威講，呢餐飯要食足六個鐘，由晚上七點食到凌晨一點，共三十道菜，幾年前價值一百五十九歐羅，唔算貴，但佢話，呢類分子料理唔係食「味道」，而係食「驚喜」，食品好有創意，將所有食材分解再重新組合，但佢話一生人試一次都夠！

        KellyChu