夫婦之道苦

通常两夫妻, 日對夜對, 自不然會有好多磨擦ｏ如果是但一方EQ低, 冇忍耐力,好易會出事也ｏ

我有位師姐, 講佢老公, 某次食飯時, 當住佢話, 佢亞媽, 煮某碟餸好食過佢煮果碟, 我位師姐就一個唔該, 連隻碟拋咗落垃圾桶, 立刻冇得食ｏ仲叫佢老公, 你去揾你亞媽煮啦！死未？

報載有位少妻, 剛由大陸落到香港, 見到攞公援的老公（真係老佢好多, 成七十幾, 又冇水, 仲色心起, 唉！點唔死？）直言不甘食貧, 要出去做鷄！結果, 俾個老公毁咗容, 真慘！好心佢自已醒小小啦, 一走了之就算啦, 駛唔駛講明佢知呀？

有單仲過癮, 新婚之夜ｏ老婆被老公鼻（汗）聲, 嘈到瞓唔倒, 趕咗老公出廳, 誰知老公越諗條氣越唔順, 殺番入房, 兩公婆大打出手, 驚動警方, 成了新聞ｏ

最近有單新聞, 個男人虐待兒子, 在法庭上佢話個老婆成鬼日掛住去跳社交舞（唔知係咪請師傅果隻？）唔教仔, 令佢失控ｏ

又有一單仲慘, 老婆媽老公唔做嘢, 冇鬼用ｏ結果個衰男人, 掟咗個六歲女落街,然後跳樓自殺ｏ

舊時老一輩之人, 講两夫妻的磨擦, 解决的方法, 就係床頭打架床尾和ｏ

我諗, 點解唔係屋頭打交屋尾和呢？又唔係街頭打交街尾和呢？

哦！ 原來個關鍵字就在………

丁 丁 丁 櫈…………..