周年紀念的小心思

上年既昨日, 就係我同燒餅結婚既大日子。

回想... 係農曆年既十六。嚮十五當晚, 我嚮粉嶺屋企食左湯丸, 呀媽預備左D扁柏, 俾我放少少嚮頭上面, 就著住新既睡衣睡覺。到結婚果日, 由於間屋太亂, 去左呀哥屋企, 拎埋D婚紗、晚禮服、飾物、化妝品、金器過去~

換完件有夾棉既紅色褂, 大嫂嫂幫我化妝, 化得好自然好靚 (好過化妝師呀! D化妝師化到鬼咁樣, 完全唔係自己個樣), 我地就等燒餅黎接新娘、讀「愛的宣言」。然後, 影左D我屋企既全家福, 換左婚紗同頭飾, 就搭我地BOOK左既旅遊巴去沙田註冊, 係11點幾註冊既, 不過部旅遊巴遲左, 我好驚唔俾註冊呀, 一落車就跑過去啦 =口="

註冊之前, 登記左, 又要等, 嚮沙田公園出面又影左D相, 無啦啦有個攝影愛好者走過黎話我同燒餅都好靚, 話要影我地, 燒餅就豪一次俾佢影, 不過我唔係咁想囉, 是但啦。嚮沙田婚姻註冊處, 入到去宣誓既房間, 又影左D二人合照同埋全家福。之後, 上返旅遊巴, 去東涌, 換左件紅色既有锈花圖案、布料似褂、個款似LOLITA既裙仔, 裝香、食湯丸、敬茶俾老爺奶奶。之後, 嚮燒餅屋企影全家福。

坐左一陣, 又搭返旅遊巴去粉嶺, 買左D伊麵, 好似話係女婿要買俾外家既。上粉嶺又裝香, 好似換左白色既連身短裙, 不過唔記得影相。然後我地去酒樓問可以入去未, 原來可以入, 但係賓客未到齊, 而且有排先有野食, 我同燒餅就利用個房間既裝飾品, 又換幾套衫影相。當日訂左D CUP CAKES, 不過家屬裏面有好多小朋友, 未開始擺酒就有CUP CAKES被食左, 就即時幫CUP CAKES影左相先。

然後又係一連串既送金器儀式... 同埋食野。當晚真係好有公主既感覺 :) D衫真係勁靚!

話咁快, 一年過去左啦!

昨日我點慶祝? 都係等燒餅放工啦。我整左張結婚周年紀念卡, 同聖誕卡、情人節卡一樣, 左邊寫野俾佢, 右邊俾佢寫野俾我。有時就算係呢D小心思, 都可以好浪漫... 而燒餅昨日同我講左D幾感動既野, 原來係佢覺得佢雖然結左婚, 但我仍然俾到好大既自由度佢, 等佢可以同老爺去釣魚、自由咁買股票、唔過問佢既財政等等...

因為佢係有自制能力既人。奶奶最信係佢呢個仔, 從奶奶身上, 我睇到佢對燒餅既信任, 同埋燒餅俾到佢既可靠感覺。呢一年, 我都體會到奶奶呢種感受, 所以唔需要好似好多女人咁管住個男人- 佢自己識管自己, 你就唔需要點管佢架啦, 而且可以好放心。

彼此互信, 好重要架。現今社會好多男女只顧猜疑, 咪好難有好結果囉。