12.14.17/3 收市

2014/03/12 21:27:59 網誌分類: 經濟

12 Mar

12/3 周三暴風雨來臨沽盤排山倒海而來大成交破底而下插穿22000 後市不妙

又拆倉走鬼.恒指收21902 急瀉367點 21600~21900 牛仔性命垂危

近排大鱷頻頻出絕招裂口低開破位而下, 周一是大跌高危日又靈驗, 馬航事件已預示港股會墮機, 周一10/3恒指超樣衰一舉插穿10.20.50.250天線, 跌至22200扮回穩, 不過只係周二抖左一日, 今日再急挫插穿22000, 港股弱勢已成, 港匯插到落 7.7656, 跌得好急, 今日港股成交急增, 撤資走鬼格!

地震前蛇虫鼠蟻會走晒出黎, 是災難的先兆, 炒癲股要識得落車, 上升是為了下跌鋪路, 早前大鱷將二.三線股炒上天就係想維持市場氣氛, 一直托住恒指在22500樓上, 其實係作出向淡部署及派貨, 一搞掂就隊, 走鬼市通常係一浸浸落, 跌下彈下扮回穩引人接貨, 22839已確認見頂, 以每月波幅約1700點計, 三月底部在21000邊, 剛好接近2月5日低位21197, 就算以見頂回落, 量度跌幅都要見21450, 走鬼市通常會跌突, 如果好友仲未死晒, 就會係秒殺, 急插急彈, 如跌穿2月低位21197彈唔起就死得

恒指仲未跌穿今年低位21197, 但有不少股份已跌穿當天低位, 形勢不妙, 匯控今日除凈, 通常除息後都會有沽壓, 強勢股騰訊領跌唔係幾對路, 指標股騰訊.港交所.匯控.中移.內銀.內險......仍未有止跌跡象, 預示港股尋底之旅未完, 恒指未破底, 但今日國指已率先破底, 低位9304, 創今年新低, 大鱷最忌打壓政策及經濟放緩, 阿爺兩瓣都中晒, 加上人民幣及銅價急瀉, 所以大鱷雞咁腳走鬼

2月5日恒指低見21197, 用左一個星期就爬番上22000, 做左第一隻腳, 今次港股見頂回落, 走去搵埋第二隻腳, 恒指跌穿21500通常都不會長久, 我估係港股價值浮現吸引長線投資者入市, 但由於美國逐步退市, 港股會係一級級落, 21000 早晚不保

${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$

拆倉撤資恒指連續3日急挫, 20天線和50天線今日跌破250天線, 出現死亡交叉

恒指全周挫1121點為2012年5月以來最大單周跌幅繼續尋底

14/3 周五恒指低位21462, 最多跌293點, 收21539 跌216點

烏克蘭局勢再度惡化, 日圓急升, 拆倉潮起, 金股匯風雲變色, 全球股市又反艇, 亞太區股市普遍下跌, 日股急瀉488點或3.3%, 創3月低位, 嘩))) 反映資金流向的港匯進一步走弱至22個月低位, 報7.7672, 弱爆, 反映港股仍未見底, 仲未插完, 大鱷要隊穿2月底21197才夠交數, 但未必會一步到位, 跌下彈下較易派貨, 踏入三月下旬, 跌穿21500就要有心理準備急跌急彈

12/3 匯控失$80大關, 恒指插穿22000, 今日中移失$70大關, 恒指即刻插穿21500, 破大位要靠權重股, 指標股 jump.指數就 jump, 恒指50天線剛插穿250天線, 通常出現重量級死亡交叉後都會有死貓彈, 加上短短一周就出現3個下跌裂口, 點都會彈上去補回部份, 睇下會唔會插多一棍即彈, 今日有80隻牛證被「打靶」(18/3 補充: 港股死貓彈, 周二恒指收21583 升109點結束四連跌 )

國指低位9207, 最多跌115點, 收9298 僅跌24點, 近全日高位收, 弱雞國指竟然連續三日跑贏恒指, 誰托住國指呢? 可能係 1) 國指跌到殘, 有趁低吸納, 港股醞釀反彈, 不過國指呢兩日成交並未見增加, 成交不配合 2) 扮跌唔落托沽引人入市接貨 3) 只係中資股累積龐大跌幅淡友平淡倉獲利, 開邊瓣大家自行分析啦! 但有一樣野可以肯定, 大鱷撤資初期係先狂沽中資股, 已經掟左好多貨出街, 當時就推高騰訊.濠賭.長和撐市, 如今輪到呢堆強勢股遭洗倉恒指就散晒, 令人有錯覺國指比恒指強

~~~~~~~~~~~~~~~~~~~~~~~~~~~~~~~~~~~~~~

恒指每月波幅仍未達標, 3月頂 22839-1700=21139, 與2月底21197相若, 所以暫時估計三月底在21100附近, 未來一周騰訊.中移.石化雙雄.恒地.煤氣.銀娛.昆侖能源等成份股公布業績, 聯儲局議息, 烏克蘭局勢, 港股仍要坐過山車

估計跌多一浸, 好友就會作出垂死掙扎, 部署轉倉及結算位, 總不能在三月最低位結算, 3月21日(周五)是春分, 春分是重要節氣, 影響力會較大, 由於3月基金季度結, 我估近排港股跌勢係基金佬見勢色唔對走貨埋數加速港股跌勢

2月恒指插穿21500, 徘徊幾日即彈, 但由於聯儲局繼續維持縮減買債步伐, 會加速資金流走, 估計港股四月仍會創新低

消息指內地新股發審會將於3月20日重啟, 上證綜指收報2004, 跌0.73%, 全周累計挫2.6%, 兩會閉幕, 似有無形之手咬住2000關口,

市場憂慮中國經濟增長放緩與克里米亞周日全民公投, VIX 恐慌指數急升近10%, 資金流出股市, 追入黄金.債券.日圓避險, 周五晚道指與標普蒙受了7周以來最大單周跌幅, 道指全周累計跌2.35%, 連跌5日, 今年未試過連跌6日咖! 下周一有望作出反彈 (後記: 道指周一.二連續兩日急彈)

~~~~~~~~~~~~~~~~~~~~~~~~~~~~~~~~~~~~

個股表現

港交所一直咬住$119唔放, 點解呢幾日跌得咁急呢? 有報導指因為本港監管當局不願放寬上市規則, 阿李爸爸有95%機會棄港赴美上市, 李小+舊千億肥豬肉搭飛機走左, 港交所今日一度插穿$115, 新世界供股集資拖累地產股, 而人民幣下瀉就禍及內房股

騰訊股價一度急跌6.8%, 最低見$548試水溫, 是今日最大成交港股, 連同認股證和牛熊證成交金額高達$105億, 佔大市成交近14%, 騰訊衍生工具多, 是股價急升暴跌的主因, 我估騰訊急挫除了因為阿爺突然監管互聯網金融, 亦係因為阿李爸爸決定啟動到美國上, 冇左影子股效應即插

騰訊.阿李爸爸大搞互聯網金融, 連信行都搞虛擬信用卡, 點解阿爺任得佢地癲都唔作出監管? 兩會期間仲大大聲話支持互聯網金融, 今日終於出事, 網上保安出現漏洞, 有資金被盜用, 人行拿拿臨發文緊急暫停支付寶騰訊虛擬信用卡業務, 早前借勢炒到飛天的股份全部反艇

${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$

17/3 周一恒指收21474, 跌65點四連跌, 大市嚴重超賣, 反彈在望

國指收9333, 升34點, 連續四日跑贏恒指, 結束五連跌

道指五連跌, 恒指四連跌, 吊頸都要抖下氣, 反彈在望, 相信恒指會上去補回下跌裂口21630~21743, 今日港股成交突然縮, 可能係部署大龍鳳, 亦有可能係投資者觀望聯儲局講話, 導致成交急降, 今日道期走高, 但恒指冇反應, 即市一彈就見沽壓, 我估大鱷要靠裂口高開才能衝上去, 港股等緊好消息做催化劑, 如有好消息補倉盤就會推高指數, 周二又係人行抽水日, 睇下中資股有乜反應就知有冇動力 (18/3 港股死貓彈, 周二騰訊急彈貢獻恒指109點, 其他股份仍弱雞, 恒指收21583 升109點結束四連跌, 惟國指大幅跑輸恒指, 反映向上動力不足 )

恒指上周五收21539, 本周收升機會較大, 變數在耶倫周三的講話, 周一是拆倉走鬼高危日都守得住21400, 升跌股份比例唔錯, 正醞釀反彈, 其實負面消息仍充斥市場, 港股仍未見底, 寧波最大房企浙江興潤置業投資資金鏈斷裂, 資不抵債, 負債高達35億人民幣, 其中銀行貸款佔24億元, 市傳建行.工行及中移持有的浦發銀行都中招, 另外中移4G減價, 2月中旬後, 建行、中行、浦發行、招行再度上調首套房貸款利率, 內地一線城市樓盤亦降價促銷, 市傳內地官員正登記房產, 亦令樓市受壓, 美國監管機構起訴包括匯控等16家銀行操控 LIBOR, 匯控頻頻犯官非, 權重股死, 港股冇運行

人民幣波幅今日起擴大至2%, 人民幣對沖產品拆倉潮持續, TRF止蝕斬倉導致人民幣收市大幅急挫279點子, 遠期合約由3500億美元縮減至1500億, 要不是人仔急跌, 今日恒指已經作出反彈, 國指連續四日跑贏恒指, 為今年首度出現, 有心人托中資股來穩住港股, 但三月份到目前為止高低位21423~22839, 波幅1416點, 仍未達標, 尋底之旅未完, 我睇就算三月守得住21000, 四月都頂唔住,

近排中資股跌到殘仍未見起色, 人民幣大插插係元兇之一, 企業持有大量人民幣遠期合約TRF來對沖人民幣升值, 現已錄得龐大虧損, 有大行估計帳面虧損已超過23億美元, 近日人民幣續瀉, 已觸及6.18~6.2人民幣兌一美元重倉區, 因而觸發大規模斬倉令人民幣進一步受壓, 骨牌效應不容忽視

~~~~~~~~~~~~~~~~~~~~~~~~~~~~~~~~~~~

財經日誌

史哥分析3月波動區～。 20514- 21148-21802 - (22477) -23151 - 23845

烏克蘭及俄羅斯正處交戰邊緣, 克里米亞將於3月16日(周日)舉行公投, 決定併入俄羅斯或繼續留在烏克蘭

3月18~19日聯儲局議息, 香港時間星期四凌晨聯儲局發表會後聲明, 市場分析指2月新增就業人數回升足以讓聯儲局保持縮減QE步伐, 預計會將每月購買資產規模再減少100億美元, 此後每月減少100億美元, 直至10月最後減少150億美元

3月21日(周五)是春分, 預示有大變, 春分是重要節氣, 影響力會較大, 春分後就係期指轉倉

3月基金季度結

回應 (15)

我要發表

2014/03/21 18:54:02 回覆

史哥~英雄所見略同,祝贏到開巷))) ${#iconb_237}$ 但我未平淡倉,而家擔心星期一比人夾

soho~今日春分,果然大變,爆上,成交創4個月新高,阿爺出手,A股打左嗎啡咁報復式反彈,內銀內房領漲,港股跟風,同樣系內銀,優先股威力真大,而且全部都系買貨,無乜沽空,犀利,熊軍食夠,暫且休戰,本月波幅達標,但期指未夠數,要殺上啦,黎個大V唔出奇,但我未平淡倉阿,嗚嗚嗚,可唔可以平開比我走左先>_0

2014/03/21 12:57:54 回覆

Soho.... 我跟Karl 都係同一時間係216 再次南下⋯ 而由於e十年波仲未達標一般要4000-4500 個，再加上老美仲係高位，所以我唔信咁快見底⋯ 由於一般見頂回起碼要回5-6 個月，e十先至第四個月，所以我相信下月會下破21000，目標將近205-203⋯ 咁，妳又有何看法呢？

2014/03/20 23:35:13 回覆

Soho, Karl & 史哥

多謝你三位高人既專業分析，助我行少左好多寃枉路 (之前成日企錯邊，心情 + 金錢跌到落谷底 ..... 唉！！)而家努力學習中，無言感激！

soho* 2014/03/20 21:59:06 回覆

史哥, soho 係低手, 梗係要搵高手來坐陣撐場啦! 否則冇人來我家

今日恒指創今年新低, 現處2008年見頂回落之後的大型三角形的底部支持區, 如果失守21000, 連20800都頂唔住的話, 代表四月會見20000嗎? 你熊左未? 今日港股破底而下, 但港匯反而好轉, 有乜睇法?

-----------------------------------

karl, 你真係眼明手快, 尋日恒指彈唔起你即刻重熊, 港股都俾你隊瓜左, 出手快而準, 漂亮! 而家市況炒個股好難搵食, 大方向利淡, 不過短線會有技術性反彈

回顧今個月見頂22839後的下跌形態, 每次走鬼或跌穿重要關口, 翌日都會有反彈, 如果大升或連彈兩日就扭轉了一貫向下走勢, 造淡就要小心, 萬一彈唔起, 都只會係下跌不足150點, 要有進一步壞消息才能插穿21000, 今年的跌浪每次都係靠拆倉走鬼來插穿大位, 今個月應該守到20800, 就黎轉倉/結算喇!

幾時公布匯豐內地3月PMI初值呢? 日股明日休市

-----------------------------------

友仁大大, 港股災難式下跌, 有理由相信你已返回地球, 哈))) 就算你否認我都唔會信

2014/03/20 18:07:14 回覆

Wa.... Soho. 妳家幾時多咗個高手㗎⋯wow....

soho* 2014/03/20 15:51:02 回覆

恒指每月波幅: 3月頂 22839-1700=21139, 今日低位21137 剛好達標

又走鬼.人民幣跌至13個月低位.港股大成交破底而下跌到走樣

每次拆倉走鬼都係低開超過200點, 今早開市已經知道港股又要插, 中港股市唔係倒水, 係倒瀉屎, 冇人敢伸手出黎接, 阿爺班財金官員, 一個字「廢」, 束手無策

昨日港股冇跟美股彈, 加上多隻指標股破底, 已經知道又要走鬼, 冇諗過耶倫竟敢講加息, 好呀! 壞消息盡出, 狠狠地插, 唔好再拖喇! 跌埋呢浸就有得食彈高

明知要下試21197, 三扒兩撥插落去仲好呀! 好過半生不死托住, 今早大鱷又係出絕招裂口低開破位殺落去, 今日港股幅走勢圖好似滑梯

哈))) 早幾日話業績前唔入中石化是辦對了, 入左成份股唔係自由身反而不妙, 比亞迪今日插14%

2014/03/20 15:12:41 回覆

soho,中港股市倒水咁倒,A股全日最低位收,沽都沽唔切,琴日21600建的淡倉開始有利潤,但一定未到底,琴日押注美國維持退市,同賭騰訊業績差,重熊過夜!成功!人民幣破8啦!~~~勢仍然系跌,所有壞消息較岩時間一齊出,全球股市無運行

唉,睇怕我都系適合炒市多過炒股,我近期炒的都輸,咩1668阿,6889阿

三大恆指火車頭:700 941 27一放榜就帶動大市跌

soho* 2014/03/19 21:09:25 回覆

karl, 港股昨日反彈109點, 今日正路係跟美股及 adr 沖高補裂口, 結果彈唔起已呈敗象, 今個月恒指展開跌勢以來每次只係彈一日就再往下走, 所以今日恒指升跌具啟示作用, 21500唔頂得幾耐, 仍要反覆向下尋底, 3月波幅仍未達標

港股百病纏身, 中資股俾阿爺打死左, 地產股俾特首打死左, 匯控俾自己打死左, 凈番騰訊.濠賭.和黃輪流撐市扮跌唔落, 其實連呢幾隻撐市股都係有病, , 今日港股升跌幅度看似不大, 但其實匯控.建行......跌到走樣, 臨危托沽格, 明日周四又係人行抽水日

怪不得騰訊昨日急升5.76%, 原來係炒拆細, 銀魚跳水, 皆因市場話不滿意派息, 係唔係呀? 是反應過敏嗎? 抑或又走鬼? 本周有好多成份股公布業績, 明日輪到中移.恒地.昆侖能源.中國風電.華潤創業.利豐...... 睇銀魚表現就知市場點解讀係完全冇得估, 但近排業績股多數係見光死, 真係冇眼睇

3月初恒指一直咬住22500樓上扮跌唔落, 養肥22300牛仔就大插插, 踏入3月中, 低左千點啦! 恒指又係一直咬住21500樓上扮跌唔落, 待養肥21300牛仔就插得咖喇! 唔頂得幾耐, 人民幣大幅貶值已判了港股死刑

近排中資股跌到殘仍未見起色, 就係阿爺搞搞震, 中港有不少企業持有大量人民幣遠期合約TRF來對沖人民幣升值, 有大行估計到目前為止帳面虧損已超過23億美元, 近日已觸及6.18~6.2人民幣兌一美元重倉區, 因而觸發大規模斬倉令人民幣進一步受壓, 跌勢未止, 骨牌效應輸死人, 勢必禍及中港股市

利淡消息不斷, 嘩))) 係真唔係呀? 市傳聯想網售平板電腦開錯價蝕一億, 比亞迪發盈警, 料首財季淨利潤同比跌87-96%, 唉! 冇眼睇

soho* 2014/03/19 19:39:08 回覆

「股王」騰訊一拆五

「股王」騰訊今日收市價 $567.5, 每手 100股, 入場費要$56750, 5月15日將股份拆細, 1拆5, 入場費價就降至1萬多元, 降低「入場」門檻, 吸引散戶進場,哈))) 大戶可以派貨俾散戶喇!

市場認為拆細可起護價作用, 發行商推出平價輪, 有助增加交投, 有分析指騰訊股價明天可能會先行炒上, 我唔係幾信, 真係咁好? 又睇下歷史, 當年利豐.思捷.匯控拆細, 如今係乜野下場? 基金先炒高股價, 趁拆細就派貨俾散戶

剛公布的業績又點呢? 騰訊去年全年盈利只得155億元人民幣, 增長22%, 低於市場預測的23~25%, 業績麻麻但野村.摩通掩住良心唱好, 大行對騰訊目標價: 2間調高 2間調低 5間維持, 大行手上有貨就講大話

2014/03/19 18:34:29 回覆

soho 高手中ge高手~今日午後睇住銀魚跳水,直插到底無水花,增長4成都比人洗倉咁款;QQ就增長21%,但其實我睇佢實際系倒退的,舊年QQ每股盈利8.64,今年系8.46,好似無發新股丫?咁仲唔系倒退?但系佢一拆5,好淡齊來,有春江鴨臨收市大手入

我諗聽日個市都系QQ玩晒,拆細之後大膽預測佢將會系唔睇市值炒ge股票,分分鐘兩萬億勁過匯控

太多消息,唔識睇>_

soho* 2014/03/19 12:03:21 回覆

karl 高手, 尋日你話 //人仔尾段又跌過,逼近8算,對股市系打擊,A股反應慢,睇怕聽日先跌反映壞消息//

哈))) 你唔係鬼揞眼, 係開了天眼通, 消息面明明利淡, 樓下牛仔個頭近, 三月波幅未達標, 但偏偏咬住21500唔放, 現水位好尷尬, 究竟係先彈後插抑或係先插後彈變成五五波, 就睇大鱷點玩, 最怕失驚無神拆倉就連好友都頂唔住喇!

今朝港股競價唔跟adr, 雖然平開, 但其實開得差, 連高開沖上去補裂口都做唔到, 發生乜野事令好友縮手呢? 一波未平一波又起, 周一講完寧波最大房企浙江興潤置業投資資金鏈斷裂, 資不抵債, 負債高達35億人民幣, 今早就傳山西最大民企海鑫鋼鐵陷入30億人民幣債務危機, 違約事件浪接浪, 怪不得內銀破底,

中港股市俾退市拖累已經遍體鱗傷, 而家仲整埋個人民幣擴大波幅, 簡直係落井下石, 阿爺玩人仔貶值部署得好失敗, 連中港股市都玩死埋, 今日人民幣續瀉, 貶值至近一年低位, 跌破6.2關口, 阿爺再唔出手的話, 中港股市就死得,

今早港股好淡爭持, 急跌急彈, 半日收市小幅下跌, 但升跌股份比例唔差, 成交亦冇增加, 恒指波幅指數回落, 似乎唔驚, 雖然升唔起但亦唔俾插, 昨日無啦啦大升的騰訊.中移今日見沽壓, 好友拿拿臨搵長和撐市, 咬住21500/9300唔放手, 亦冇跌穿近日低位, 好友算叻咖喇! 半日上証綜指跌19點呀! 市場觀望騰訊及銀娛業績及今晚耶倫講話

美股食彈高, 港股食彈散, 港股係乒乓波式反彈, 一級級落, 大方向利淡, 逢彈造淡係正路, 只係月尾有太多因素左右大市, 走勢好難估

2014/03/18 23:56:23 回覆

Soho,我撞彩ga炸>__

soho* 2014/03/18 20:58:25 回覆

18/3 周二恒指收21583 升109點結束四連跌惟國指大幅跑輸恒指

市場壞消息盡出反而明朗化, 大鱷有可能先抽高補裂口之後才尋底, 港股每次破大位跳水都要靠拆倉做助力, 通常係裂口低開插穿支持位, 現時港匯弱.日圓升, 利淡, 要密切監察匯市變化, 昨晚歐美大彈高, 勢頭唔錯, 有心人刻意推高騰訊撐市, 不過仍然唔肯掃貨係隱憂, 但今日造淡冇十足把握, 內地股市有阿爺維穩咬住2000關口, 亦會幫到港股, 但內地股市今日走勢唔靚, 明日港股食粥食飯睇阿爺, 兩會後或會重啟 ipo

春分轉節氣/期指轉倉/結算/基金季度結都係三月劇本的重頭戲, 睇下今日騰訊場獨腳戲真係好鬼精彩, 港股在下跌勢頭當中突然收升係好現象, 可惜成交唔配合(扣除配股只得$637億), 如果明日收跌食彈散就係冇力水, 又要往下走

睇下港股今日有幾得人驚, 騰訊急彈, 一隻野就貢獻恒指109點, 而恒指收市亦同樣係升109點, 升得好唔健康, 大鱷操控港股話都冇咁易, 升跌玩一隻騰訊就得咖喇! 其他股份可以不理, 大鱷力守騰訊50天線, 今日急升可能係預留回調水位俾業績, 國指大幅跑輸恒指, 有明顯沽壓, 但恒指仍能收升逾百點, 反映好友睇場, 不過未來幾日有好多成份股公布業績, 市況會特別波動, 又要坐過山車

美股真係打不死, 昨晚一飛沖天, 帶動 adr 升 66點, 過去一周 adr 未試過收升, 所以今日恒指高開高收係正路, 大鱷想慳子彈推升往往在競價開市及尾市出手, 今日兩瓣都中, 我仍然相信恒指會上去補回下跌裂口21630~21743, 有好消息的話, 會再挑戰22000, 如果一個裂口都補唔到, 反映港股沽壓好大, 又要插穿21300屠牛, 因為恒指三月波幅仍未達標

~~~~~~~~~~~~~~~~~~~~~~~~~~~~

人行.內銀和寧波官員就內房興潤置業如何償還35億人民幣債務開緊急會議, 咦))) 仲以為阿爺出手, 但人行已作出否認, 另外哈銀終於確定明日招股, 定價為$2.89-3.33, 每手1000股, 大行會撐住內銀嗎? 但興潤置業違約拖累內房債價大跌, 內房.內銀壓力好大

和黃分拆屈臣氏有進展, 但市傳集資規模大幅縮減四成至50~60億美元, 低於市場預期的100億,

人民幣匯率交易波幅擴大至2%後的第二日, 人民幣兌美元跌勢持續, 收市大跌139點子至逾11個月來的低位, 利淡, 未破6.2關市場仍能承受, 國指雖受壓但仍能小幅收升

3月18~19日聯儲局議息, 香港時間星期四凌晨聯儲局發表會後聲明, 如果聯儲局表示保持縮減QE步伐及重申低利率政策就係預期之內, 如果暗示加速縮減買債或加息就大大鑊

我要俾個 like, 普京真係好鬼型仔, 對西方制裁不屑一顧, 更宣布克里米亞正式加入俄羅斯, 奥斑馬同G7班友仔下周召開會議磋商制裁行動, 但係班友仔都要顧及自身利益咖! 制裁俄羅斯冇乜好處啵! 總之唔使打仗股市就有得食彈高

3月21日(周五)是春分, 預示有大變, 春分是重要節氣, 影響力會較大, 春分後就係期指轉倉, 我估下周好友會作出垂死掙扎

soho* 2014/03/18 20:50:44 回覆

karl, 唔好講笑喇! 睇我blog? 我亂寫一通唔好信呀! 你係高手黎咖! 咪扮野

你又話未彈完, 又入熊? 好矛盾啵! 今朝 QQ.中移大反彈真係莫名其妙? 雖說騰訊賣野執左10億, 進軍教育網又係炒上藉口, 但我估有可能係平淡倉, 騰訊插唔死係因為一個二個大鱷都係重倉騰訊, 國指大幅跑輸恒指, 但恒指仍能收升109點, 呢個現象已經見怪不怪, 我的測市指標已改變

你有唔少同道中人咖! 港股仍處弱勢, 內地股市今日走勢唔靚, 今日港股沽空比率急升至 11.06%, 不過回顧 2月5日恒指見低位 21197, 都係在一片淡風之下突破阻力上沖, 就算今次打個五折月尾都要見 22000 啦! 幾時上番去就要睇大鱷劇本喇! 要擇時辰咖! 明日恒指收升抑或跌具啟示作用, 港股食粥食飯睇阿爺, 上周五恒指收 21539, 連跌兩周, 我覺得大鱷想本周收升

karl* 18/3/2014 17:15:34

soho~我係睇你blog先識玩咋)))

今日反彈正路,但未彈完,聯儲維持退市市場早有預期,而家最大問題系阿爺....人行周二再正回購1000億,shibor全線抽升少少,唉,一單無錢還, 搞到內銀內房都無乜運行,國指應該又拖恆指落山,其次,QQ銀魚派成績表,應該差過預期,今日彈果109點都系QQ撐.....於是,又入了點熊

人仔尾段又跌過,逼近8算,對於我黎講系好消息,返祖國無咁肉赤,但對股市系打擊,A股反應慢,睇怕聽日先跌反映壞消息

soho* 2014/03/18 12:59:37 回覆

大鱷打孤寒波, 凈係買起騰訊.中移就推高恒指百點, 擺明唔想掃其他股份, 欠缺誠意, 升得唔健康, 但今日港股低位剛好高過昨日低位, 係好現象

哈爾濱銀行招股取消今天的投資者推介會, 市場憂慮或會延遲上市, 加上人行今早又收水, 內銀受壓, 拖低國指, 國指大幅跑輸恒指, 拉住恒指後腿, 但恒指仍能升103點, 大鱷推上去回補裂口之心不變