「路過」外交有因有由
2014/04/08 07:59:14 網誌分類: 生活
正式外交會晤有對等的考慮,即使香港特首,只是一個地區首長,連國家元首都不是,自然見不到美國正、副總統,更何況李馬丁和陳四萬,一個是退休香港政黨主席、一個是退休特區高官,即使仍在位時正式訪問,也遠未夠級數正式去見美國正副總統,何況退休之後?所以即使會晤,也只能用「路過」這種非正式方式。
不過,縱使是非正式會晤,兩個香港泛民的元老(陳太應該當她是泛民?)得到美國副總統這樣高規格接見,都不可以話美國不重視啦。不過美國重視是否好事,又另作別論。
兩個泛民元老要見美國副總統,當然不是上星期一打個電話,話「我哋得閒周末去美國遊一遊,唔該搵個副總統見吓我哋」這麼隨意。無論是兩老主動催生會晤,抑或美方主動,都要一頭半個月去安排,這樣就睇出一點事情的脈絡。
上月中國開人大,中央港澳工作協調小組組長張德江強硬發言,事後泛民無乜大反應,好靜。過咗一陣,阿爺仲叫全體立法會議員去上海對話。接着傳出李馬丁和陳日君樞機「唔係好順」,同民主黨等泛民議員講,話「你哋對阿爺太聽話啦,上海唔應該去,應該上街絕食爭普選,要搞激啲至得」。接下來泛民急急腳搞咗個絕食出來。
絕食單嘢,事前醞釀不夠,有少少交差味道,社會反應一般。但原來與此同時,泛民兩老已搞緊去美國見拜登。咁樣「唔好去上海、要上街絕食、去美國見拜登」,就可以用一條線串起來?泛民兩老見到拜登時,可以墟墟冚冚,講多好多囉。
不過有個政界中人問起,泛民議員去不去上海,要黨內外傾這麼多次,要向各方交代。但泛民兩老去美國見副總統,事先有無問過其他泛民政黨同不同意他們去?他們是否代表香港人講說話?嘩,這些問題好深,搵當事人答好一點啦。
盧永雄
回應 (0)
我要發表