「龍獅節」勢成刑事調查
2014/04/24 08:49:17 網誌分類: 經濟
政壇中人對這件核數風波竊竊私語。事關審計署長孫德基前年從外面空降到審計署，政圈一向視佢為特首CY的粉絲。他這樣「大公無私」對建制派放火，究竟意欲何為？
政壇中人總結出三種原因，第一係有心殺人立威。既然係立威，自然唔會理會當事人係建制中何許人，照燒可也；第二係點火失控。盛事基金評審委員會主席、經民聯的林健鋒，他又向來同「梁粉」陣營若即若離。有口痕友就估，矛頭原本只係針對林健鋒，但點咗火就殃及池魚，連陳鑑林都燒埋；第三係大公無私，親疏無別，見人就殺啦。
無論審計署的動機為何，客觀上已經點起了一團大火。當事人力圖解畫，但當中的兩個主要疑點，澄而不清。首先係搞「龍獅節」的目的係創造就業，主辦單位呈報的「就業」人數有三千人，但審計署的調查只有一千八百五十人參與，而且當中還包括了四百幾名中小學生。問題係活動牽涉到學生，根本與創造就業無關。如果以創造就業來申報「龍獅節」的使費，其實已有問題。第二個問題就更大，主辦單位話有「支薪」或「支車馬費」予參與活動者，但兩所學校校長話無收過錢，車費餐費都係學生自付。一般事情出現混亂，可以有好多解釋，但一旦涉及公帑，當事人都好難輕鬆甩身。據聞民主黨已經報了廉署，廉署立案調查的機會不低。
在如今透明的社會，拿了公帑去搞活動，根本不可以求求其其，完事後報個數就交差。今時今日，數目唔清清楚楚、均均真真、請幾多人報幾多人，肯定死得。今日香港，一個舉報去到廉署，好大機會立案調查。所以，利用公帑搞活動的政黨及團體，都要引以為戒。
杜漸防微，本地大型的政黨或政團，其實應該效法大型企業，設立內部審計部門，聘請專業的會計師盯緊各級議員的開支、有關公帑的運用及申報，有單有據，事事做到合法合理，先至瞓得着覺。在法治社會，涉事人一句唔知道，或者唔清楚，唔可以成為脫罪嘅理由。
wh.lo@bastillepost.com
盧永雄
回應 (0)
我要發表