旅遊奇譚

相信大部份人都参加過旅行團, 都嘗試過被人趕鴨仔的滋味ｏ一個旅行團通常二三十人至四十人不等, 十人生九品, 真係短短旅程, 你會見盡人生百態ｏ

曾經參加過一個團（都忘記了去边了ｏ）有一家人真係人辨, 由第一日爭旅遊車,,至日日晨早派两名小童霸早餐枱, 全程乜都爭, 永不𧵳底！

最妙有一日, 去到一處有個台的餐廳, D靚仔以為上台坐係好位,早早霸住,  到人齊時, 一家人擺咗上台, 有D口痕友仲潤佢地, 乜得你地昇咗上神枱牙？認真瘀皮！其實咁教D靚（平声）仔靚女, 大咗咪爭家產囉, 太有家教矣！

有D人又係乜都埋怨一番, 冇句好嘢, 由第一日怨到最尾一日, 又話番香港仲要投訴ｏ（其實想唔俾貼士！而家明文規定每日俾幾多！冇咗呢枝歌仔唱矣！）

有次有两個愚夫愚婦, 走去台灣一處賣麒麟神物工厰, 遇到一個所謂大師, 被騙買了幾皮嘢石麒麟, 仲要唔准講俾團友知, 否則唔靈ｏ但可惜臨走時漏咗係酒店, 爆咗出泥ｏ嘩！咁玩都唔見幾皮嘢！中咗購物祈福團招！死未！（好彩黄SIR一家冇人迷信, 託賴！託賴！）

有D又中即磨珍珠粉局, 珍珠粉食咗青春常駐, 又話開水滴眼, 白內障都医得, 又係幾千皮老千局也ｏ有D團友耳仔軟, 一點頭, 珍珠即磨！冇得反悔！旅行都要好醒目至得嫁！

有次去上海貪平, 参加了一個什么什么平價購物團, 日日上幾小時銷售課, 以後一見有行程去購物, 去什麽什麽廠！去什么什么原產地！一於唔報名！切記, 切記！而家行程表列晒景點, 但都要睇吓係咪入內參觀, 有D到門口影張相就算, 防不勝防！

以前貼士冇規定, 有司機及領隊不滿貼士太少, 最後一程特登停架車離開目的地幾百米遠, 要人人拖住D行李行, 被佢地玩到殘！停唔倒車, 吹咩？冇得投訴！有次領隊收得貼士太少, 直情反晒面都有！而家硬性規定, 又在事後顧客意見書提問領隊有冇明示或暗示收多D貼士, 就係防D領隊衰格！